Et 6 - BIBULIYA ENTUKUVU

¹ “Bino bye biragiro, amateeka n'ennamula Omukama Katonda wammwe bye yandagira mbibayigirize mubikwatenga mu nsi gye musomokera Yorudani mugitwale,

² bwe mutyo mmwe n'abaana bammwe ne bazzukulu bammwe mutyenga Omukama Katonda wammwe ennaku zonna ez'obulamu bwammwe, nga mukwata empisa n'ebiragiro byonna bye mbawa, mulyoke muwangaale.

³ Wulira, Yisirayeli, wekkaanye obituusenga, olyoke obeere bulungi, oyale nnyo mu nsi ekulukuta amata n'omubisi gw'enjuki, ng'Omukama Katonda wa bajjajjaabo bwe yakusuubiza.

⁴ “Wulira, Yisirayeli: Omukama Katonda waffe yekka ye Mukama.

⁵ Oyagalanga Omukama Katonda wo n'omutima gwo gwonna n'omwoyo gwo gwonna n'amaanyi go gonna.

⁶ Ebigambo bino bye nkulagira olwa leero, bibeerenga mu mutima gwo.

⁷ Obikuutiranga abaana bo, era obiddiŋŋananga ng'otudde mu nnyumba yo, ng'otambula mu kkubo, ng'ogenda okwebaka oba nga wa kazuukuka.

⁸ Obisibanga ku mukono gwo ng'akabonero, era obisibanga mu kyenyi kyo;

⁹ obiwandiikanga ku myango gy'ennyumba yo ne ku miryango gyo.

¹⁰ “Omukama Katonda wo bw'akuyingizanga mu nsi gye yalayirira bajjajjaabo Yiburayimu, Yizaake ne Yakobo, nti aligikuwa, ensi ey'ebibuga ebinene, ebirungi by'otaazimba,

¹¹ ey'ennyumba ezijjudde obugagga bwonna bw'otajjuzaamu, enzizi z'otaasima, n'ennimiro z'emizabbibu n'oliva by'otaasimba, bw'oliba omaze okulya n'okkuta,

¹² wekkaanye bulungi, teweerabiranga Omukama eyakuggya mu nsi y'e Misiri, mu nnyumba y'obuddu.

¹³ Otyanga Omukama Katonda wo, era yekka gw'oweerezanga, mu linnya lye mw'olayiriranga.

Abakubiriza okunywerera ku Katonda

¹⁴ “Temugobereranga balubaale bagwira, balubaale b'amawanga agabeetoolodde.

¹⁵ Kubanga Omukama Katonda wo, oyo Katonda ali mu makkati gammwe, wa buggya, era obusungu bwe bulikwesererako akusangulewo ku nsi.

¹⁶ Temukemanga Mukama Katonda wammwe nga bwe mwakola e Massa.

¹⁷ Mukuumirenga ddala ebiragiro by'Omukama, by'ayigiriza n'amateeka ge bye yakulagira.

¹⁸ Kolanga ekituufu era ekirungi mu maaso g'Omukama, olyoke obeere bulungi, oyingire otwale ensi ennungi Omukama gye yalayirira bajjajjaabo,

¹⁹ ng'akugoberawo abalabe bo. Bw'atyo Omukama bwe yasuubiza.

²⁰ “Gye bujja omwana wo bw'akubuuzanga nti: ‘Bino enjigiriza, amateeka n'ebiragiro Omukama Katonda waffe bye yabalagira bitegeeza ki?’

²¹ omuddangamu nti: ‘Twali baddu ba Faraawo mu nsi y'e Misiri, Omukama n'atuggyayo mu Misiri n'omukono ogw'amaanyi.

²² N'akola obubonero obwewuunyisa n'ebikuuno, ebinene ate eby'entiisa mu Misiri ng'abikola ku Faraawo n'ennyumba ye yonna mu maaso gaffe.

²³ N'atuggyayo, atuleete mu nsi era agituwe, ensi gye yali alayiridde bajjajjaffe.

²⁴ Omukama n'atulagira tukwatenga amateeka gano gonna, tutye Omukama Katonda waffe, tulyoke tubeere bulungi, era atukuume nga tuli balamu, nga bwe tuli kaakati.

²⁵ Obutuukirivu bwaffe buliba mu kino: bwe tulikwata ne tutuusa ebiragiro bino byonna mu maaso g'Omukama Katonda waffe nga ye bwe yatulagira.’