Piɛrə dɔlɔɔ 4 - Yálá laawoo hɛɓɛ (dc)

'Ká nɛ̨ŋɛ̨n ká ká hvalaɓo

¹ Yili ɓa, yɛ bələi Kristə ə mɔ̨nɔ̨ mįi la kɔ́lɔ hu, káá kpɛlimąn, giliŋąhiɛ tanɔ̨n tii ə kɛ káá; nui a mɔ̨nɔ̨ mįi kɔ́lɔ hu, a kɛ ti, da nɛ̨ŋɛ̨n daa di hvalaɓo,

² ɲíi kuui aa lɛɛ ɲəi yɛ gɛ kɔlɔ hu, hva gɛ yɛ bələi nuą di wɔ ɲɛ̨i kulɔ bɔ kaa la, a gɛ Yálá liiɓa hu.

³ A tɛ̨ą, yii tii kɛ, aa pɛli ɉu, a yai wɔlɔ ká gɛ hali pulu yíi hu, káá tuwɔ pələ ɲɔ̨n ɉuwu kəlee kulɔ, ɲɛ̨i kulɔ bɔɠaa, lɔɔ hon naa, kwəi kɛnɛ̨ laa, lɔɔ kpələ kpɔn naa, da hali ŋą mąąliɓi mɛ̨nįɠaa.

⁴ Yili aa kɛ diɛ a kwəi pilimąą, a gaai daa mo, ká diɛni ká hvo kɛa duwɔ pələ ɲɔ̨nŋaa tii mąą gilɛ həɠəi, ɛlɛɛ, diɛ ká laa kala.

⁵ Kɛlaa, di kaa pai di kwɛlanmoi nui ɉɛ̨ą yiliɛ nu hvulúmąąɠaa da haa nuą di kiti tee mɛ̨nį ɓa.

⁶ Yili mąą mɛ̨nį ɓə gɛ, diɛi tii a haa nuą nwɛlɛɛ lɛlɛɛ laa ə həli diɛ, əgɛ, nu kanŋaa di di kiti tee di kɔlɔ hu pələ, ɛlɛɛ, di yɛnɛ̨ɛ̨ kɛ Kili-Mąąhəɠɛɛ háálai, Yálá pɔ pələ.

'Ká kɛ gili-gili gbɔn ɉu yíiɓo pələ hu

⁷ Hɛn gəlee ɲąąkpɛɛi lɔwai aa lɛɠɛ. 'Ká kili mɛ̨nį kɛ, 'ká yee ə pɛli ká koolon ma, káá pɛli Yálá hvɛlii.

⁸ Mɛ̨nį kəlee hu, 'ká ká keeni wɛlilakɛ, mąąhɔlɔɓo, wɛlikɛmąąlaa a nɛ̨ŋɛ̨n damąą mɛ̨i kpulu.

⁹ 'Ká ká yee hee nu kəlee mu a kwəi kwɛlɛ laa, 'ká hvo ɉaa.

¹⁰ 'Ká tí ká kee ɓa, bələi Yálá ə mąą laa tɛɛ la nu tɛitɛi pɔ a gulaa gee mu, 'ká ká keeni mąąkpɔnmąą ɓo tii.

¹¹ Nu ta a kɛli pələ ɓo, ə kɛ a Yálá laa woo laa həli mɛ̨nį; nu ta a kɛli ə́ wɔɔ mąątíi kɛ, gɛ a hvaŋąi Yálá a dɛɛ bɔ, ya ɓə a gɛ, Jesus Kristə háálai, Yálá ə mąąwiɛ laa hɔlɔɓo kpɔ a neelee, yai, mąąwiɛ laa, hee mɛ̨i laa kaa a nwɔɔ a yələ kəlee mɛ̨nį. Yálá ə kɛ ti!

Nwun na nɛ̨ɛ̨i naakwɛlanmoɔ nuąi di kaa di mɔ̨nɔ̨ɓoi diɛ

¹² Nwɛ́likɛmąą nuą, hukɔɔn mɛ̨nį kpɛa-kpɛaa yiiɠaai da həli káá, yii a kɛ ka ɲɛ̨i ɓa yɛ mɛ̨nįi mąą hvo nɛ̨ɛ̨li hvo kɛ, yili hvo ka kwəi pili kaa.

¹³ Kɛlaa yaamun, ká ká kwəinɛ̨ɛ̨, mąąhɔlɔɓo, mɔ̨nɔ̨i ti Kristə ə mįi, ká wɛi ka ti aa həli káá. Yili ɓə a gɛ, ɓɛlɔwai nwɔ mąąwiɛ laa kaa pai tooi la ponoŋą, kaa kpɛlimąn, ká wɔ kwəinɛ̨ɛ̨ laa ə kulɔ.

¹⁴ Ká nwun na nɛ̨ɛ̨i, da kɛli ká laa kala Kristə laa mąą mɛ̨nį ɓa, mąąhɔlɔɓo, mąąwiɛ Kili, a Yálá nwɔ Kilii, gaa ka pɔ.

¹⁵ Gɛ́ ka ta lɔpee hvo mɔ̨nɔ̨ mįi, mąąhɔlɔɓo, aa nu paa, a wala kɛ ti, aa nwuɔ̨ kɛ, awala kɛ ti, mɛ̨nį ɲɔ̨n nɔpee ta mąą mɛ̨nį ɓa, a wala kɛ ti, diɛ kɛ mą: aa naa lɔ nu ta mąą mɛ̨nį hu.

¹⁶ Kɛlaa, aa kɛli mɔ̨nɔ̨ mįi, mąąhɔlɔɓo, gaa a kristalon, hvo nwumɛ̨, yaamun, ə Yálá mąmąɓo. Mąąhɔlɔɓo, naa tii kaa mą.

¹⁷ Yálá nwɔ kitii teei lɔwai aa lɛɠɛ, kɛlaa, gɔwɔ kaa pai tɔɔi Yálá nwɔ pɛlɛ́i ɓa. Yaan, akɛ gɔwɔ kaa tɔɔi guɔi, nuąi di hvo gɛi di hvo laa Yálá nwɔ wɛlɛɛ lɛlɛɛ la, di ɲąąkpɛɛi a kɛ ləi?

¹⁸ Ɛlɛɛ, «Akɛ tələnmomun nwun mąąɓo laa a wala tii, mɛ̨nį ɲɔ̨n gɛmun da nɛ̨ŋɛ̨n ɉəɠəmun di wɛi kɛ pələ a kɛ ləi?»

¹⁹ Yili ɓa, nuąi di kaa mɔ̨nɔ̨ mįi yɛ bələi Yálá liiɓa kaa la, mąąnɛ̨ɛ̨ di di nįį kalihvaɓo hɛn gəlee pɛlimun, a kulɔ nwoo ɓa, mą, a mɛ̨nį lɛlɛɛ kɛɛ.