Piɛrə dɔlɔɔ 3 - Yálá laawoo hɛɓɛ (dc)

Kristalɛa tuwɔ pələ hilɛtai pɛlɛ́ mu

¹ Nɛ̨ąą kaa kpɛlimąn, 'ká lɛɛ ká hilɛni woo mu, ə mą kɛ, daɠaa di hvo gɛi di hvo laa Yálá laawoo la, di di hɔlɔɓo a di nɛ̨ąni di wɔ tuwɔ pələ lɛlɛ laa, hva kɛ a di hvaa woo,

² diɛ ká tuwɔ pələ mąąhəɠɛɛ tii mąąwiɛ.

³ Ká mąąyili hɛnŋaa hvo kɛ lɔ ká kɔlɔ ɓa, yɛ bələi: nwun-naala lɛlɛɛɠaa, hɛni kwɛliɠaa, da mąąyili hɛn yəki-yəkiɠaa;

⁴ kɛlaa, ə kɛ a liinɛ̨ɛ̨ gwəi laai noɔ ká hu pələ, yai a mąąyili hɛn hva kala, a lii lɛlɛɛ, a kpɔwɔ hu hon naa; yili ɓə mɛlɛ kaa mą Yálá ɲɛ̨i ɓa.

⁵ Bələ ɓə wɔlɔ nɛ̨ąą mąąhəɠɛɛɠaai kɛ di kilitɔɔ Yálá ɓa, di kɛli di mąąyili la, a di lɛɛ di hilɛni woo mu.

⁶ Yɛ bələi Sara kaa la, yai kɛ Abrahamə woo mu, ə kɛli lɔ dəli yɛ kɛ mą: nwɔ mɛ̨nį nąmu. Yaa tii ɓə ká káá a nonnii nɛ̨ąą mɛ̨nį lɛlɛɛ kɛɛ hu, 'ká hvo nɛɛlaa, mɛ̨nį ta ŋą ɲɔw hvo ká hupu káá.

⁷ Hinąą kaa kpɛlimąn, 'ká ká nɛ̨ąni ká ɲíi kɛ a nɛlɛɛ, ká kili ə pu ɉu, káá, di kɔlɔ hvįikpɛɛi, 'ká di mąąwiɛ, gbala ə tɔɔ, ká diɛni ká káá pai yɛnɛ̨ɛ̨ hɔlɔɓoi a ká kwɛlin, yili ɓə a gɛ, mɛ̨nį ta hva kpɛ̨ąn ka wɔ hvɛli woo tɔwɔ.

Gbɔn ɉu yíiɓo pələ

⁸ Yili pulu, ká kəlee ka wɔ kiliŋąhiɛ ə kɛ tanɔ̨n, 'ká kwəi mɛ̨nį ə kɛ tanɔ̨n, lee-lon nwɛlikɛmąą laa, ɲɛ̨imąąwɛlikaa da kpɔwɔ mąą yɛɛ laa ə kɛ ka yəi ka keeni mąą mɛ̨nį ɓa.

⁹ 'Ká hvo mɛ̨nį ɲɔ̨n gwələ kulɔ a mɛ̨nį ɲɔ̨n, 'ká hvo lalan gwələ kulɔ a lalan; kɛlaa yaamun, 'ká kɛ a lúwɔ́ too nuą, mąąhɔlɔɓo, yili ɓə di ká təli gɛ mɛ̨nį ɓa, ya ɓə a gɛ, ká lúwɔ́ hɔlɔɓo a ká kwɛlin.

¹⁰ Hvó gaai, moɔi yɛ mą: «Gbɛɛ ɓə lamun yɛnɛ̨ɛ̨ wɛli kaa mą? Ɛlɛɛ, gaa bɔ ə nwunnąnɛ̨ɛ̨ yɛnɛ̨ɛ̨ kaa? Mąąnɛ̨ɛ̨ ə nɛ̨n dɔɔ gani vaa woo tɔwɔ, ə ɲee kɛ naaləi ɓa, ɛlɛɛ, nu ɓowo woo hvo kulɔ na,

¹¹ Ə bulu tɔɔ mɛ̨nį ɲɔ̨n ma, ə mɛ̨nį lɛlɛɛ kɛ, ə vaŋąlɔ ə liilaa kwɛli ɛlɛɛ, ə hvilɛn bulu.

¹² Mąąhɔlɔɓo, gu Ną́mu Yálá ɲɛ̨i kaa tələnmo nuą mɛ̨i, ɛlɛɛ, nwəli tɔɔ di wɔ hvɛli woo ɓa; kɛlaa, gu Nąmu Yálá a ɲɛ̨i ɲɔ̨nwɔ̨ɔ̨ hee mɛ̨nį ɲɔ̨n gɛ nuą diɛ.»

'Ká kilitɔɔmąą laa kɛ mɔ̨nɔ̨ hu

¹³ Ɛlɛɛ, gbɛɛ ɓə a pɛli mɛ̨nį ɲɔ̨n gɛi a káá, akɛ, ká ká hvaŋąlɔ mɛ̨nį lɛlɛɛ kɛɛ ɓa?

¹⁴ Akɛmun, káá kɛli mɔ̨nɔ̨ mįi tələnmolaa mąą mɛ̨nį ɓa, ká nwun na nɛ̨ɛ̨i. 'Ká hvo ɲɔw nui lɔpee ta ɓa, 'ká mąą hvo kpɛlin.

¹⁵ Kɛlaa, 'ká Kristə mąąhəɠə ká nįį hu, yai a gu Nąmu. 'Ká hɛ̨ą ə kɛ lɔ a ɲiliɛ a yələ kəlee, káá pɛli ká wɔɔ kilitɔɔmąą laa hukulɔi nuąi da ka mąąni kɛ diɛ.

¹⁶ Kɛlaa, 'ká gɛ mąąwiɛlaa hu, da liinɛ̨ɛ̨ gwəi laa, əgɛ, nuą daa kɛi ká wɔɔ tuwɔ pələ lɛlɛ laa bələ ɓo Kristə hu, mɛ̨nįi da kɛ ká laa mąą hiɛi ɉu, ká laa mąą hiɛ nuą tii, di nwumɛ̨.

¹⁷ Mąąhɔlɔɓo, akɛ Yálá liiɓa ɓaa, nu ə mɛ̨nį lɛlɛɛ mąą mɔ̨nɔ̨ mįi, yili viɛlaɓoɔi ə tɛɛ mɛ̨nį ɲɔ̨n gɛɛ ɓa.

Kristə ŋą yeetɛɛmąą laa aa too pono ɲą nu kəlee ɲɛ̨i ɓa

¹⁸ Hvó gaai, Kristə kpinįi, yaa tii a tələnmomun, ə mɔ̨nɔ̨ mįi nɛ̨ŋɛ̨nŋaa mąą mɛ̨nį ɓa, lɔ tanɔ̨n gbən, nuąi di hvo tələnmo li, di mąą mɛ̨nį ɓa, ə gɛ, ə ká mąą lɛɠɛ Yálá ɓa, yai di gɔlɔ paa, kɛlaa, Kili-Mąąhəɠɛɛ ə gɛ a vulú.

¹⁹ Yaa tii ɓə li, ə nwɛlɛɛ lɛlɛɛ laa həli nįįɠaai kɛ gaho ŋą diɛ,

²⁰ a diɛi tii wɔlɔ kalapili laa kulɔ a ɲələɠaa tii Yálá ə niilaa la, Noe yɛ gələn bɛli, a yai nu tamąą hvo gɛ hvo lɔ ɉu, nu mɛ̨ihaaɓa lɔ ɓə ə di nwun mąąɓo ɲá yəi.

²¹ Ɲąi tii kaa a mąąwaaɓoi aa ká ɓalo yiihu, gɔɔn mąą, hvo a kɔhɔɓoi ká kɔlɔ ɓa, nwaa hɛn, kɛlaa, yili kaa a nu kpɔwɔ kwɛlɛɛ Yálá ɓa, ə́ kili hu pələ, a ká ɓalo, Jesus Kristə nwun ə mo haa yəi ɉáálai,

²² yai tɛi ə mo yələkɔlɔn ɉu, ə hee Yálá ɓa-mįi-yee hu pələ, a yai, malakaɠaa, hééɓolaa kəlee da hvaŋą laa kəlee kaa ɲee mu.