Hagai 1 - Bup Kudus

TUHAN Ngasuh Orang Ngaga Rumah Sembiang Baru

¹ Kena satu hari bulan ti keenam, kedua taun Darius nyadi raja besai menua Persia, TUHAN bejaku ngena nabi Hagai. Pesan nya diberi ngagai tuan gabenor menua Judah, Serubabel anak Sealtiel, enggau ngagai Imam Besai Josua anak Jehosadak.

² Ku TUHAN ti Pemadu Bekuasa bejaku ngagai Hagai, “Orang tu ngumbai tu ukai maya ti ngena alai ngaga Rumah Sembiang baru.”

³ TUHAN lalu bejaku ngena nabi Hagai ngagai orang mayuh, ku Iya:

⁴ “Nembiak Aku, nama kebuah kita diau dalam rumah ti manah, tang nejuka Rumah Aku tembawai?

⁵ Kati kita enda meda utai ti nyadi ba kita diatu?

⁶ Utai ti ditanam kita amat mayuh, tang kita enda bulih ngetau. Kita makai, tang pemakai kita enda kala chukup. Kita ngirup, tang kita enda kala chukup utai diirup! Kita ngena gari, tang kita agi tekangkang chelap. Kita bekereja ngulihka gaji, tang kita nyimpan gaji nya dalam kambut ti pesuk.

⁷ Kati kita enda nemu kebuah utai tu nyadi?

⁸ Alai kita mansang ngagai bukit, beramu, lalu gaga baru Rumah Sembiang. Nya baru Aku deka gaga ati, lalu disembah nitihka chara Aku patut disembah.

⁹ “Kita ngarapka diri bulih mayuh utai, tang kita bulih ka semina mimit aja. Lalu lebuh kita mai utai nya ke rumah, Aku ngebuka utai nya kebukai. Nama kebuah? Laban Rumah Aku agi tembawai, tang kita kiruh begagaka rumah ke diri empu.

¹⁰ Nya kebuah hari enda ujan, lalu utai enda tumbuh.

¹¹ Lalu Aku udah ngasuh kemarau nyadi di menua tu, ba sebelah bukit, ba umai gandum, ba kebun anggur enggau ba kebun buah kana, ba semua utai ti tumbuh, ba mensia enggau jelu, enggau ba semua pengawa ti dikereja kita.”

Orang Mayuh Ngasika Pesan TUHAN

¹² Udah nya Serubabel seduai Josua enggau semua orang mayuh ti udah pulai ari menua Babilon, ngereja utai ti diasuh TUHAN Allah Taala sida. Sida nangika TUHAN lalu ngasika nabi Hagai, ti nyadi seruan TUHAN.

¹³ Udah nya Hagai meri pesan TUHAN ngagai orang mayuh: “Aku deka meruan enggau kita - nya meh semaya Aku.”

¹⁴ TUHAN lalu ngerak ati semua orang ngasuh sida bekereja ngaga Rumah Sembiang: Serubabel ti nyadi tuan gabenor menua Judah, Josua ti nyadi Imam Besai, enggau semua orang mayuh ti udah pulai ari menua Babilon. Sida belabuh gawa ngaga Rumah TUHAN ti Pemadu Bekuasa ti Allah Taala sida

¹⁵ kena dua puluh empat hari bulan ti keenam, kedua taun Darius nyadi raja.