Okuva 1 - BIBULIYA ENTUKUVU

I. OKUNUNULIBWA MU MISIRI A. ABAYISIRAYELI MU MISIRI Abeebureeyi baala mu Misiri

¹ Gano ge mannya ga batabani ba Yisirayeli abaagenda ne Yakobo mu Misiri, buli omu n'amaka ge.

² Rubeni, Simewoni, Leevi ne Yuda,

³ Yissakari, Zebuluni ne Benyamiini,

⁴ Daani ne Nafutali, Gaadi ne Aseeri.

⁵ Ezzadde lya Yakobo lyonna awamu nga bawera abantu nsanvu. Ye Yozefu yali yabeera dda mu Misiri.

⁶ Olwatuuka, Yozefu n'afa ne baganda be, n'ezzadde eryo lyonna.

⁷ Naye Abayisirayeli baazaala ne babuna wonna ne baala ne bafuuka ba maanyi nnyo nnyo, ne bajjuza ensi.

Abeebureeyi batulugunyizibwa

⁸ Awo mu Misiri ne musitukamu kabaka omuggya ataamanya kantu ku Yozefu.

⁹ N'agamba abantu be nti: “Mulabe, Abayisirayeli bafuuse bangi ate ab'amaanyi okutusinga.

¹⁰ Abange, mugire tubakwate na bwegendereza sikulwa nga beeyongera obungi; olutalo nga lubadde lubaluseewo, ne beegatta ku balabe baffe, ne batulwanyisa ne bava mu nsi.”

¹¹ Awo ne babassaako bannampala b'akasanvu babamenye n'emirimu gyabwe egy'okwetikka emigugu. Bwe batyo ne bazimbira Faraawo ebibuga by'amawanika e Pitomu n'e Raamesesi.

¹² Kyokka gye baakomya okutulugunyizibwa, gye baakomya n'okwala, n'okubuna. Abamisiri ne batya Abayisirayeli.

¹³ Abamisiri ne bakozesa Abayisirayeli n'obukambwe.

¹⁴ Ne babaleetera ennyiike n'amalimo amakalubo ag'okusamba obudongo n'okubumba amataffaali n'emirimu egya buli kika egy'omu nnimiro n'emirala gyonna emikakali gye baabakozesangamu n'obukambwe.

¹⁵ Kabaka w'e Misiri n'agamba abazaalisa Abeebureeyi, omu ng'ayitibwa Sifura, n'omulala Puwa,

¹⁶ n'abalagira nti: “Bwe mubanga muzaalisa abakazi Abeebureeyi, nga bali mu zzaaliro, omwana bw'abeeranga omulenzi mumuttanga, bw'abeeranga omuwala, mumulekanga.”

¹⁷ Kyokka abazaalisa abo baali batya Katonda, tebaagondera kiragiro kya kabaka w'e Misiri; abaana ab'obulenzi ne babalekanga ne babeerawo.

¹⁸ Kabaka w'e Misiri n'atumya abazaalisa, n'ababuuza nti: “Lwaki mukoze ekintu kino, ne muleka abaana ab'obulenzi ne babeerawo?”

¹⁹ Abazaalisa ne baddamu Faraawo nti: “Abakazi Abeebureeyi tebali nga bakazi Bamisiri, ba maanyi; abazaalisa baba tebannabatuukako nga baazadde dda.”

²⁰ Katonda n'aba wa kisa ku bazaalisa. Abantu ne bagenda nga baala ne bafuuka ba maanyi nnyo.

²¹ Kubanga abazaalisa baawa Katonda ekitiibwa, naye n'abawa amaka.

²² Awo Faraawo n'awa abantu be bonna ekiragiro kino nti: “Buli mwana ow'obulenzi anaazaalibwanga Abeebureeyi, mumusuulanga mu Kiyira, naye omuwala mumulekanga n'abeerawo.”