Korɛntə dɔlɔɔ 1 - Yálá laawoo hɛɓɛ (dc)Túwɔ́-woo 1 Ɲą́ą́ Polə, ə laa a Yálá lii, ə də́li, əgɛ, ŋą́ kɛ a Jesus Kristə ŋą tímun. Kwa gu nąn non Sostɛnə ɓə ɉɛɓɛ́i ŋɛ̨i tɛɛi, 2 gbɔn ɓa, yai gaa Korɛntə daai, da nuąi Yálá aa di mąąhəɠə, Jesus Kristə hu, diɛi di təliɛ di kɛ mɛ̨nį ɓa a nu mąąhəɠɛɛɠaa, ə pɛlɛ la nuąi kpɔ da kɛ gu Nąmu Jesus hvɛlii a naa, ɓɛi lɔpee, yɛ ɓo a di Nąmu da kuɔ kpɛlimąn ku wɔɔ; 3 Kuɔ gu Ną́n Yálá da gu Ną́mu Jesus Kristə di mɛ̨inɛ̨ɛ̨ da liilaa tɛɛ ka pɔ. Mɛ̨ni lɛlɛɛɠaai gwa ɉɔlɔɓo Kristə laa hu 4 Ŋą́ Yálá hɛɠɛɛ ɓo kaa mąą mɛ̨nį ɓa kpɛla pələi hvo mą, mɛ̨inɛ̨ɛ̨i aa gɛ kaa Jesus Kristə hu, mąą mɛ̨nį ɓa. 5 Hvó gaai, Jesus Kristə háálai ɓə, káá yeelahvoloon lɔpee gəlee hɔlɔɓo la, yɛ ə kɛ a woo, yɛ ə kɛ a mɛ̨nį kɔlɔnŋąą kəlee. 6 Nwun maa, Kristə mąą kɛla hvaa ɓo mɛ̨nį aa ɉamu pili ka lɔwai kpɔ kpąą. 7 Yili ɓa tii, Yálá nwɔ mɛ̨inɛ̨ɛ̨ lɔpee ta hvo lɛɛ li pulu ká yəi, a káá ŋɛ̨i ká ɲɛ̨i kaa gu Ną́mu Jesus Kristə pa yələ tɔwɔi. 8 Yaa tii ɓə pai ká huwalawalai, ə lɛɛ ɉu, mɛ̨nį kəlee laa kulɔ yələ ə ɉəli, káá pɛli kɛi a nuąi di mąąkulɔi hvo diɛ, a gu Ną́mu Jesus Kristə nwɔ hvolói. 9 A kulɔ nwoo ɓa, a Yálái ti ká təli, yɛ ka non Jesus Kristə ni ká yee lɔ gii hu, yai a gu Nąmu. Ɓɛlaɓo ə too galan nonnii lɔwai 10 Kɛlaa, ną́n nonni, gáá ka liɛwoo ɓoi gu Ną́mu Jesus Kristə laa hu, gɛ́: Ká woo ə kɛ ɉu tanɔ̨n, ɓɛlaɓo hvo kɛ ká lɔwai. 'Ká yili ka kii ɓa kili tɔ̨nɔ̨ hu kiliŋąhiɛ tanɔ̨n ɉu. 11 Mąąhɔlɔɓo, ną́n nonnii, Kloe yəi bɛlɛ́n nuą di mo mąą diɛ: Woo taɠa kaa ka lɔwai. 12 Yii gɛ́ ŋą́ mo, ya ka: Ka tɛitɛi ka kɛ kɛi diɛ: «Nwɛ́i, kwá Polə ɓə», daɠaa diɛ kɛ: «Nwɛ́i, kwá Apɔlɔsə ɓə», daɠaa diɛ kɛ: «Nwɛ́i, kwá Sefasə ɓə», daɠaa diɛ kɛ: «Nwɛ́i kwá Kristə ɓə.» 13 Akɛti, gaa ka kwəi Kristə ɓəlaɓoɔi ɉu? Polə ɓə mɔ̨ɔ̨ di gbɔn kolɔwa ɓa kaa mɛ̨nį ɓa? Awala kɛ tii, Polə laa hu ɓə di ká mąąwaa la? 14 Yálá mąmą, ya ka tii, və́ nui lɔpee ta mąąwaa li la ka lɔwai, ə kulɔ lɔ Krispusə da Gaiusə; 15 Yili ɓa, nui lɔpee ta hva pɛli kɛi diɛ, náá hu ɓə di mąąwaa la. 16 Oowei, gaa a tɛ̨ą ɲą́ą́ ɓə nwɔ̨nɔ̨ Stefanasə yəi bɛlɛn nuą mąąwaa. Və́ gɔlɔn a kɛ ŋą́ nu takpɛli mąąwaa yiliɠaai pulu. 17 Gbala ə tɔɔ, Kristə hvo kɛ dɔ́ɔ́ li nuą mąąwaa mɛ̨nį ɓa, kɛlaa, nwɛlɛɛ lɛlɛɛ laa həli mɛ̨nį ɓə, və́ naa həli a kilikɛɲəi woo hukulɔ, ə gɛ, Kristə ŋą haai ə mo kolɔwa ɓa hvo pa lɛɛ a kpɛli. Kili-kɛ-ɲəi da ɓow 18 Jesus Kristə haa mɛ̨nį laa həliɛ kaa a ɓowo mɛ̨nį, nwun na pili nuą diɛ, kɛlaa, yiiɠaai di kaa ɓalo pələ mɛ̨i, gu wɛi, gaa a Yálá ŋą huwalawalalaa. 19 Gbala ə tɔɔ, bɛ̨ɛ̨i, diɛ kɛ: «Ŋą́ kilimąą nuą kili kpɛɛ di yəi, ŋą́ nwun gɛ ɉu nuą di wɔ nwun gɛ ɉu laa, hu kala.» 20 Gilimąą mun gaa mį? Dɔ́n galamɔ̨ɔ̨ kaa mį? Yɛnɛ̨ɛ̨ mɛ̨nį ɲąąyɛɠɛmun gaa mį? Yálá hvaa mɔ̨ɔ̨ yɛnɛ̨ɛ̨ ŋą kilikɛɲəi laa kɛ a ɓowo mɛ̨nį? 21 Gbala ə tɔɔ, yɛnɛ̨ɛ̨ ŋą kilikɛɲəi laa hu, hvo kɛ Yálá kɔlɔn ni, Yálá ŋą kilikɛɲəi hu. Hvo gaai, mɛ̨nįi ŋɛ̨i ku kaa naa həli, yɛ ɓo a ɓowo mɛ̨nį nu kanŋaa ɲɛ̨i ɓa, ya ɓə Yálá ə gaa a mɛ̨nį haŋąą, yɛ laa na nuą nwun mąąɓo la. 22 Ɉuifəɠaa di kaa kpalo mɛ̨nį hvɛlii, Grɛkəɠaa diɛ kilikɛɲəi kwɛli; 23 kɛlaa ku wɛi, Ɓalomun di gbanwo kolɔwa ɓa, ya ɓə ku kaa mąą mɛ̨nį laa həlii, yai a nu kɔwɔ tuwɔ kwɛnį Ɉuifəɠaa diɛ, yɛ ɓo a ɓowo mɛ̨nį huwu takpɛliɠaa ɲɛ̨i ɓa. 24 Kɛlaa, diɛi Yálá aa di təli, yɛ ə kɛ a Ɉuifə, yɛ ə kɛ a huwu takpɛli, Kristə kaa di yəi a Yálá nwɔ huwalawalalaa da Yálá ŋą kilikɛɲəi laa. 25 Mąąhɔlɔɓo, yii Yálá ɲɛ̨i ɓa a ɓowo mɛ̨nį, gaa a kilikɛɲəi laa kɛnɛ̨ɛ̨, dɛɛ nu kan ma; ɛlɛɛ, yii Yálá ɲɛ̨i ɓa a hvįikpɛɛlaa, vaŋą kɛnɛ̨ɛ̨ dɛɛ nu kan ma. Gbɛɛ nuą ɓə Yálá ə di təli 26 Ną́n nonnii, káá kpinįi ka ká kpɔwɔ kaa tai, a káái Yálá aa ka təlii: Nuąi di kaa nuą ɲɛ̨i ɓa a kilikɛɲəi nuą, di hvo tamą li ká lɔwai, ə mą kɛ, nu kpɛa-kpɛaa, ɛlɛɛ, laa kɛnɛ̨ nąmįną di hvo tamą li ká lɔwai. 27 Kɛlaa, hɛn a ɓowo mɛ̨nį yɛnɛ̨ɛ̨ nuą ɲɛ̨i ɓa, ya ɓə Yálá ə ɉəɠə, ə kilikɛɲəi nuą ɲɛ̨i paa la, hɛn vįikpɛɛ yɛnɛ̨ɛ̨ ɲɛ̨i ɓa, ya ɓə Yálá ə ɉəɠə ə, huwalawalalaa ɲɛ̨i paa la. 28 Hɛn yɛnɛ̨ɛ̨ dɔlɔ hvo mą, diɛ viiɓo, yii mąn hvo yɛnɛ̨ɛ̨, ya ɓə Yálá ə ɉəɠə, yɛ ɉɛn yɛnɛ̨ɛ̨, vaŋą hukala a diɛ. 29 Ya ɓə a gɛ, Yálá ŋą pɛli hɛn da hva gbɔwɔ ɲąąkɛnɛ̨ la ti Yálá ɲɛ̨i ɓa. 30 Yai ɉáálai ɓə ka káá la Jesus Kristə hu, yai gaa a ku wɔ kilikɛɲəi laai həɠə Yálá pɔ, a təlimolaa, a mąąhəɠəlaa da ɓalo mɛ̨nį, 31 Ya ɓə a gɛ, yɛ bələi ɉɛɓɛ́ ə mo la, yɛ kɛ: «Nui yɛ ə gbɔwɔ ɲąąkɛnɛ̨, ə gbɔwɔ ɲąąkɛnɛ̨ gu Nąmu hu.» |