Juan 10 - Lalang Hu Dios

Sa Maayad Ha Magbalantay Hu Mga Karniru

¹ “Laus gayed sa ag-ikagiyen ku inyu ha sa etaw ku harì duun umagi hu pultahan ku sumeled duun hu alad hu karniru, saena ha etawa takaw.

² Ba sa etaw ha duun tag-agi hu pultahan iyan sa magbalantay hu mga karniru.

³ Saena igpaseled hu bantay hu pultahan daw agpalilimanan hu mga karniru sa lageng din. Umawen din sa mga ngaran taena ha mga karniru daw igpaguwà din sidan.

⁴ Ku humipanaw en sidan diyà ta guwà iyan tag-una sa magbalantay daw sa mga karniru aglupug kandin ta agkakilala dan en sa lageng taena.

⁵ Harì gayed sidan lumupug hu lain ha etaw ta bà dan dà haena agpulaguyi tumenged ta harì dan agkakilala.”

⁶ Iyan haini pananglitan ha inikagi kandan hi Jesus ba hurà dan katun-i ku inu sa kahulugan taena.

⁷ Aman minikagi en paman si Jesus, “Laus gayed sa ag-ikagiyen ku inyu ha iyan a su pultahan hu alad hu mga karniru.

⁸ Amin nauna dì kanak ba mga takaw sidan aman sa mga karniru hurà magpaliliman kandan.

⁹ Iyan a gayed pultahan daw bisan sin-u sa umagi dini ta kanak maluwas gayed. Sumeled daw gumuwà sidan hu pagpanabtab.

¹⁰ Sa takaw agseled duun hu alad ta agpanakaw daw agpangimatay daw agpandaet. Ba siak duminini a ta daw mailahan ku inyu hu kinabuhì ha hurà din katapusan daw hu kinabuhì daan iman ha madagway gayed tungkay.

¹¹ “Iyan a maayad ha magbalantay hu mga karniru. Sa maayad ha magbalantay andam en bisan ku matay tumenged hu mga karniru din.

¹² Sa tagbantay ha bà dà sinuhuli kenà iyan tag-iya hu mga karniru. Aman ku makaahà hu agpamangaen hu mga karniru bà din dà ag-awai haena sa mga karniru. Dayun su agpamangaen hu mga karniru ipagsusuwayà din sidan.

¹³ Saena ha bà dà sinuhuli agpulaguy ta harì din man agkanugunan sa mga karniru.

¹⁴ “Iyan a gayed maayad ha magbalantay hu mga karniru. Nakilala ku sa kanak ha mga karniru daw nakilala a daan kandan

¹⁵ iling ha nakilala a hu Dios ha Amay ku daw nakilala ku daan haena. Andam a daan bisan ku matay a tumenged hu mga karniru ku.

¹⁶ Amin ku pa mga karniru ha hurà pa makaseled duun hu alad. Kinahanglan ha igpaseled ku pa daan sidan. Magpaliliman daan sidan kanak dayun makag-amulà dà sidan daw sabuwa a dà sa magbalantay dan.

¹⁷ Iyan haini igpalanggaa kanak hu Amay ku ta andam a bisan ku matay a tumenged kandan. Ba ku matay a mabanhaw a dà.

¹⁸ Hurà gayed makapatay kanak ba ku matay a kanak en ha pagbayà. Amin ku katenged hu pagpakamatay daw amin ku daan gahem ha mabanhaw a dà ta iyan haini insugù kanak hu Dios ha Amay ku.”

¹⁹ Su mapaliman hu mga Judio sa inikagi hi Jesus hurà makag-iling sa henà-henà dan.

²⁰ Madakel kandan sa tag-ikagi, “Agkalibeg en gayed hayana. Imbà kuy tagpaliliman kandin?”

²¹ Ba sa duma minikagi, “Ku agkalibeg pa hayana harì din ngaay maikagi haena, daw sa agkalibeg harì daan makaulì hu buta.”

Sa Mga Judio Harì Agtuu

²² Panahun haena ha agsaulugen diyà ta Jerusalem sa Paglimpyu hu Timplu. Duun taena ha panahun matinù gayed.

²³ Mighiphipanaw si Jesus duun taena ha Sihungà hi Solomon diyà ta Timplu.

²⁴ Inamul-amulan hu mga Judio daw ikagiyi, “Imbà nu harì ag-ikagiya kanay ku sin-u ka? Ikagiyi kay en ikaw ku iyan kad ba su Misiyas.”

²⁵ Tuminubag si Jesus, “Inikagiyan kud en inyu ba hurà kaw tuu kanak. Sa mga belenganen ha binuhat ku ha insugù hu Dios ha Amay ku iyan migpakilala ku sin-u a

²⁶ ba harì kaw gayed agtuu tumenged ta kenà ku inyu mga karniru.

²⁷ Sa kanak ha karniru tagpaliliman hu lageng ku. Agkakilala ku sidan daw aglupug sidan kanak.

²⁸ Ilahan ku daan sidan hu kinabuhì ha hurà din katapusan daw harì en gayed sidan malaag ta hurà en bisan sin-u ha makaagaw kandan dini ta kanak.

²⁹ Sa Dios ha Amay ku ha iyan mig-ila kanak hu mga karniru iyan gayed labaw hu alan, aman hurà en makaagaw kandan diyà ta kandin.

³⁰ Siak daw sa Amay ku sabuwa kay dà.”

³¹ Su mapaliman haena hu mga Judio nangamul en paman sidan hu mga batu ta agbatuwen dan ngaay.

³² Ba inikagiyan sidan hi Jesus, “Madakel en sa impaahà ku inyu ha mga belenganen ha impabuhat kanak hu Dios ha Amay ku. Inu man sa igbatuwa nuy kanak?”

³³ Tuminubag sidan, “Kenà day iyan igbatuwa ikaw sa mga belenganen ha binuhat nu ba tumenged ta tagtameyesen nu sa Dios, ta imbà ka tag-ikagiyà ha sabuwa kaw dà hu Dios ha etaw ka dà man hu ikaw?”

³⁴ Inikagiyan sidan hi Jesus, “Hurà ba makasulat en duun hu Kasuguan nuy sa lalang hu Dios ha tagyanaen, ‘Iyan kaw mga magbabayà’?

³⁵ Natun-an taw ha harì gayed mahimu ha mabalhin sa insulat ha lalang hu Dios. Ku pigngaranan din sa mga gin-apuan taw ha iyan inilahan hu lalang din ha, ‘mga magbabayà,’

³⁶ imbà nuy agkaikagi ha tagtameyesen ku sa Dios ku ikagiyen ku ha Batà a kandin sa labaw a pa man dì kandan ta pinilì a hu Dios ha impadini ta kalibutan?

³⁷ Harì kaw tumuu kanak ku kenà ku iyan tagbuhaten sa insugù kanak hu Dios ha Amay ku.

³⁸ Ba tumenged ta iyan haena tagbuhaten ku, bisan ku harì kaw tumuu kanak ba tuuwan nuy ngaay sa mga belenganen ta daw matun-an nuy gayed ha sa Dios ha Amay ku dini ta kanak daw diyà a daan ta kandin.”

³⁹ Tumenged taena agdakepen dan en paman ngaay si Jesus ba uminawà haena diyà ta kandan.

⁴⁰ Dayun luminayun si Jesus diyà ta Jordan daw duun migtimà hu lugar ha duun namautismu si Juan su anay.

⁴¹ Madakel sa mga etaw ha duminiyà ki Jesus ta nahenà-henà dan, “Bisan ku hurà belenganen ha nabuhat hi Juan su anay ba sa alan ha inikagi din mahitenged ki Jesus laus gayed.”

⁴² Duun taena ha lugar madakel sa mga etaw ha tuminuu ki Jesus.