Mark 16 - Bup Kudus

Pengangkat Ari Mati

¹ Udah bekau hari Sabat, Maria Magdalin, Maria indai James, enggau Salomi lalu meli rempah, ngambika sida ulih nata bangkai Jesus.

² Tumu pagi hari Minggu, lebuh mata panas udah tumbuh, sida mansang ngagai kubur.

³ Sida udah berandau enggau pangan diri, “Sapa deka maringka batu nya ke kitai ari mua kubur nya?”

⁴ Lebuh sida malik, sida meda batu nya endang udah dibaringka ari mua kubur nya. Batu nya besai amat.

⁵ Lebuh sida tama ngagai kubur, sida meda siku orang bujang ke ngena baju panjai ti burak, duduk muak ari kanan. Sida lalu takut.

⁶ Tang ku iya bejaku ngagai sida, “Anang takut. Kita ngiga Jesus orang Nasaret, ke udah diregang. Iya udah diangkatka idup baru. Iya nadai ditu. Peda kita endur alai sida udah ngalika Iya.

⁷ Tang mupuk kita, lalu padahka ngagai sida murid Iya, enggau ngagai Peter, Iya mupuk dulu ari kita ngagai Galili. Din kita deka meda Iya, munyi ti udah dipadahka Iya ngagai kita.”

⁸ Nya alai sida pansut lalu rari ari kubur, laban sida balat takut sereta balat alit ati, lalu sida nadai madahka utai nya ngagai orang, laban sida takut.

Jesus Pegari Ngagai Maria Magdalin

⁹ Tumu pagi hari Minggu lebuh Jesus udah angkat ari mati, Iya pegari terubah ngagai Maria Magdalin, ke udah alai Iya muru tujuh iku antu. Sida indu mansang ngagai Peter enggau bala pangan iya lalu nusui pasal utai ti udah dipadahka ngagai sida.

¹⁰ Maria Magdalin mansang lalu madah ngagai orang ke udah begulai enggau Jesus, ke benung ngulit sereta nyabak. Udah nya Jesus Empu ngirumka, ngena sida murid Iya, kenyau ari timur nyentuk ke barat, pesan ti kudus sereta idup belama iya pasal pengelepas ti meruan belama iya.]

¹¹ Tang lebuh sida ninga Jesus udah idup baru, lalu Maria Magdalin udah meda Iya, sida enda arapka nya.

Jesus Pegari Ngagai Dua Iku Orang Ke Arap

¹² Udah nya Iya pegari ngena chara bukai ngagai dua iku orang ari bala sida, lebuh seduai iya benung di rantau jalai mansang ngagai menua pesisir.

¹³ Seduai iya lalu nikal, lalu madah ngagai sida ti bukai. Tang sida enda arapka seduai iya.

Jesus Ngasuh Sida Murid Nusui Berita Manah

¹⁴ Udah nya Iya pegari ngagai murid ke sebelas iku, lebuh sida benung makai, lalu Iya nganu sida laban sida enda arap sereta kieh, laban sida enda arapka orang ke udah meda Iya, udah bekau Iya ke angkat idup baru.

¹⁵ Lalu ku Iya bejaku ngagai sida, “Bejalai kita ngagai serata dunya, lalu tusui Berita Manah ngagai semua mensia.

¹⁶ Orang ke arap lalu dibaptisa, deka diselamatka, tang orang ke enda arap deka diukum.

¹⁷ Lalu tu tanda ti deka nyempulang orang ke arap: sida deka muru antu dalam nama Aku; sida deka bejaku ngena jaku ti nyelai.

¹⁸ Enti sida tepegaika ular, tauka teirupka rachun, utai nya enda ngemediska sida; sida deka ngengkahka jari sida ba orang ke sakit, lalu orang nya deka gerai.”

Jesus Niki Ke Serega

¹⁹ Lebuh Tuhan Jesus udah bejaku ngagai sida, Iya lalu dibai niki ke serega, lalu duduk muak ari kanan Allah Taala.

²⁰ Sida murid bejalai lalu nusui Berita Manah di semua endur, lalu Tuhan bekereja enggau sida lalu netapka pengamat pesan Iya ngena kereja ajih ti nyempulang pesan nya. [