Et 18 - BIBULIYA ENTUKUVU

¹ “Bakabona, be Baleevi, kwe kugamba ekika kyonna ekya Leevi, tebaligabana mugabo oba busika wamu na Yisirayeli. Baliryanga ku bitone by'Omukama ebimuweerezebwa n'omuliro; buno bwe buliba obusika bwabwe.

² Tebaabenga na busika mu baganda baabwe; anti Omukama yennyini bwe busika bwabwe, nga bwe yabagamba.

³ “Guno gwe mugabo oguddira bakabona okuva ku bantu abatambira ente ennume oba endiga: omukono, emba zombi n'ebyenda.

⁴ Onoobawanga n'ebibala byo ebisooka eby'eŋŋano, n'ebisooka ku vviini ensu n'omuzigo, n'ebyoya by'endiga zo eby'olumwa olusooka.

⁵ Anti Omukama Katonda wo ye ne batabani be yabaawula mu bika byo byonna, okuyimirira baweerezenga mu linnya ly'Omukama emirembe gyonna.

⁶ Omuleevi bw'ayagalanga okuva eyo gy'ali mu bibuga byo, agende abeere mu kifo Omukama ky'aliba alonze, kino ng'akikoze mu mwoyo mulungi,

⁷ akkirizibwa okuweereza mu linnya ly'Omukama Katonda we nga baganda be bonna Abaleevi abaweereza mu kifo ekyo mu maaso g'Omukama.

⁸ Wa kufunanga kyenkanyi ku mugabo gwe bagabana, newandibadde nga ye yafunayo dda ku kantu bwe yatunda bye yali ow'okusikira ku kitaawe.

Eby'okwekkaanya ku balanzi

⁹ “Bw'oyingiranga mu nsi Omukama Katonda wo gy'agenda okukuwa, toyiganga okuyisa empisa ezeenyinyalwa ez'amawanga ago.

¹⁰ Mu ggwe temubangamu awonga mutabani we oba muwala we mu muliro, oba akola eby'obulaguzi, omusawo w'emizimu, asoma obubonero, omulogo,

¹¹ asindika ebitambo, eyeebuuza ku mmandwa, n'asamirira emizimu oba ayeebuuza ku bafu.

¹² Anti ebyo byonna Omukama abyenyinyala; era lwa kubeera ebyo Omukama Katonda wo kyaliva abagoberawo amawanga ago.

¹³ Obeeranga mutuufu mu maaso g'Omukama Katonda wo nga toliiko musango.

¹⁴ “Amawanga ago ge mugenda okutwala, bawuliriza abalaguzi n'abalogo, naye ggwe Omukama Katonda wo takukkiriza kukola bw'otyo.

¹⁵ Omukama Katonda wo alibasibusiza mu mmwe omulanzi ali nga nze okuva mu baganda bammwe; oyo omuwuliranga.

¹⁶ Kino kye wasaba Omukama Katonda wo ku Korebu, ekibiina lwe kyakuŋŋaana, omale ogambe nti: ‘Mpa obutaddamu kuwulira ddoboozi lya Mukama Katonda wange n'okulaba omuliro guno ogwaka guti, sikulwa nga nfa.’

¹⁷ Omukama n'aŋŋamba nti: ‘Byonna bye bayogedde birungi;

¹⁸ ku lwabwe nzija kusitusa omulanzi ali nga ggwe nga mmuggya mu baganda baabwe; nzija kussa ebigambo byange mu kamwa ke, alibagamba byonna bye ndiba mmulagidde.

¹⁹ Omuntu yenna ataliwulira bigambo byange by'alyogera mu linnya lyange ndimusaba annyonnyole.

²⁰ Naye omulanzi alyetumiikiriza okwogera mu linnya lyange nze bye simutumye, oba alyogera mu linnya lya balubaale, attibwanga buttibwa.

²¹ Oyinza okwebuuza nti: “Mmanya ntya nti ekigambo ekyo Omukama si y'akyogedde?”

²² Omulanzi bw'anaalanganga mu linnya ly'Omukama, ky'alanze ne kitatuukirira, ng'omanya nti ekyo Omukama si ye yakyogera; omulanzi oyo yeetumiikiriza bwetumiikiriza; oyo tomutyanga.’