Zɔ̂ŋ Maa-ŋuŋ 2 - Yálá laawoo hɛɓɛ (dc)1 Nónii pɛlɛɛɠaa, gáá ɉɛɓɛ́ ŋɛ̨i tɛɛ kaa, ə gɛ, ká hvo nɛ̨ŋɛ̨n ɉəɠə. Kɛlaa, ká ta a nɛ̨ŋɛ̨n ɉəɠəi, gu mąą nɛ̨ɛ̨mąą hvə mun gaa Ną́n Yálá kwɛlɛ, ya ɓaa a Jesus Kristə yai dəlimoɔ. 2 Mąąhɔlɔɓo, yaa tii ɓə gbɔwɔ kulɔ a haláá, ə gu wɔ nɛ̨ŋɛ̨nŋaa waa, ɛlɛɛ, gu wɛiɠaa lɔ hvəə, kɛlaa, ə mą kɛ, yɛnɛ̨ɛ̨ nuą kəlee di wɛi. 'Ká Yálá nwɔ wɛlikɛmąą tɔn pɔ yíiɓo 3 Ɛlɛɛ, yili ɓə gwa gaa la, guɔ, gu gɔlɔn: akɛ gwa nwɔ tíɓoɠaai pɔ yíiɓo. 4 Nui a kɛ mą: ŋą́ gɔlɔn, kɛlaa, hva Yálá nwɔ tíɓoɠaai pɔ mɛ̨nį kɛ, lɛɛmun ni, ɛlɛɛ, tɛ̨ą heei hvo ɉu. 5 Kɛlaa nui a ɲee kąnąn Yálá woo ɓa, a tɛ̨ą, Yálá nwɔ wɛlikɛmąąlaa laa aa kulɔ mąą nu hu, yili hu ɓə gwa gbaɠala kɔlɔn na guɔ, gwa Yálá ni gu kaa ɉu tanɔ̨n. 6 Nui a kɛ diɛ gaa ɉu, hvo kɛli mąą nu a hiɛ a bələi yaa tii a Jesus ə hiɛ la. 7 Nwɛ́likɛmąą nuą, tíɓo nįnɛ̨ hvo gáá dɛɛi káá, kɛlaa, bɔlɔ-pɔlɔ tii lɔ ɓə, yai ká yee kaa mą, ə həɠə gbala tɔɔ yələ ɓa, díɓo pɔlɔi ti ɓaa a, nwoo ká mɛ̨n. 8 Ə mą kɛ tii, gaa a tíɓo nįnɛ̨, yii gaa bɛ̨ɛ̨ gɛ dɛɛ káá, yili kaa a tɛ̨ą, yaa tii ɉu, ə mą kɛ ká hu, mąąhɔlɔɓo, kpini aa tɛɛ, ɛlɛɛ, kɛɛ pono leelee kaa hvələi. 9 Nui a kɛ diɛ, gaa kɛɛ pono hu, kɛlaa, nąn non nwɛli kpɛɛ mą, akɛ tii, mąą nu kaa lɔ ni kpini hu. 10 Nui nąn non nwɛli kaa mą, gaa kɛɛ pono hu, ɛlɛɛ, hɔn da hvo mą, yɛ pɛli dooi. 11 Kɛlaa, nui nąn non nwɛli kpɛɛ mą, gaa kpini hu, yɛ hiɛ kpini mu, hvo nií pələ kɔlɔn; mąąhɔlɔɓo, kpini aa ɲɛ̨i pu. Laa namun ŋą kilitɔɔmąą laa yɛnɛ̨ɛ̨ hu da Kristə ɲowoɠaa di ɲɛ̨i ɓa 12 Nónii pɛlɛɛɠaa, gáá ɉɛɓɛ́ ŋɛ̨i tɛɛ káá, ká wɔɔ nɛ̨ŋɛ̨nŋaa mąąhvaa aa lɛɛ Jesus laa mąą mɛ̨nį ɓa. 13 Nąnni gáá ɉɛɓɛ́ ŋɛ̨i tɛɛi káá, nui wɔlɔ kɛ laa gɛɛ yɛnɛ̨ɛ̨ kɔɔ hvo tɔɔ, ká gɔlɔn. Muhəɠə nįnɛ̨ɠaa, gáá ɉɛɓɛ́ ŋɛ̨i tɛɛi káá, ká yee aa tɛɛ mɛ̨nį ɲɔn nwun nąmu ɓa. 14 Lɛapɛlɛɛ, ŋą́ ɉɛɓɛ́ ŋɛ̨i tɛɛ káá, ká Nąn Yálá kɔlɔn. Ną́nni ŋą́ ɉɛɓɛ́ ŋɛ̨i tɛɛ káá, nui wɔlɔ kɛ laa gɛɛ yɛnɛ̨ɛ̨ kɔɔ hvo tɔɔ, ka gɔlɔn. Muhəɠə nįnɛ̨ɠaa ŋą́ ɉɛɓɛ́ ŋɛ̨i tɛɛ káá, mąąhɔlɔɓo, káá tɔɔ kpąą, ɛlɛɛ Yálá laa woo aa ɉeei kulɔ ká hu, ɛlɛɛ, ká yee aa tɛɛ mɛ̨nį ɲɔn nwun nąmu ɓa. 15 'Ká hvo yɛnɛ̨ɛ̨ wɛlila kɛ, ə mą kɛ, ɉu hɛnŋaa. Nui a yɛnɛ̨ɛ̨ wɛlilakɛ, kɛ tii Nąn Yálá nwɔ wɛlikɛmąąlaa hvo ɉu. 16 Gbala ə tɔɔ, mɛ̨nįɠaai ɲɛnɛ̨ɛ̨ ŋɛ̨i hu diɛ ɓaa: kɔlɔ liiɓa mɛ̨nįɠaa, ɲɛ̨i kɔw nwɛiɠaa ɛlɛɛ, da nu kilitɔɔ mɛ̨nį, ɲəi hɛnŋaa diɛ, a kpɔwɔ ɲąąkɛnɛ̨, di hva həɠə Nąn Yálá pɔ pələ, yɛnɛ̨ɛ̨ ɓɛ mɛ̨nįɠaa li. 17 Yaan, yɛnɛ̨ɛ̨ da ɉu mɛ̨nįɠaa kəlee di kaa pai tɛɛi, kɛlaa, Yálá liiɓa kɛmun nwɛi, gaa laa a yələ kəlee. 18 Nónnii pɛlɛɛɠaa, vóló gbɛlamąą ka. 'Ká mɛ̨n, diɛ kɛ diɛ: Kristə ɲowo kaa pai; Yaan, Yiihu kɛa Kristə ɲowoɠaa tamąą kaa ɓɛ, yili ɓə gwa gbaɠala kɔlɔn na guɔ, vóló gbɛlamąą aa həli. 19 Gu pɔɔli ɓə di kulɔ laa, kɛlaa di hvo kɛli a gu ta. Də li kɛ a gu tai, də li lɛɛ gu pɔ. Kɛlaa, hvo kɛli kɛ di kəlee di too tii pono ɲą, di nɛ kpɔ tii, diɛ di hvo a gu ta. 20 Yii ɓaa ká wɛi, daa ká mąątí, Mąąhəɠəmun ɓə ká mąątí, ɛlɛɛ, ká kəlee ká kili kaa tii ɉu. 21 Və́ hɛɓɛ́ tɛɛ li káá, gɛ́ kɛ diɛ, ká hvo tɛ̨ą kɔlɔn, kɛlaa ká tɛ̨ą kɔlɔn, ɛlɛɛ, hɛn kpɔ a lɛɛ mɛ̨nį, hva kulɔ tɛ̨ą hu. 22 Gbɛɛ ɓə gaa a lɛɛmun akɛ nui a lənə Jesus ŋą Kristə laa ɓa, ya hvəə? Ɓɛ kaa, Kristə ɲowo ɓaa, nui a lənə Ną́n Yálá da Nón diɛ. 23 Nui a lənə Non ma, aa lənə Ną́n yaa kpɛlimąn mą, nui a ɲee hee Non mu aa ɲee hee Nąn yaa kpɛlimąn mu. 24 Ká wɛi, nwɛlɛɛi ká mɛ̨n a gɔwɔ tɔɔ yələ ə ɉeei kulɔ ká hu. Akɛ, ɉeei kulɔ ká hui, nwɛlɛɛ ŋɛ̨i ká mɛ̨n a gɔwɔ tɔɔ yələ, káá kpɛlimąn, ká káá pai, ká heei hɔlɔɓoi Non da Nąn di hu; 25 Ɛlɛɛ, yii yaa kpinįi ə naakwɛlanmo guɔ, ya ɓaa a, yɛnɛ̨nɛ̨i kpɛɛ hvo mą. 26 Yili ŋą hɛɓɛ́ ɓə ŋą́ kɛ bɔ, ŋą́ dɛɛ káá, yɛ hvilɛn na nuą di kaa bɔ di ká lan, di mąą mɛ̨nį ɓa. 27 Ká wɛi, ká mąątíi ŋɛ̨i Ə moi, gaa ká hu, ɛlɛɛ, ə mą kpɛli kɛ, di hvo ká mąąkwɛli yili ɓa; kɛlaa, yɛ bələi nwɔ wulɔi a ká mąąkwɛli la a mɛ̨nį kəlee, ɛlɛɛ, yɛ ɓo a tɛ̨ą, ɛlɛɛ, hva lɛɛ kɛ, yii kani aa ká mąąkwɛlii, 'káán ká kąnąn gani mą. 28 Yili ɓa, nónnii pɛlɛɛɠaa, 'ká ká heei kulɔ kani ɉu, əgɛ, ɓɛlɔwai gaa pai kulɔi la pono ɲą, gu kilitɔɔmąą laa walawala hɔlɔɓo, ɛlɛɛ, ba yələ, gu ɲɛ̨i hvo paa a nwumɛ̨ a gu mąąkwɛai da mo mą. 'Ká tələnmo yíiɓo, ɛlɛɛ 'ká hvo nɛ̨ŋɛ̨n ɉəɠə 29 Yii kani ká gbaɠala kɔlɔn káá ɉaŋąąi, ká kili ə pu kani ɉu káá, nui a mɛ̨nį haŋąą kɛ, yaa kpɛli, a tɛ̨ą lon. |