Tito 3 - BIBULIYA ENTUKUVU

¹ Bajjukize okugondera abaami n'abali mu buyinza, okuba abawulize, abeetegefu okukola buli kirungi,

² nga tebawaayiriza, tebayombayomba, bateefu, ab'eggonjebwa eri buli muntu.

³ Olumu naffe twali basiru, nga tetuwulira, nga tuwubisiddwa, nga tufuuse baddu ba bika ebitali bimu ebya maddu n'amasanyu; mu bulamu bwaffe nga tuli ba kitimatima na buggya; nga tukyayiddwa ate naffe nga tukyawaganye;

⁴ naye ekisa n'okwagala kwa Katonda Mukama waffe bwe byalabika,

⁵ n'atulokola, si lwa kubeera bikolwa byaffe bye twali tukoze eby'obutuukirivu, naye lwa kubeera kisa kye, ng'ayita mu kunaazibwa okw'okuzaalibwa ogwokubiri n'okuzzibwa obuggya mu Mwoyo Mutuukirivu,

⁶ gwe yatuyiira mu bungi ng'ayita mu Yezu Kristu Mulokozi waffe;

⁷ eneema ye ng'emaze okutufuula abatuukirivu, tulyoke tufuuke basika abalina essuubi ery'obulamu obutaggwaawo.

⁸ Ekyogerwa kino kya mazima. Njagala bino obikkaatirize, abo abakkirizza Katonda bafeeyo ku kukola ebikolwa ebirungi; ebintu ebyo birungi era biyamba abantu.

⁹ Naye weewale endasano ez'ekisiru, n'okunonooza endyo, okuyomba n'okukaayana ku Tteeka, kubanga bino tebiganyula era temuli kantu.

¹⁰ Omuntu aleeta enjawukana ng'omaze okumulabula ogusooka n'ogwokubiri, mulekere ddala.

¹¹ Manya nti ow'engeri eyo mukyamu era mwonoonyi, yeesalidde yekka omusango.

Okufundikira n'okutuma

¹² Nga mmaze okukusindikira Aritema oba Tukiko, sala gonna onsisinkane e Nikopoli, kubanga nsazeewo obudde obw'obutiti okubumala eyo.

¹³ Fuba nnyo okuyamba Zena munnamateeka ne Apollo mu lugendo lwabwe, era laba nga tebajula kantu.

¹⁴ Abantu baffe balina okuyiga okukola emirimo emirungi, basobole okudduukirira mu bwetaavu obwa mangu, baleme kubeera ntagasa.

¹⁵ Bonna be ndi nabo eno bakutumidde. Ndabira abo abatwagala mu kukkiriza. Eneema ebeere nammwe mwenna.