Et 19 - BIBULIYA ENTUKUVU

¹ “Omukama Katonda wo bw'alimala okuzikiriza amawanga agali mu nsi gy'agenda okukuwa ebeere eyiyo, nga naawe omaze okubagobawo n'obeera mu bibuga byabwe ne mu mayumba gaabwe,

² weeyawulirangako ebibuga bisatu mu makkati g'ensi Omukama Katonda wo gy'agenda okukuwa ogitwale.

³ Okolanga enguudo ezigendayo; ensi yo yonna Omukama gy'akuwa ng'obusika, n'ogisalamu ebitundu bisatu ebyenkanankana, oli asse omuntu gy'asobola okuddukira.

⁴ “Lino lye tteeka ku muntu asse munne bw'aba addukiddeyo okwewonya: Oli attanga munne mu butanwa nga tebwali bukyayi mu kusooka oba mu kugenderera,

⁵ okugeza, ng'oli agenze ne munne mu kibira okutema emiti, bw'awuuba embazzi, omutwe gw'embazzi ne guweekuka ku muyini ne gukuba munne n'afa, oyo addukiranga mu kimu ku bibuga ebyo, n'awona.

⁶ Kubanga oli awoolera olw'omusaayi, olw'essungu akyayinza okumuwondera, olw'olugendo okuba oluwanvu n'amukwata, n'amukuba n'afa sso nga taliiko musango gwa kutta, kubanga teyamutta mu bugenderevu oba lwa bukyayi mu kusooka.

⁷ Kale nno kyenva nkulagira mweyawulirewo ebibuga bisatu.

⁸ “Omukama Katonda wo bw'alikugaziyiza ensalo zo, nga bwe yalayirira bajjajjaabo, n'akuwa ensi yonna gye yabasuubiza,

⁹ nga naawe okuumye bulungi etteeka lino lyonna lye nkulagira olwa leero: okwagala Omukama Katonda wo, n'okutambulira mu makubo ge obudde bwonna, oyongerangayo ebibuga ebirala bisatu, n'oyongereza ku biri ebisatu.

¹⁰ Olwo omusaayi ogutaliiko musango teguliyiibwa mu nsi Omukama Katonda wo gy'alikuwa ng'obusika; oleme kuvunaanibwa gwa kuyiwa musaayi.

¹¹ “Naye ng'omuntu akyaye munne, amala amwekwekerera, n'amukuba n'afa, oluvannyuma n'addukira mu kimu ku bibuga ebyo,

¹² abakadde b'omu kibuga kye batumyanga ne bamukomyawo okuva mu kibuga, ne bamukwasa awoolera eggwanga olw'omusaayi afe.

¹³ Tomusaasiranga; okuyiwa omusaayi ogutaliiko musango kuteekwa okuggyirwawo ddala mu Yisirayeli, olyoke obeere bulungi.

Obwenkanya

¹⁴ “Tosembezangayo ejjinja erisala ensalo y'ettaka ne muliraanwa wo bajjajjaabo lye balisimba mu busika bw'olifuna mu nsi Omukama Katonda wo gy'agenda okukuwa ogitwale.

¹⁵ “Omujulirwa omu tamala kusingisa muntu musango oba kibi ky'akoze, kibeere kya ngeri ki; ekigambo kikakasibwa n'obujulizi bwa bajulizi babiri oba basatu.

¹⁶ “Omujulirwa ow'ettima bwe yeesimbangawo okulumiriza omuntu omusango,

¹⁷ bombi alumiriza n'omuwawaabirwa bayimiriranga mu maaso g'Omukama awali bakabona n'abalamuzi ababangawo mu budde obwo.

¹⁸ Abalamuzi babuulirizanga ne bayitaayita mu nsonga zonna, omujulirwa bw'abanga omulimba, obujulizi bwe ku muganda we nga bwa bulimba,

¹⁹ mumukolanga nga bw'abadde ayagala okukola muganda we. Ekibi kino oteekwa okukiggyirawo ddala mu ggwe.

²⁰ Abalala bwe baliwulira, bagenda kutya, tebaliddayo kukola bifaanana bityo mu ggwe.

²¹ Tomusaasiranga; obulamu olw'obulamu, eriiso olw'eriiso, erinnyo olw'erinnyo, omukono olw'omukono, ekigere olw'ekigere.