Filemon 1 - Lalang Hu Dios

¹ Iyan a si Pablo ha naprisu tumenged hu pagsangyaw mahitenged ki Cristo Jesus sa migsulat taini duma ki Timoteo sa suled taw hu pagtuu. Sinulatan day ikaw, Filemon sa pinalanggà ha bulig day duun hu buluhaten hu Dios

² daw si Apia ha suled taw ha bahi duun hu pagtuu, si Arquipo duma day daan ha sundalu hi Cristo Jesus daw sa mga tumutuu ha tag-amul-amul hu pagsimba diyan ta balay nu.

³ Sa Dios ha Amay taw daw si Cristo Jesus ha Ginuu mag-ila inyu hu grasya daw kalinaw.

Sa Pagtuu Daw Sa Pagpalanggà Hi Filemon

⁴ Sigi ku tagpasalamatan sa Dios ku agkahenà-henà ku ikaw duun hu pag-ampù ku

⁵ ta napaliman ku ha adagi gayed sa pagsalig nu ki Cristo Jesus ha Ginuu daw tagpalanggaen nu daan sa alan ha mga tumutuu.

⁶ Iyan iman tig-ampù ku ha maniguru ka hu pagpanunultul hu pagtuu nu ta daw masabut taw gayed sa alan ha mga panalangin tumenged hu pagpakigsabuwa taw diyà ki Cristo.

⁷ Suled ku, adagi gayed sa kalipay ku daw nakadasig daan kanak su mapaliman ku sa pagpalanggà nu hu alan ha mga etaw hu Dios diyan daw sa pagdasig nu kandan.

Sa Hangyù Hi Pablo Mahitenged Ki Onesimo

⁸ Tumenged hu katenged ha in-ila kanak hi Cristo mahimu ku gayed sa pagsugù ikaw hu agkabayaan ku ha buhaten nu.

⁹ Ba tumenged ta palanggà ku ikaw, bà ku dà ikaw aghangyua bisan pa ku laas ad en daw prisu a iman tumenged hu pagtuu ku ki Cristo Jesus.

¹⁰ Sa ighangyù ku ikaw iyan sa mahitenged hu ulipen nu ha si Onesimo sa batà ku daan duun hu pagtuu tumenged ta nakatuu daan pinaagi hu pagtudlù ku kandin dini ta prisuhan.

¹¹ Su anay hurà nu pulus ki Onesimo ba iman mapuslanen en gayed ikaw daw kanak.

¹² Igpaulì ku iman si Onesimo diyan ta ikaw bisan en ku agkabulung a pa ngaay kandin.

¹³ Agkabayà a ngaay ha dini dà magtimà ta daw iyan makabulig kanak ilis ikaw iman ha dini a pa naprisu tumenged hu pagsangyaw ku hu Maayad ha Tultulanen.

¹⁴ Ba harì ku haini aghawidan dini ku harì ka magtugut ta daw sa bulig nu kanak kenà pineges.

¹⁵ Kan ku sa hinengdan ha nakaawà si Onesimo diyan ta ikaw hu mababà ha panahun ta iyan sa ku makalikù diyan ta ikaw harì kaw en makagsuwayà.

¹⁶ Iman saini kenà nud en ulipen ba nabuhat en ha suled nu duun hu pagtuu. Saini palanggà ku tungkay ba ayuwà nu pa gayed palangga ta ulipen nu daw suled nu pa gayed duun hu pagtuu hu Ginuu.

¹⁷ Aman ku isipen nu ha migsuled ki duun hu pagtuu dawata nu gayed si Onesimo iling hu pagdawat nu kanak.

¹⁸ Ku amin din salà daw ku utang ba diyan ta ikaw isipen nu ha kanak en haena ha utang

¹⁹ ta iyan a si Pablo sa migsulat taini ha magbayad hu mga utang din diyan ta ikaw. Ba henhenaa nu daan ha nakautang ka dini ta kanak ta pinaagi kanak amin nu kinabuhì ha hurà din katapusan.

²⁰ Aman buhata nu haena tumenged hu pagtuu ta hu Ginuu ta daw madasig a duun hu pagkasabuwa ta diyà ki Cristo.

²¹ Tagsiguruwen ku gayed ha magpaliliman ka kanak daw natun-an ku daan ha buhaten nu sa labaw pa dì hu hinangyù ku diyan ta ikaw.

²² Iman amin pa aghangyuen ku ha taganahi a diyan hu aghidegaan ku, ta tumenged hu pag-ampù nu ima ku ha makaguwà a dini ta prisuhan daw makadiyan a daan ta ikaw.

²³ Agpangamusta ikaw si Epafras sa duma ku ha naprisu daan tumenged hu pagtuu din ki Cristo Jesus.

²⁴ Daw agpangamusta daan ikaw si Marcos, si Aristarco, si Demas daw si Lucas ha iyan bulig ku duun hu buluhaten hu Dios.

²⁵ Panalanginan ka gayed hi Cristo Jesus ha Ginuu.