Et 8 - BIBULIYA ENTUKUVU

¹ “Wekkaanye, buli kiragiro kye nkulagira olwa leero okituusanga mulyoke mubeere balamu, mweyongere obungi era muyingire ensi mugitwale, ensi Omukama gye yalayirira bajjajjammwe.

² Ojjukiranga olugendo lwonna Omukama Katonda wo lw'akuyisizzaamu mu ddungu emyaka gino amakumi ana, ng'agenderera okukutoowaza n'okukugeza, amanye ekyakuli ku mutima gwo, oba oli wa kukwatanga biragiro bye oba nedda.

³ Yakutoowaza n'akulumya enjala, ate n'akuliisa ne manu, ggwe ne bajjajjaabo gye mwali mutamanyi, alyoke akuyigirize nti omuntu taba mulamu lwa mugaati gwokka, naye n'olw'ekigambo kyonna ekifuluma mu kamwa k'Omukama.

⁴ Ebyambalo byo tebyayabirirako, n'ebigere byo tebyazimba mu myaka egyo amakumi ana.

⁵ “Kimanye nno mu mutima gwo nti ng'omuntu bw'agunjula omwana we, n'Omukama Katonda wo bwe yakugunjula.

⁶ Awo nno kwatanga ebiragiro by'Omukama Katonda wo, otambulirenga mu makubo ge, era omutyenga.

Ensi endazaanye mulimu gwa Mukama

⁷ “Anti Omukama Katonda wo akutwala mu nsi ennungi, ensi ey'emigga n'ebidiba eby'amazzi, erina ensozi n'ebiwonvu omufubutuka ensulo z'amazzi,

⁸ ensi ey'eŋŋano, sayiri, emizabbibu, emikunyu, amakomamawanga, omuzigo gw'oliva n'omubisi gw'enjuki;

⁹ ensi mwe mutalijula kantu, mw'oliriira omugaati gwo awatali kujula; ensi ey'amayinja ag'ekyuma n'ensozi omusimwa ekikomo.

¹⁰ Bw'omalanga okulya n'okkuta, otenderezanga Omukama Katonda wo olw'ensi amakula gye yakuwa.

¹¹ “Wekkaanye, teweerabiranga Omukama Katonda wo n'otofa ku biragiro bye, ennamula ye n'amateeka ge bye nkulagira olwa leero.

¹² Oboolyawo bw'olimala okulya n'okkuta, n'ozimba amayumba amalungi n'ogasulamu,

¹³ amagana go n'ebisibo byo nga bigezze, ffeeza ne zaabu na byonna by'olina nga bikwalidde,

¹⁴ omutima gwo gwandiyinza okwewanika, ne weerabira Omukama Katonda wo eyakuggya mu nsi y'e Misiri, mu nnyumba y'obuddu;

¹⁵ eyakukulembera mu ddungu eddene ery'entiisa, omwali emisota egy'obusagwa n'enjaba, ensi erakasidde omutaali tuzzi n'akatono; eyakuggyira amazzi mu lwazi olugumu;

¹⁶ eyakuliisa manu mu ddungu bajjajjaabo gye bataamanya, n'akutoowaza ng'agenderera okukugeza, olyoke obeerenga bulungi oluvannyuma.

¹⁷ “Wandiyinza okwegamba mu mutima gwo nti: ‘Obuzira n'amaanyi g'emikono gyange bye binkoledde obugagga buno.’

¹⁸ Wabula jjukira Omukama Katonda wo nti ye yakuwa amaanyi n'ofuna obugagga, ng'atuukiriza endagaano ye gye yalayirira bajjajjaabo, nga bwe kyeraga olwa leero.

¹⁹ Naye bw'olyerabira Omukama Katonda wo, n'ogoberera balubaale abagwira, n'obasinza, n'obavunnamira, nkukakasiza ddala olwa leero nti mulizikiririra ddala.

²⁰ “Bwe muligaana okuwulira eddoboozi ly'Omukama Katonda wammwe, nammwe mugenda kuzikirira ng'amawanga Omukama ge yazikiriza mu maaso gammwe.