Firemooni 1 - BIBULIYA ENTUKUVU

Okulamusa

¹ Pawulo, omusibe wa Kristu Yezu, ne muganda waffe Timotewo. Ya mukozi munnaffe Filemoni omwagalwa,

² ne mwannyinaffe Affiya, mutabaazi munnaffe Arikippo, n'Ekleziya asisinkana mu nnyumba yo.

³ Enneema ebeere nammwe, n'eddembe lya Katonda Kitaffe n'Omukama Yezu Kristu.

Okwebaza

⁴ Bulijjo neebaza Katonda buli lwe nkujjukira mu ssaala zange,

⁵ kubanga mpulira ku kwagala kw'oyagalamu abatuukirivu bonna, n'okukkiriza kw'okkirizaamu Omukama Yezu.

⁶ Nsaba nti okussa ekimu kw'olina mu kukkiriza kukole mu ggwe, omanye na buli kirungi kye tulina mu Kristu.

⁷ Okwagala kwo kwansanyula bya kitalo era ne kunkubagiza, kubanga olw'okubeera ggwe, emitima gy'abatuukirivu giweweddeko.

Okuwanjaga olwa Onesimo

⁸ Newandibadde mu Kristu nandigumye okukulagira ky'osaanye okukola,

⁹ naye olw'okubeera okwagala, nkuwanjagira buwanjagizi; nze Pawulo, omukadde ate kati omusibe wa Kristu Yezu,

¹⁰ nkuwanjagira olw'omwana wange gwe nazaala nga ndi mu njegere zino, ntegeeza Onesimo.

¹¹ Mu kusooka yali takugasa, naye kati atugasa ffembi, nze naawe.

¹² Mmukusindikidde akomewo, oyo kyenkana omutima gwange gwennyini.

¹³ Nandyagadde mmusigaze, ggwe w'otoli annyambe nga ndi mu njegere olw'Evangili,

¹⁴ naye saayagala kukola kantu nga ggwe tokkirizza, ky'okola ekirungi kireme kubeera ng'eky'etteeka, wabula kibeere ekivudde mu kwetuma.

¹⁵ Ndowooza yakuggyibwako akaseera, alyoke akuddizibwe nkomeredde,

¹⁶ nga takyali muddu, wabula ng'asinga n'omuddu, owooluganda omwagalwa, omuganzi gye ndi, ate asingawo n'obuganzi gy'oli ng'omuntu ate ne mu Mukama.

¹⁷ Kale nno bw'oba ng'ontwala nga munno, mwanirize nga bwe wandyanirizza nze.

¹⁸ Bw'aba ng'aliko kye yakusobyamu, oba ng'oliko ky'omubanja, kibalire ku nze.

¹⁹ Nze Pawulo, kino nkiwandiise n'omukono gwange gwennyini nti ndikisasula, ne bwe siiyogere ku bbanja ggwe ly'onninako.

²⁰ Kale nno, owooluganda, njagala ombeerere wa mugaso mu Mukama, omutima gwange oguwe guweweereko mu Kristu.

²¹ Nkuwandiikidde nga neesize obuwulize bwo, nga mmanyi nti ojja kukola ate osinzeewo ne ku kye nsaba.

Okusiibula

²² Ate mu kaseera ke kamu, ntegekeraawo ekisenge, kubanga nsuubira nti olw'essaala zammwe nnyinza okubaddizibwa.

²³ Epafura, musibe munnange mu Kristu Yezu, akutumidde;

²⁴ era ne bannange bwe tukola: Mariko, Aristariko, Dema ne Luka.

²⁵ Eneema ya Mukama waffe Yezu Kristu ebeere n'omwoyo gwammwe.