Jeremiah 1 - Bup Kudus

¹ Bup tu nusui jaku Jeremiah anak Hilkiah, siku imam ari nengeri Anatot di menua Benjamin.

² TUHAN bejaku ngagai Jeremiah dalam taun ti ketiga belas Josiah anak Amon nyadi raja menua Judah,

³ lalu TUHAN bejaku baru ngagai Jeremiah lebuh anak Josiah ke benama Jehoiakim nyadi raja. Udah bekau nya, TUHAN suah mega bejaku ngagai iya, nyentuk ngagai taun ti kesebelas Sedekiah anak Josiah nyadi raja. Dalam bulan ti kelima taun nya, orang Jerusalem dibuai ngagai menua bukai.

Jeremiah Dikangauka

⁴ Ku TUHAN bejaku ngagai aku,

⁵ “Sebedau Aku nempa nuan dalam kandung indai nuan, Aku endang udah ngelala nuan, lalu sebedau nuan ada, Aku endang udah milih nuan; Aku endang udah ngeletak nuan nyadi nabi ke semua bansa.”

⁶ Aku lalu nyaut, “TUHAN ti Pemadu Tinggi, aku enda lanchar bejaku, laban aku agi nembiak.”

⁷ Tang ku TUHAN bejaku ngagai aku, “Anang ngumbai diri agi nembiak, tang mansang nuan ngagai orang ke diasuh Aku gusung nuan, lalu padahka ngagai sida semua utai ti diasuh Aku sebut nuan.

⁸ Anang takutka sida, laban Aku bisi enggau nuan lalu nyaga nuan. Aku ti TUHAN, udah bejaku!”

⁹ Udah nya TUHAN ngunjurka jari Iya, negu mulut aku, lalu bejaku ngagai aku, “Dinga nuan, Aku diatu udah nyimpan leka jaku Aku dalam nyawa nuan.

¹⁰ Sehari tu Aku meri nuan kuasa atas semua bansa enggau perintah, kuasa kena nebang enggau numbang, kena ngeruntuh enggau ngerubuh, kena niri enggau negi.”

Dua Bengkah Genera

¹¹ Ku TUHAN nanya aku, “Jeremiah, nama utai dipeda nuan?” Aku lalu nyaut, “Siti dan kayu almond.”

¹² Lalu ku TUHAN bejaku ngagai aku, “Betul, laban Aku ngemataka leka jaku Aku, deka nentuka jaku nya dikamatka.”

¹³ Udah nya TUHAN bejaku baru enggau aku, “Nama utai bukai dipeda nuan?” ku Iya nanya. Lalu ku aku nyaut, “Aku meda sigi periuk melidih, ti singit ari utara.”

¹⁴ Ku TUHAN bejaku ngagai aku, “Pengerusak deka mangka ari utara ngagai semua orang ke diau di menua tu,

¹⁵ laban Aku mesanka semua bansa ti di utara datai kitu. Bala raja sida deka nudukka kerusi diraja sida ba mua pintu kuta Jerusalem, enggau ngelingi kuta nengeri tu, enggau ngelingi nengeri bukai di menua Judah.

¹⁶ Aku deka ngukum nembiak Aku laban sida udah bedosa. Sida udah ninggalka Aku, udah ngenjuk piring ngagai petara bukai, lalu udah nyembah engkeramba ti digaga sida.

¹⁷ Besedia nuan, Jeremiah. Mupuk nuan lalu padahka ngagai sida semua utai ti diasuh Aku sebut nuan. Anang takutka sida, enggai ke Aku ngasuh nuan lebih balat agi takut lebuh nuan begulai enggau sida.

¹⁸ Dinga nuan, Jeremiah! Sehari tu Aku ngaga nuan nyadi nengeri ti bekuta, nyadi tiang besi, nyadi dinding temaga, ngelaban semua menua tu, ngelaban bala raja menua Judah, bala anak raja iya, bala imam iya, enggau ngelaban orang di menua tu.

¹⁹ Sida deka ngelaban nuan; tang sida enda ulih ngalahka nuan, laban Aku bisi enggau nuan, lalu ngelepaska nuan, ku TUHAN bejaku.”