Impadayag 6 - Lalang Hu Dios

Sa Haenem Ha Mga Timaan

¹ Tag-ahaen ku su awaen hu Nati ha Karniru sa una ha timaan ku balasahen. Dayun napaliman ku sa sabuwa duun ku haepat ha tinanghagà ha sa lageng din bà su dagsang ha tagyanaen, “Guwà ka duun tayan.”

² Sagunà nakahiwal sa maputì ha kabayu ha sa taglulan duun tagbalabad hu panà. Inilahan daan hu kuruna dayun huminipanaw ta daw madaeg sa mga kuntra din ta iyan haena mandadaeg.

³ Su maawà en hu Nati ha Karniru sa ikaduwa ha timaan taena ha balasahen napaliman ku su ikaduwa ha tinanghagà ha tagyanaen, “Guwà ka duun tayan.”

⁴ Sagunà nakahiwal sa maligà ha kabayu ha sa taglulan duun inilahan hu malayat ha ispada. Intugut kandin ha awaen din sa kalinaw dini ta kalibutan ta daw makagpahimhimatayà sa kaet-etawan.

⁵ Su maawà hu Nati ha Karniru sa ikatulu ha timaan ku balasahen napaliman ku su ikatulu ha tinanghagà ha tagyanaen, “Guwà ka duun tayan.” Sagunà nakahiwal sa maitem ha kabayu ha sa taglulan duun tagbalabad hu timbangan.

⁶ Dayun napaliman ku sa lageng ha duun napuun ku haepat ha tinanghagà ha tagyanaen, “Sa inaldawan hu etaw tatulu ha salmon ha trigu daw ku nangkagantang ba daw tengà ha sibada, ba harì nuy halinen sa bali hu lana hu kayu ha ulibu daw sa bali hu binu.”

⁷ Su maawà en hu Nati ha Karniru sa ikaepat ha timaan taena ha balasahen napaliman ku sa lageng ku ikaepat ha tinanghagà ha tagyanaen, “Guwà ka duun tayan.”

⁸ Sagunà nakahiwal sa kabayu ha mapus-aw ha sa taglulan duun tagngaranan hu Kamatayen daw sa taglupug kandin iyan sa Kamatayan. Inilahan sidan hu kagahem ta daw mahimatayan dan sa ikaepat ha bahin hu kaet-etawan pinaagi hu gira, kauhul, mga dalu ha pakapatay daw hu agpamangagat ha mga kalanggaman.

⁹ Su maawà en hu Nati ha Karniru su ikalima ha timaan taena ha balasahen naahà ku duun hu sileb taena ha halaran sa mga gimukud hu mga etaw ha pinanhimatayan tumenged ta matinumanen sidan hu pagpanunultul hu lalang hu Dios.

¹⁰ Minikagi sidan hu madaging, “Dios ha gamhanan Magbabayà hu alan sa balaan daw agkasaligan, kan-u nu pa diay agsiluti su mga etaw ha mighimatay kanay?”

¹¹ Dayun sa kada sabuwa kandan inilahan hu maputì ha pinaksuy daw inikagiyan ha mag-angat enà sidan hangtud ha mapatay en haena sa mga suluguen hu Dios ha aghimatayan daw makaamul daan kandan.

¹² Tag-ahaen ku su awaen taena ha Nati ha Karniru sa ikaenem ha timaan ku balasahen. Sagunà miglinug hu tungkay makeseg daw suminukilem sa aldaw, migligà sa bulan iling hu langesa

¹³ daw nangahulug daan sa mga bituen diyà ta bugtà iling taena ha mga bunga hu igira ha agkangapudu ku agkalamagen hu tungkay makeseg.

¹⁴ Sa langit tigkan nahanaw iling hu balasahen ha piglulun sa alan ha bubungan daw sa mga pulù diyà ta dagat nangakahalin.

¹⁵ Dayun sa mga harì, sa mga agalen, sa mga kapitan hu mga kasundaluwan, sa mga sapian, sa mga mabis-ay ha mga etaw, sa mga ulipen daw sa bisan sin-u namanheles duun hu mga liyang daw duun hu mga adagi ha batu diyà ta bubungan.

¹⁶ Inumaw dan haena sa mga bubungan daw su mga batu ha kagi dan, “Kalunawi kay en ta daw harì kay maahà taena ha tagpinuu duun hu trunu diyà ta langit daw harì daan makauma dini ta kanay sa kapauk hu Nati ha Karniru,

¹⁷ ta sa panahun ha pinakahaluhaldek nakauma en ha masilutan sa kaet-etawan daw hurà en gayed makapulaguy duun.”