Kɔlɔnikɔ Maa-ŋuŋ 9 - Yálá laawoo hɛɓɛ (dc)

Ɉerusalɛmə hee ɓo nuą

¹ Di Israɛlə nuą kəlee lonon, di di laa pɛ̨ɛ̨ Israɛlə tɔɔɓɛlaa di wɔɔ hɛɓɛ́i hu. Yii ɓaa Ɉuda nuą di wɛi, di wɔlɔ li a diɛ Babilonə luwɔlaa hu, di wɔɔ woo kala laa mąą mɛ̨nį ɓa.

² Nu dɔlɔɔɠaai hee laa, daaɠaa hu, nąą yɛ ɓo a di wɔɔ, diɛ ɓaa: Israɛlə nuą, ɉaláá laa həli nuą nwun nąmįną, Levi lonnii da nuąi kɛi tíɓo kɛ Yálá hee pɛlɛ́ mu.

³ Ɉerusalɛmə daa kwəi, nuąi kɛ heeni laa, diɛ ɓaa: Ɉuda lonnii taɠaa, Bɛnɉamɛn lonnii taɠaa, Ɛfraimə lonnii taɠaa, da Manase lonnii taɠaa.

⁴ Utai Amihudə lon, Omri lon, Imri lon, Bani lon, Pɛrɛsə huwu hu, Ɉuda lonnii lɔwai.

⁵ Silɔn lonnii lɔwai: Asaya, yai kɛ a non dɔlɔɔ, da nwɔ lonnii;

⁶ Zera lonnii lɔwai: Yeuɛlə; da gaayɔwɔɠaa, di kɛ a nu nwun mɛ̨ida nu pow mɛ̨inąąn.

⁷ Bɛnɉamɛn lonnii lɔwai: Salu, Mesulamə lon, Hodawia lon, Ha-Senua lon;

⁸ Yivneya, Yerohamə lon; Ela, Uzi lon, Mikri lon, da Mesulamə, Sefatia lon, Reuɛlə lon, Yivniya lon.

⁹ Nuą tii kəlee di kɛ a pɛlɛ́ nąmįną, nu kəlee yɛ ɓo nwɔ pɛlɛ́i nwun na. Bɛnɉamɛn huwu hu nuąi pa heei Ɉerusalɛmə daai, di kɛ a nu nwun mɛ̨inąąn nu pow lɔɔli kɔ́w mɛ̨ida.

¹⁰ Ɉaláá laa həli nuą nwun nąmįną lɔwai: Yedaya, Yehoyarivə, Yakin,

¹¹ Azaria, Hilkiya lon, Mesulamə lon, Sadɔkə lon, Merayotə lon, Ahituvə lon, yai kɛ a Yálá nwɔ pɛlɛ́i mɛ̨i kaa nuą nwun nąmu.

¹² Adaya Yerohamə lon, Pasehurə lon, Malkiya lon, da Masai Adiɛlə lon, Yahazera lon, Mesulamə lon, Mesilemitə lon, Imɛrə lon.

¹³ Da di kaayɔwɔɠaa, diɛi kɛ a pɛlɛ́ nąmįną, di kɛ a hinąą walawala, nu waa tɔ̨nɔ̨ pulu nwun mɛ̨ihveelɛ ɲee mɛ̨ida, diɛ di kɛ koló kɛ Yálá nwɔ pɛlɛ́i mu.

¹⁴ Levi nwɔ pɛlɛ́i mu: Semaya Hasuvə lon, Azrikamə lon, Hasavia lon. Merari lonnii lɔwai;

¹⁵ Bakbakarə, Hɛrɛsə, Galalə, da Matania Mika lon, Ɉikri lon, Asafə lon,

¹⁶ Ovadia Semaya lon, Galalə lon, Yedutun lon da, Berekia Asa lon, Ɛlkana lon, diɛi kɛ heeni Netofa nuą di wɔ taaɠaai hu.

¹⁷ Bɛlɛ́ laaləi mɛ̨i kaa nuą lɔwai, Salumə, Akuvə, Talmɔn, Ahiman da di kaayɔwɔɠaa. Salumə ɓə kɛ a di nwun nąmu.

¹⁸ Háá ɓaa háá, diɛi tii di huwu ɓə bɛlɛ́ laaləi pələ. Di kaláɓɔlɔ ɓə wɔlɔ kɛ Levi lonnii di wɔ ɓiwui hu ɉíí la.

¹⁹ Salumə Kore lon, Ɛviasafə lon, Kore lon, da di kaayɔwɔɠaai kɛ a pɛlɛ́ tɔ̨nɔ̨ mu nuą. Kore nuąi tii ɓə kɛ a ɉəɠə pɛlɛ́ gbon galan ɉu mɛ̨ikaa nuą; di nąnni ɓə wɔlɔ kɛ a Yai-Laa ŋą ɓuwui laaləi mɛ̨ikaa nuą.

²⁰ Pinasə, Eleazarə lon, ya ɓə kɛ wɔlɔ a di nwun nąmu; Yai-Laa ə wɔlɔ kɛ bɔ.

²¹ Ɉekaria Meselemia lon, ə kɛ a gee kaa kələ laaləi mɛ̨ikaa mun.

²² Nuąi kpɔ di di həɠə ɉu, di di kɛ a bɛlɛ́ laaləi mɛ̨ikaa nuą, a nu nwundɔ̨nɔ̨ nu pow kɔ́w hveelɛ. Di di laa həɠə di pɔ taaɠaa. Davidə da Samuɛlə ŋɛ̨i kɛ a Yálá kwəi mɛ̨nį hukulɔ mun, diɛ ɓə nuą tii kɛ koló tɛɛ di pɔ a yələ kəlee mɛ̨nį.

²³ Diɛ da di lonnii ɓə kɛi Yai-Laa nwɔ pɛlɛ́i laaləi mąąkpɛ, yai kɛ a ɉəɠə pɛlɛ́.

²⁴ Bɛlɛ́ laaləi mɛ̨ikaa nuą di kɛ nwónwo nąąn gəlee ɓa, ya ɓaa: Voló həɠəi pələ, voló tooi pələ, ɲánwuɔ̨ pələ da ɲákpalaa pələ.

²⁵ Di kaayɔwɔɠaa yiiɠaa tii di kɛ di pɔ taai pələ, di kɛi pa kɛlɛ-kɛlɛ da diɛ ni diɛ hvóló mɛ̨ihveelɛ kɛ.

²⁶ Kɛlaa, nu nąąn ŋɛ̨i kɛ a di nwun nąmįną, di wɛi, di kɛ lɔ laa a yələ kəlee. Levi lonnii ɓə kɛ bɛlɛ́ mɛ̨nįɠaa nwun na, da ɉɛngɔw mɛ̨nį, Yálá nwɔ pɛlɛ́i mu.

²⁷ Diɛi tii ɓə kɛi yii Yálá nwɔ pɛlɛ́i kwɛlɛ, diɛ mąą kpɛ; hvó gaai, diɛ ɓə kɛi humo, diɛ bɛlɛ laa ɓo yələwala pɔ kəlee.

²⁸ Daɠaa diɛn, ɉɛnɲąŋąɠaai di kɛi Yálá kɔ́ ɉu, da kpɛɛ kɛ a kwɛlihvilɛn ŋąą Yálá ɓa, da nonon gulɔi lɔwai, da nɔi lɔwai; di wɔɔ kolói li kɛ.

²⁹ Daɠaa diɛn, ɉɛɲąŋą kpəlii kɛ laa, diɛ ɓə mąą mɛ̨nį ə kɛ diɛ; gəlee mą kɛ, Yálá kɔ́ hɛn ɲąŋąɠaa, bɛlɛɛ lɛɠɛ hunwɔ̨, nɔɔ, nwulɔ, lansan da nwulɔ kun nɛ̨ɛ̨.

³⁰ Kɛlaa, ɉaláá laa həli nuą kpɛa-kpɛa ɓə nwulɔ kun nɛ̨ɛ̨ pɛli mɛ̨nį ə kɛ di nwuɔ̨.

³¹ Kore huwuhu mun ŋɛ̨i kɛ a Salumə, non dɔlɔɔ Matitia, yai gaa a Levi nwɔ pɛlɛ́i mu lon da, ya ɓə kɛ Yálá kɔ́ nwɔ̨mį́i pɛli mɛ̨nį nwun na.

³² Levi lonnii taɠaai kɛ a Kehatə huwu hu nuą, diɛ ɓə kɛi Yálá kɔ́ lɛɠɛ mɔ̨n, yaai di kɛi naa həli a hvįįtɔɔ yələ tɛitɛi kəlee.

³³ Levi lonnii kɛ nwələ too nuą pɔ, diɛ ɓo a pɛlɛ́ nąmįną, di kɛ di wɔɔ pɛlɛ́ɠaai mu, koló takpɛli hvó kɛ diɛ, ə kulɔ lɔ yii kɛ gbɔw laa di nwuɔ̨, diɛ gɛ a hvóló pɛlɛɛ kpįnį ɓa.

³⁴ Levi lonnii kɛ a pɛlɛ́ nąmįną, nwun nąmu laa ə ɓo diɛ həɠə gee pɔ kəlee mɛ̨i, diɛ ka tii. Di kɛ heeni Ɉerusalɛmə daai.

³⁵ Nui Gabaɔn taa tɔɔ, yai a Yeiɛlə, ə kɛ heeni Gabaɔn, nɛ̨ą laa ɓa kɛ a: Maaka.

³⁶ Di lon dɔlɔɔ laa ɓaa: Avdɔn di lonnii yiiɠaa tii ɓa a: Surə, Kisə, Baalə, Nɛrə, Nadavə,

³⁷ Gedɔrə, Ahio, Ɉekaria da Miklotə.

³⁸ Miklotə lon maa: Simea. Diɛ kpɛli di heɛi lɔ kɛ yɛ di kaayɔwɔɠaa Ɉerusalɛmə daai.

³⁹ Nɛrə lon maa: Kisə. Kisə lon maa: Saulə. Saulə lonnii ɓaa: Ɉonatan, Malki-Sua, Avinadavə da Ɛsbaalə.

⁴⁰ Ɉonatan lon maa: Meribaalə. Meribaalə lon maa: Mika.

⁴¹ Mika lonnii ɓaa: Pitɔn, Mɛlɛkə da Tarea.

⁴² Ahazə lon maa: Yaera. Yaera lonnii ɓaa: Alɛmɛtə, Azmawɛtə da Zimri. Zimri lon maa: Mosa.

⁴³ Mosa lon maa: Binea. Binea lon maa: Refaya. Refaya lon maa: Eleasa. Eleasa lon maa: Asɛlə.

⁴⁴ Asɛlə ə lon mɛ̨ida kaa, diɛ ɓaa: Azrikamə, Bɔkru, Yismaɛlə, Searia, Ovadia da Hanan. Diɛi kɛ a Asɛlə lonnii diɛ ka tii.