Lucas 17 - Lalang Hu Dios

Sa Agkahimu Ha Panulay

¹ Inikagiyan hi Jesus sa mga sumusunud din, “Sa panulay ha igpakasalà hu etaw iyan en haena bagad dini ta kalibutan, ba kahid-u gayed taena ha iyan agkahimu ha panulay.

² Maayad pa ngaay ku ihiket en sa lieg din duun hu adagi ha batu daw leneda diyà ta dagat dì sa mahimu haena ha iyan igpakasalà hu duma ha mga etaw.

³ Aman magbantay kaw gayed. “Ku amin nuy duma ha nakasalà baldenga haena na ku maghinulsul pasayluwa nuy.

⁴ Bisan ku kapitu en makasalà duun hu nangkaaldaw ba pasayluwen nuy gihapun ku manayù hu pasaylu.”

Sa Pagtuu

⁵ Uminikagi su mga apustulis, “Ginuu, isabi sa pagtuu day.”

⁶ Ba inikagiyan sidan hi Jesus, “Ku sa pagtuu nuy iling dà kaatiyù hu lisu hu mustasa mahimu en ha suguen nuy hayana sa adagi ha kayu ha humalin diyà ta dagat na makahalin gayed.

Sa Trabahu Hu Suluguen

⁷ “Ku amin etaw ha amin din suluguen ha migdaru daw ku tag-alima ba hu karniru harì mabaluy ha ku makaulì bà dà haena ipakaen hu agalen din.

⁸ Ta saena ikagiyan hu agalen din, ‘Mag-ilis ka daw sugbahi a. Ku makapenga a kumaen human ka daan kaen.’

⁹ Daw saena kenà en kinahanglan ha dayeen pa hu agalen din ta bà dà haena migtuman hu trabahu din.

¹⁰ Iling daan inyu ku mapengahan nuy sa impabuhat hu Dios inyu harì kaw tagpabantug ba henhenaen nuy ha bà kaw dà suluguen hu Dios ha migtuman hu katengdanan nuy.”

Sa Pagbulunga Ku Sampulù Ha Sanglahen

¹¹ Su taghipanaw en si Jesus payanaen diyà ta Jerusalem diyà nakaagi ta dulunà ta mga prubinsya ta Samaria daw ta Galilea.

¹² Su makauma haena duun hu sabuwa ha banuwa sinal-aw hu sampulù ha mga sanglahen, ba migpadiyù dà sidan

¹³ daw nangumaw, “Jesus ha Ginuu, kahid-uwi kay man ikaw.”

¹⁴ Su maahà sidan hi Jesus inikagiyan din sidan, “Dumuun kaw taena ha mga sinaligan hu paghalad ta daw maahà kaw kandan.” Su daw pa sidan tagdiyà nangaulian en sidan.

¹⁵ Sa sabuwa kandan su maahà din ha naulian en luminikù dà diyà ki Jesus daw kuminulahì ha tagdayè hu Dios.

¹⁶ Luminuhud haena duun hu atubangan hi Jesus daw migpasalamat. Saena ha etaw kenà Judio ba taga-Samaria.

¹⁷ Ininsaan haena hi Jesus, “Dì ba sampulù kaw man sa nangaulian? Hindu en diay su siyam ha mga duma nu?

¹⁸ Imbà iyan ka dà sa kenà Judio nakalikù dini hu pagdayè hu Dios?”

¹⁹ Dayun inikagiyan haena hi Jesus, “Hipanaw kad ta sa ingkaulii nu iyan sa pagsalig nu kanak.”

Sa Paglikù Hu Suled Hu Kaet-etawan

²⁰ Amin panahun ha ininsaan hu mga Parisiyu si Jesus ku kan-u agkatuman sa pagharì hu Dios duun hu kaet-etawan. Tuminubag si Jesus, “Sa pagharì hu Dios harì ta agkaahà

²¹ daw harì haena mabaluy ha magyanaen sa mga etaw, ‘Taini en’ daw ‘Diyà en’ ta sa pagharì hu Dios duun dà hu gahinawa hu etaw.”

²² Dayun inikagiyan hi Jesus sa mga tinun-an din, “Makauma sa panahun ha agkabayà kaw gayed ku lumikù a dini siak sa Batà hu Etaw ba harì pa haena matuman.

²³ Amin asem mag-ikagi, ‘Diyà en’ daw ‘Taini dà’ ba harì kaw agsunud kandan.

²⁴ Ta siak sa Batà hu Etaw sa paglikù ku agkailing hu kilat ha pakailaw ta tibuuk ha kalibutan daw agkaahà hu alan ha kaet-etawan.

²⁵ Ba sa harì pa haena makauma amin pa madakel ha mga alantusen ku daw pagtameyesen a hu mga etaw.

²⁶ “Sa paglikù ku asem siak sa Batà hu Etaw mailing hu panahun hi Noe

²⁷ ha sa mga etaw bà dà tagkaenà daw tag-inumà daw namangasawa hangtud en ha sumineled si Noe duun ku arka. Dayun piglenepan sa tibuuk ha kalibutan aman alan sidan nangalemes.

²⁸ “Iling daan hu panahun hi Lot ha sa mga etaw migkaenà daw mig-inumà, namalit daw migbabaligyà, namamula daw migbabalay.

²⁹ Ba su umawà en si Lot diyà ta Sodoma sa alan ha mga etaw nahulugan hu hapuy daw asupri aman namamatay sidan.

³⁰ “Iling taena sa paglikù ku siak sa Batà hu Etaw.

³¹ Duun asem taena ha panahun sa mga etaw diyà ta atep ta balay dan harì en lumugnà hu pagtimù hu mga butang dan, daw sa diyà ta uma harì en daan umulì.

³² Henhenaa nuy sa igbahi hi Lot sa luminingì.

³³ Bisan sin-u sa agkanugun hu kinabuhì din matay dà gihapun, ba saena ha tagsunud kanak bisan duun hu kamatayen mailahan hu kinabuhì ha hurà din katapusan.

³⁴ Ikagiyen ku inyu ha duun asem taena ha panahun ku amin daruwa ha taghumbà matimù sa sabuwa ba sa sabuwa makatabun.

³⁵ Iling daan hu daruwa ha bahi ha tagpanggaling timuen sa sabuwa ba sa sabuwa makatabun.

³⁶ Ku amin daruwa ha maama diyà ta uma sa sabuwa timuen ba sa sabuwa makatabun.”

³⁷ Ininsaan dan si Jesus, “Ginuu, hindu haini agkahitabù?” Tuminubag si Jesus, “Ku hindu duun sa mga minatay duun daan tag-amul-amul sa mga wakwak.”