1 Corinto 1 - Lalang Hu Dios

¹ Iyan a si Pablo sa pinilì hu Dios ha apustul hi Cristo Jesus sa migsulat taini duma ki Sostenes sa suled taw duun hu pagtuu.

² Sinulatan day inyu sa tagkaamul-amul ha mga tumutuu diyan ta Corinto ha mga etaw hu Dios pinaagi hu pakigsabuwa nuy ki Cristo Jesus daw duma hu alan ha mga etaw bisan hindu ha tagsimba daan hu Ginuu taw.

³ Sa Dios ha Amay taw daw si Cristo Jesus ha Ginuu mag-ila inyu hu grasya daw kalinaw.

Sa Panalangin Pinaagi Ki Cristo Jesus

⁴ Sigi a tagpasalamat duun hu Dios mahitenged inyu tumenged hu grasya din inyu pinaagi ki Cristo Jesus

⁵ ta tumenged hu pakigsabuwa nuy ki Cristo Jesus pigpanalanginan kaw gayed labi en hu kaalam daw katatau hu pagtudlù.

⁶ Tumenged ta nanggamut diyan ta inyu sa intudlù day mahitenged ki Cristo

⁷ hurà kaw kakulangi hu bisan inu ha katatau ha in-ila hu Balaan ha Ispiritu iman ha tag-angatan nuy sa paglikù hi Cristo Jesus ha Ginuu taw.

⁸ Lig-enan din sa pagtuu nuy hangtud hu katapusan hu panahun ta daw hurà en ikasaway inyu ku lumikù si Cristo Jesus ha Ginuu taw.

⁹ Kasaligan gayed sa Dios ha iyan mighimu inyu ha tumutuu ta daw amin nuy pagdapità hu Batà din ha si Cristo Jesus ha Ginuu taw.

Sa Pagsawalà Hu Mga Tumutuu

¹⁰ Mga suled, pinaagi hu ngaran hi Cristo Jesus ha Ginuu taw aghangyuen ku inyu ha mag-uyunà kaw gayed ta daw harì kaw mabahin-bahin ba magsabuwa kaw gayed hu henà-henà nuy daw hu mga tuyù nuy.

¹¹ Ta intultul dini ta kanak hu duma duun hu pamilya hi Cloe ha tagsawalà kaw.

¹² Sa duma inyu tag-ikagi ha sumusunud hi Pablo daw sa duma na ki Apollo, amin daan tag-ikagi ha sumusunud hi Pedro daw sa duma na ki Cristo.

¹³ Mabaluy ba diay ha bahin-bahinen si Cristo? Iyan a ba diay si Pablo inlansang duun hu krus ta daw maluwas kaw? Kanak ba diay ha ngaran sa imbautismu inyu? Kenà gayed.

¹⁴ Tagpasalamat a gayed ta daruwa dà sa nabautismuwan ku diyan ta inyu ha iyan si Crispo daw si Gayo

¹⁵ ta daw hurà inyu makaikagi ha nabautismuwan pinaagi hu ngaran ku.

¹⁶ Amin pa diay daan nabautismuwan ku diyan ha iyan sa pamilya hi Estefanas, ba hurà kud en agkahenhenaan ha duma pa.

¹⁷ Ta hurà a sugua hi Cristo hu pagbautismu ba sa insugua din kanak iyan sa pagsangyaw hu Maayad ha Tultulanen. Daw sa pagsangyaw ku kenà pinaagi hu kanak ha kaalam daw hu katatau ku hu pag-ikagi, ta ku mabenalan sa mga etaw pinaagi taena kenà dan en iyan igkabenali sa kamatuuran mahitenged hu kamatayen hi Cristo duun hu krus.

Sa Gahem Daw Sa Kaalam Hu Dios

¹⁸ Sa tultulanen mahitenged hu kamatayen hi Cristo Jesus duun hu krus ag-isipen hu mga etaw ha tagkangalaag ha bà dà binuang, ba sikuy sa nangaluwas kamatuuran gayed haini ha migpadayag hu gahem hu Dios.

¹⁹ Ta sa insulat ha lalang hu Dios tagyanaen, “Daeten ku sa katatau hu etaw daw buhaten ku ha hurà pulus hu kaalam taena ha nakatunghà.”

²⁰ Inu man sa pulus taena ha mga matatau daw taena ha mga manunudlù daw ku mga matatau hu pagsawalà? Hurà ba diay ipadayag en kanuy hu Dios ha sa kaalam hu etaw binuang dà?

²¹ Tinuyù hu Dios ha sa etaw harì makakilala kandin pinaagi hu kalibutanen dà ha kaalam, ta sa paagi din maluwas sa etaw ku agtuu taini ha tigsangyaw taw ha ag-isipen hu harì agtuu ha bà dà binuang.

²² Sa tagpan-ahaen hu mga Judio iyan sa mga belenganen ha timaan hu gahem hu Dios daw iyan tagsaligan hu mga Griego sa kaalam dan.

²³ Ba sa tigsangyaw day iyan si Cristo sa inlansang duun hu krus, saena agtambagan hu mga Judio daw ag-isipen daan haena hu kenà mga Judio ha bà dà binuang.

²⁴ Ba sa hinimu hu Dios ha tumutuu mga Judio man daw sa kenà, natun-an dan ha pinaagi ki Cristo impadayag hu Dios sa gahem daw sa kaalam din.

²⁵ Ta sa kaalam hu Dios ha ag-isipen hu mga etaw ha binuang dà, saena labaw pa gayed hu kinatangkawan ha katatau hu etaw. Daw sa ag-isipen ha kaluyahen hu Dios, saena mabis-ay pa gayed dì hu kinabis-ayan ha etaw.

²⁶ Mga suled, henhenaa nuy ku inu kaw su makatuu kaw. Pipila dà inyu sa matatau gayed daw amin din katengdanan daw mga tinahud ha etaw.

²⁷ Ba saena ha ag-isipen hu mga etaw ha hurà din kaalam pinilì hu Dios ta daw mapagagayhaan haena sa ag-isipen ha matatau ha etaw. Daw pinilì din daan haena sa kagi hu mga etaw ha kenà angayan ta daw magayhaan su agkasaligan dan.

²⁸ Pinilì hu Dios sa agkaamaniyan daw sa agtameyesen hu mga etaw daw pinilì din daan sa ag-isipen hu mga etaw ha hurà din pulus ta daw saena ha tag-isipen ha matangkaw iyan man diay hurà din pulus.

²⁹ Binuhat din haena ta daw hurà etaw ha makagpagalbu duun hu atubangan hu Dios.

³⁰ Iman pinaagi hu Dios nasabuwa kuy ki Cristo Jesus, aman tumenged kandin amin taw kaalam daw inisip kuy hu Dios ha matareng daw mahimpit ha mga etaw din ha nalibri duun hu mga salà taw.

³¹ Aman laus gayed sa insulat ha lalang hu Dios ha tagyanaen, “Ku amin magpasigalbu kinahanglan ha iyan din ipasigalbu sa binuhat hu Ginuu.”