Et 3 - BIBULIYA ENTUKUVU

¹ “Ne tukyuka, ne twambuka nga tukutte ekkubo eriraga mu Basani; Ogi kabaka w'e Basani n'avaayo n'eggye lye lyonna okutusisinkana mu lutalo e Edureyi.

² Omukama n'aŋŋamba nti: ‘Tomutya, kubanga mmuwaddeyo mu mikono gyo n'eggye lye lyonna n'ensi ye. Mukole nga bwe wakola Sikoni kabaka w'Abaamori, eyabeeranga mu Kesuboni.’

³ Omukama Katonda waffe n'atuwa mu mikono gyaffe ne Ogi kabaka w'e Basani n'eggye lye lyonna; ne tubakuba bonna obutalekaawo n'omu yawonawo.

⁴ Mu budde obwo ebibuga bye byonna ne tubiwamba. Tewali kibuga kye tutaabawambako ku bibuga enkaaga, ensi yonna ey'e Arugobu, obwakabaka bwa Ogi mu Basani.

⁵ Ebibuga bino byonna byaliko bbugwe omuwanvu, enzigi n'emiyingo; era waaliyo n'obubuga bungi nnyo obutaaliko bbugwe.

⁶ Ne tubazikiririza ddala obutalekaawo nga bwe twali tukoze Sikoni kabaka w'e Kesuboni, ne tusaanyaawo abasajja, abakazi n'abaana abato abaali mu bibuga.

⁷ Naye ebisolo by'awaka n'ebintu ebyanyagibwa mu bibuga twabyetwalira.

⁸ “Bwe tutyo mu budde obwo bakabaka ababiri ab'Abaamori, twabawambako ensi yaabwe emitala wa Yorudani, okuva ku Kiwonvu Arunoni okutuukira ddala ku lusozi Kerumoni.

⁹ [Abasidoni olusozi Kerumoni baaluyitanga Siriyoni, ate Abaamori nga baluyita Seniri.]

¹⁰ Twawamba ebibuga byonna ebyali mu museetwe, n'ensi yonna eya Gileyaadi ne Basani okutuukira ddala ku Saleka ne Edureyi, ebibuga by'obwakabaka bwa Ogi mu Basani.

¹¹ [Ogi kabaka w'e Basani yekka ye yali akyasigaddewo ku Barefa. Ekitanda kye eky'ekyuma kyalina emikono mwenda mu buwanvu ate ena mu bugazi. Kikyaliyo e Rabba mu Bammoni.]

Okugabanyaamu ensi y'emitala wa Yorudani

¹² “N'eyo ensi ne tugitwala. Ebitundu ebyo ne mbiwa ab'ekika kya Rubeni n'ekya Gaadi okuva ku Aroweri, ekiri ku lubalama lw'Ekiwonvu Arunoni, n'ekitundu ky'ensozi za Gileyaadi n'ebibuga byamu.

¹³ Ekitundu ekyasigalawo ekya Gileyaadi ne Basani yenna, obwakabaka bwa Ogi, nakiwa ekyokubiri ky'ekika kya Manasse. [Ensi yonna eya Arugobu ne Basani yenna byali bimanyiddwa nga nsi y'Abarefa.]

¹⁴ Yayiri muzzukulu wa Manasse yafuna ensi ya Arugobu yonna okutuuka ku nsalo n'Abagessuri n'Abamaakati, n'atuuma Basani erinnya lye Kavvoti-Yayiri, era bwe kikyayitibwa n'okutuusa ku lunaku lwa leero.

¹⁵ Makiri ne mmuwa Gileyaadi.

¹⁶ N'ab'ekika ekya Rubeni n'ekya Gaadi ne mbaawuliza ku nsi okuva e Gileyaadi okutuuka ku Kiwonvu Arunoni, n'okweyongerayo okutuuka ku Kiwonvu Yabboki ekikola ensalo n'Abammoni:

¹⁷ Ensalo zaabwe okudda ebuvanjuba nga gwe mugga Yorudani okuviira ddala ku Kinnereti n'okukkira ddala okutuuka ku nnyanja ya Araba, Ennyanja y'Omunnyo, ne wansi w'enkonko za Pisuga.

¹⁸ “Mu budde obwo nabalagira ne mbagamba nti: ‘Omukama Katonda wammwe abawadde ensi eno, mugitwale. Naye mwenna abasajja abeesobola nga mubagalidde ebyokulwanyisa, mukulemberemu baganda bammwe Abayisirayeli.

¹⁹ Bo bakazi bammwe, abaana n'ebisolo byammwe, anti mmanyi nti mulina amagana mangi, bijja kusigala mu bibuga bye nabawa,

²⁰ okutuusa Omukama lw'aliwa baganda bammwe ekiwummulo nga bw'akiwadde mmwe, nabo ne bafuna ensi Omukama Katonda wammwe gy'alibawa emitala wa Yorudani; olwo buli omu aliddayo mu kitundu kye kye namuwa.’

Musa agaanibwa okusomoka Yorudani

²¹ “Mu budde obwo ne Yoswa namulagira nti: ‘Amaaso go galabye Omukama Katonda wammwe by'akoze bakabaka bano ababiri; bw'alikola bw'atyo obwakabaka bwonna gy'oliraga ng'osomose.

²² Tobatya, kubanga Omukama Katonda wammwe y'alirwana mu kifo kyammwe.’

²³ “Mu budde obwo nawanjagira Omukama ne ŋŋamba nti:

²⁴ ‘Ayi Mukama Omuyinza, otandise okwoleka omuweereza wo obukulu bwo n'omukono gwo ogw'amaanyi; kubanga lubaale ki mu ggulu ne mu nsi asobola okukola by'okola, n'okwegeranya ku by'amaanyi by'okola?

²⁵ Mpa nange nsomoke, ndabe ku nsi eno ennungi ey'emitala wa Yorudani, n'ensi ey'ensozi ne Lebanoni.’

²⁶ Naye olw'okubeera mmwe Omukama n'ansunguwalira, teyampuliriza, yaŋŋamba bugambi nti: ‘Ekyo kimala. Toddayo n'oyogera nange ku kigambo ekyo.

²⁷ Yambuka ku ntikko ye Pisuga oyiseeyise amaaso go ebugwanjuba, emambuka, emaserengeta n'ebuvanjuba; ensi girengerere awo anti tojja kusomoka Yorudani ono.

²⁸ Tongoza Yoswa, mukalangule, omugumye, kubanga y'anaasomosa eggwanga lino, era y'alibagabira ensi gy'onoolaba.’

²⁹ “Awo nno ne tusigala awo mu kiwonvu okumpi ne Beti-Pewori.