Zɔ̂ŋ Maa-ŋuŋ 5 - Yálá laawoo hɛɓɛ (dc)

Laa na laai Yálá Lon ɉu, gaa a wɛlikɛmąą laa ɉamu

¹ Nui lɔpee a laa na, yɛ: Jesus ɓə a Kristə, mąą nu kaa a Yálá lon; ɛlɛɛ, nui a Yálá wɛlila kɛ, yai a non gaamun a non tii Yálá ə gaa, nwɛlila kɛ.

² Yili hu ɓə, gwa gbaɠala kɔlɔn na guɔ; Yálá lonnii wɛli kaa guɔ, akɛ, gwa Yálá wɛlila kɛ, guɔ ŋą tíɓoɠaai pɔ yíiɓo.

³ Mąąhɔlɓo, bələi Yálá ŋą wɛlikɛmąąlaa kaa la, bələ ka: Ya ɓaa, gwa gu yee kąnąn nwɔ tíɓoɠaai diɛ. Ɛlɛɛ yaan, ŋą tíɓoɠa tii di hvo a tíɛ̨ wia,

⁴ hvó gaai, nui a Yálá lon, ɲee aa tɛɛ yɛnɛ̨ɛ̨ ɓa. Ɛlɛɛ, yeetɛɛmąą laai yɛnɛ̨ɛ̨ hon, ya ɓə a gu wɔɔ laa na laa.

⁵ Gbɛɛ ɓə ɲee aa tɛɛ yɛnɛ̨ɛ̨ ɓa, akɛ, nui aa laa na yɛ Jesus kaa a Yálá Lon yaa hvəə?

⁶ Yaa Jesus Kristə ɓə pa a yá da ɲąmą, hvo kɛ lɔ a yá yaa tanɔ̨n, kɛlaa, a yá da ɲąmą; ɛlɛɛ, Kili-Mąąhəɠɛɛ ɓə yili mąą kɛla hvaa ɓoi, mąąhɔlɔɓo, Kili kaa a tɛ̨ą.

⁷ Di kaa haaɓa diɛ mɛ̨nįi tii mąą kɛla hvaa ɓo,

⁸ Kili-Mąąhəɠɛɛ, yá, da ɲąmą, ɛlɛɛ, gəlee haaɓai, di woo tɔɔi kaa tanɔ̨n, gɛla hvaa tanɔ̨n tii hu.

⁹ Akɛ gwa laa nuą di wɔ kɛla hvaa la, Yálá nwɔ kɛla hvaa kɛnɛ̨i dɛɛ gəlee ɓa; mąąhɔlɔɓo, Yálá nwɔ kɛla hvaa ka: Yaa kpinii ə non mąą kɛla hvaa ɓo.

¹⁰ Nui a laa Yálá Lon na, gɛla hvaa tii kaa mąą nu kpinį hu. Nui a wala laa Yálá la, aa gɛ a lɛɛmun, mąąhɔlɔɓo, gɛla hvaai ɓo, hvo laa li na, yai Yálá ə mo Non mąą manį hui.

¹¹ Gɛla hvaa tii ka: Yálá aa yɛnɛ̨ɛ̨ hva kpɛɛ tɛɛ gu pɔ, ɛlɛɛ, ɲɛnɛ̨ɛ̨ tii kaa Non ɉu.

¹² Nui Yálá Lon gaa ɲəi, yɛnɛ̨ɛ̨ kaa ɲəi, nui Non və ɲəi, yɛnɛ̨ɛ̨ hvo ɲəi.

Nwoo laa kulɔ

¹³ Ŋą́ mɛ̨nįɠaa tii kɛ a hɛɓɛ́, ŋą́ dɛɛ káá, əgɛ, ká kili ə pu ɉu káá, yɛnɛ̨ɛ̨ hva kpɛɛ kaa ká yəi, a káái kaa laa na laa hɔlɔɓo Yálá Lon naa hu.

¹⁴ Gilitɔɔmąą laai gaa gu yəi, niila ya ka, ya ɓaa: Gwa hɛn da hvɛli mą yaa kpinįi niiɓa hu, a nwəli tɔɔ gu woo ɓa.

¹⁵ Ɛlɛɛ, yii kani, gu kili kaa ɉu guɔ a nwəli tɔɔ gu woo ɓai, gu kili ə pu kan ɉu, guɔ, yii lɔpee gwa vɛli mą, gaa kɛa gu yəi.

¹⁶ Nu ta a nąn non ɲee kaa nɛ̨ŋɛ̨n ɉui, a nɛ̨ŋɛ̨n yii hva nɔ haa hui, ə hvɛliɓo kɛ mą, ɛlɛɛ, Yálá ə yɛnɛ̨ɛ̨ tɛɛ bɔ, Akɛ gaa kpɔ a nɛ̨ŋɛ̨n, nu a ɉəɠə hva nɔ haa hu. Nɛ̨ŋɛ̨n da kaa laa, yɛ nu lɔ haa hu; yili hvəə gáá kɛi mą, di hvɛliɓo kɛ ɉəɠəmun ma;

¹⁷ Túwɔ́ pələ ɲɔn gəlee kaa a nɛ̨ŋɛ̨n, kɛlaa, nɛ̨ŋɛ̨n gəlee hvəə a nu lɔ haa hu.

¹⁸ Gbaɠala kaa guɔ, nui a Yálá lon, hva kɛa nɛ̨ŋɛ̨n ɉəɠə, kɛlaa Yálá ŋą Lon ə gaa, a ɲee kɛ mąą nu ɓa, ɛlɛɛ, Mɛ̨nį-ɲɔ̨n ɲee hva kɛa pɛli mą.

¹⁹ Gu gbaɠala kɔlɔn guɔ Yálá nwɔɔ ɓaa a guɔ, kɛlaa, yɛnɛ̨ɛ̨ nąą kəlee kaa Mɛ̨nį-ɲɔn ɲee kɔnma.

²⁰ Gu gbaɠala kɔlɔn guɔ Yálá Lon ə pa ɛlɛɛ, ə kili tɛɛ gu pɔ, ə gɛ, gu Dɛ̨ą kɔlɔn. Ɛlɛɛ, gu kaa kɛa Dɛ̨ą hu, Non Jesus Kristə hu. Yaa tii ɓə a Dɛ̨ą, yaa ɓə a Yálá, ɛlɛɛ, a yɛnɛ̨ɛ̨i kpɛɛ hvo mą.

²¹ Nónnii pɛlɛɛɠaa, 'ká ká kpɔwɔ mɛ̨i kaa haliɠaa mąą mɛ̨nį ɓa.