Masmur 1 - Bup Kudus

BUP SATU ( Masmur 1—41 ) Pengelantang Ti Bendar

¹ Beberekat meh orang ti enda nitihka penemu orang ke jai, lalu enda nitihka teladan orang ke bedosa ti enda begulai enggau orang ke ngeleseka Allah Taala,

² tang gaga ati ke Adat TUHAN, lalu belematika Adat nya siang malam.

³ Orang nya baka kayu ti ditanam ba tebing sungai, ti bebuah ninting musin lalu daun iya nadai kala layu. Iya mujur dalam semua utai ti dikereja iya.

⁴ Tang orang ke jai enda baka nya. Iya baka rumput ti rangkai ti dikebuka ribut.

⁵ Nya alai orang ke jai deka diukum Allah Taala lebuh sida diakim, lalu orang ke bedosa deka diseraraka ari orang ke lurus;

⁶ laban TUHAN deka ngintu orang ke lurus, tang jalai pengidup orang ke jai deka dirusak.