Samuɛlə dɔlɔɔ 12 - Yálá laawoo hɛɓɛ (dc)

Samuɛlə nwɔ yələwala too woo Israɛlə ɓa

¹ Samuɛlə yɛ Israɛlə lonnii kəlee diɛ: «Mɛ̨nįɠaa kpɔ ka mo mą́ą́, ya ka ŋɛ̨i ŋą́ą́ ɲéé hee gəlee mu, ŋą́ą́ tɔɔmun ɉee ka nwun na.

² Ə həɠə yiihu ɓa, dɔɔmun tii ɓə pai kɛi tɔɔi ka ɲɛ̨i tɔwɔ; nwɛ́i, ŋą́ą́ pɔlɔ, kɔ́lɔ hvo kɛa mą́ą́, nónnii kaa ka pɔ, di kaa nu kpalaan ɉeɛɠaa. Ɲą́ą́ ɓə kɛi tɔɔ ka ɲɛ̨i tɔwɔ, ə həɠə náŋą yələ ɓa, ə həli la háákələi ɓa.

³ Ɲą́ą́ ka tɔɔni ka lííla Yai-Laa ɲɛ̨i ɓa da nwɔ nui ə ɉəɠə ɉu, nui ɉɔ́n gaa gwəi, ə mo. Gbɛɛ ɓə ŋą́ Nįŋɛ̨ ɲəi? Gbɛɛ ɓə ŋą́ hoohvaalən ɉəɠə ɲəi? Gbɛɛ ɓə ŋą́ ɲéé pənə ɉu? Gbɛɛ ɓə ŋą́ too mɛ̨i hɛn ɉəɠə ɲəi? Gbɛɛ ɓə ŋą́ wali həɠə ɲəi a gili ŋapɛlɛ pələ? Nui ŋą́ yili kɛ la, mąą nu ə hvaa, ŋą́ pənə ŋą́ dɛɛ bɔ.»

⁴ Nuą diɛ Samuɛlə ɓa: «Hvo ə yee pənə li ku hu, hvo too li ku mɛ̨i, hvo hɛn gulɔ li nu ta yəi.»

⁵ Samuɛlə yɛ diɛ: «Yai-Laa ɓə a ka gu lɔwai kɛla; da nui ə ɉee a tɔɔmun, háákələi, ka hvo hɛn da kaa li ɲə́i.» Di kəlee diɛ mą: «Ya kpɔ ɓə a gɛla.»

⁶ Samuɛlə yɛ nuą diɛ: «Yaa kpɔ ɓə. Yai-Laa tii kɛ Moisə da Aarɔn di pɔ, yɛ ka nąn ni kulɔ Eziptə lɔi hui.

⁷ Ka tɔɔ kɛa yiihu Yai-Laa lííla, mɛ̨nįnɛɛɠaa ə di kɛ kaa, da ka nąn ni diɛ, gáá di hukulɔi ka ɲɛ̨i ɓa.

⁸ Ɓɛlɔwai Ɉakɔbə ə li la Eziptə lɔi hu, Eziptə nuą di hee di mɛ̨i, ka nąn ni di wɔlɔ di di woo kulɔ Yai-Laa ɓa. Yai-Laa ə Moisə da Aarɔn di tɔɔ, ə gɛ, di ka nąn ni kulɔ nuwɔ laa tii hu, di di hee gɛɛnąą ŋɛ̨i ɓa.

⁹ Kɛlaa di di kili kulɔ Yai-Laa hu, yaai gaa a di wɔ Yálá. Yili yaan ə di kwɛlɛ Sisera ɓa, yai kɛ a Hasɔrə kɔ́kuláá nwun nąmu, da Filisti nuą diɛ, da Moabə tɔɔmun ma. Yiliɠaai di kɔ́ pɛlɛ diɛ.

¹⁰ Israɛlə ə kɛi wɔlɔ Yai-Laa pɔ pələ a mąą yələɠaa diɛ kɛ mą: ‹Kwaa nɛ̨ŋɛ̨n ɉəɠə, mąąhɔlɔɓo, kwaa Yai-Laa lɛɛ laa, kuɔ kwɛli hvilɛn ɉaliɠaa ŋɛ̨i da kɛ diɛ Baalə da Astarteɠaa diɛ. Yii hu, ya ku kulɔ ku yowoɠaa yəi, kwa tí yɛ́.›

¹¹ Yai-Laa ə Yerubaalə, Bedan, Ɉɛfte, da Samuɛlə di həɠə, ə di tɔɔ, di ka kulɔ ka yowoɠaai kɛ ka kwɛlɛ di yəi, kaa hee nɔi, ka wəli pulu laɠiɛ.

¹² Kɛlaa, Nahasə yai kɛ a Amɔn nuą di wɔ tɔɔmun, gaai ka mo yɛ pa kɔ́ pɛlɛi kaa, ka kɛ mą́ą́: ‹Kpələ! Tɔɔmun mə mąąnɛ̨ɛ̨ ə ku ɲąąwooɓo.› Ya pa Yai-Laa ka wɔ Yálái ɓə gaa a ka wɔ tɔɔmun.

¹³ Yili ɓa, yiihu, tɔɔmun ka vɛli a ka liiɓa, yaai ka ɉəɠə a ka liiɓa, ya ka. Yai-Laa aa tɔɔmun dɛɛ ka pɔ.

¹⁴ Akɛ ka ɲɔw Yai-Laa ɓa, ka tí mą; kaa ka wəli tɔɔ nwoo ɓa, ka wala Yai-Laa nwɔ tɔ́n nwooɠaai pili, kaa mąn nwoo, ka wɔ tɔɔmun heeni ka mɛ̨i, ka káá pai lɛɛi kaa nɛɛ hu Yai-Laa ka wɔ Yálái pulu.

¹⁵ Kɛlaa, ka wala ka wəli tɔɔ Yai-Laa woo ɓa, ka ká nwun gulɔ Yai-Laa nwɔ tɔ́n nwooɠaa mu, Yai-Laa yee kaa pai wiɛi ka mɛ̨i, yɛ bələi ə wiɛ la ka nąnni mɛ̨i.

¹⁶ Ka tɔɔ nwɔ̨nɔ̨, yii mɛ̨nį kəlee Nąmu Yai-Laa yɛ ə gɛ, ka ɲɛ̨i ɓa, ka gaa.

¹⁷ Kɛlɛi mɔ̨nun deei lɔwai ka kɛa-e, gáá Yai-Laa hvɛlii, yələgbąnąą tulɔ ə pu, mɛ̨nį ɲɔ̨nwɔ̨ɔ̨i ka gɛ, ka a gɛnɛ̨ pələ kaa, gɛ mɛ̨nį ka tɔɔmun vɛli yɛ hee ka nwun mɛ̨i.»

¹⁸ Samuɛlə ə Yai-Laa hvɛli. Yai-Laa ə yələgbąnąą tulɔ pu, a mąą yələi tii. Nɔi lonnii kəlee di ɲɔw Yai-Laa da Samuɛlə diɛ.

¹⁹ Nɔi lonnii kəlee diɛ Samuɛlə ɓa: «Ə́ wɔɔ luwɔɠaai maa nɛ̨ɛ̨mąą hvə Yai-Laa ɓa, ə gɛ, ku hvo ləi pa haa. Hvo gaai, kwaa ku kɛ nɛ̨ŋɛ̨nŋaa ta laa mɛ̨i, gɛ mɛ̨nį ku tɔɔ nwɔ̨nɔ̨, kuɔ tɔɔmun ɉu hvəli, kuɔ ɉee, yɛ ku ɲąąwooɓo.»

²⁰ Samuɛlə yɛ nɔi lonnii diɛ: Ka hvo ɲɔw, tɛ̨ą li kaa ɓə mɛ̨nį ɲɔ̨n ŋɛ̨i kəlee kɛ, ə mą kɛ tii, ka hvo ka pulu tinɛ̨n Yai-Laa ɓa, ka tí Yai-Laa ɓa kwəi tɔ̨nɔ̨ laa hu.

²¹ Ka hvo həɠə bulu, yili a kɛ a ka hvilɛn ŋąą kpɛli-kpɛli mɛ̨nįɠaa pulu, yiiɠaai tɔ̨nɔ̨ hvo diɛ, di hva pɛli nu kulɔ mɛ̨nįi, mąąhɔlɔɓo, di hvo a hɛn da.

²² Mąąhɔlɔɓo, Yai-Laa hvo pai ɲee kulɔi nwɔ nu huwui mu, gbala ə tɔɔ, naa kɛnɛ̨i. Ɛlɛɛ, ə nɛ̨ɛ̨ a Yai-Laa lii, ə ka kɛ a nwɔ nu huwu.

²³ Yii ɓaa mą́ą́ mɛ̨nį nwɛi, ə hvóló mą́ą́, gɛ́ nɛ̨ŋɛ̨n ɉɛɠɛ Yai-Laa ɓa, a gbə́la mɛ̨nį ka mąą mɛ̨nį laa həliɛ ɓa a nɛlɛɛ, a ɉaŋąą; və́ pai kpɛlai mɛ̨nį lɛlɛɛ da mɛ̨nį haŋąą lɛi kaa.

²⁴ Yii lɔ gaa mą a ɉaŋąą, ya ɓaa: Ka ɲɔw Yai-Laa ɓa, ka tí mą a ka kwəi kwɛlɛɛ a kilitɔɔmąąlaa, mąąhɔlɔɓo, aa gbɔwɔ lɛ kaa, yɛ gɛnɛ̨i.

²⁵ Kɛlaa, ka túwɔ́ a ɲɔ̨nwɔ̨ɔ̨, a ka kalaɠala ka ká wɔɔ tɔɔmun ni.