Et 17 - BIBULIYA ENTUKUVU

¹ “Omukama Katonda wo tomutambiriranga ndiga oba nte eriko akamogo oba enkeka yonna, kubanga ekyo Omukama Katonda wo akyenyinyala.

² “Mu bibuga byo Omukama Katonda wo by'alikuwa bwe musangibwangamu omusajja oba omukazi, omu ku mmwe, akola ekibi mu maaso g'Omukama Katonda wo, ng'amenya endagaano ye,

³ n'asinza balubaale n'abavunnamira, oba n'avunnamira enjuba, omwezi oba eby'eggye ly'eggulu byonna nze bye ssaabalagira,

⁴ kino ne bakikubuulirako, okibuulirizangako bulungi ddala. Bwe kiba nga kituufu era nga kikakafu nti ekyenyinyalwa ekyo kyakolebwa mu Yisirayeli,

⁵ omusajja oba omukazi eyakola ekibi ekyo omufulumyanga ebweru wa wankaaki n'omuttira eyo n'amayinja.

⁶ Omuntu okuttibwanga wateekwa okubaawo obujulizi bwa bantu b'ekibuga kyo babiri oba basatu obumulumiriza; mpaawo attibwanga ng'alumiriziddwa omujulirwa omu yekka.

⁷ Mu kumutta, omukono gw'amulumiriza gwe gumusookangako, olwo n'emikono gy'abalala. Ekibi kino muteekwa okukiggyirawo ddala mu mmwe.

Abalamuzi Abaleevi

⁸ “Singa emisango egireetebwa mu mbuga zammwe mubeerangamu ogukulemeredde okulamula, ng'egy'okuyiwa omusaayi, okusoowagana, n'okulwanagana, ogitwalanga mu kifo Omukama Katonda wo ky'aliba alonze.

⁹ Gitwale ewa bakabona Abaleevi n'eri omulamuzi aliwo mu budde obwo; obeebuuzangako, bo balikusalirawo.

¹⁰ Okolanga nga bwe bakugambye nga bayima mu kifo ekyo Omukama kye yalonda. Wekkaanye, bye bakusabanga okukola obituukirizanga.

¹¹ Bye babanga bakulagidde n'ensalawo yaabwe by'okolerangako; towunjukanga kudda ku ddyo oba ku kkono n'ova ku bye bakugambye.

¹² Bwe wabangawo eyeekuluntaza n'anyooma omulamuzi oba kabona aweereza Omukama Katonda wo mu budde obwo, omuntu oyo attibwanga buttibwa. Ekibi kino kirina okuggyibwawo mu Yisirayeli.

¹³ Abantu bonna balikiwulira ne batya, tebaliddayo kwekuza.

Bakabaka

¹⁴ “Bw'oliyingira ensi Omukama Katonda wo gy'alikuwa, n'ogitwala, n'ogibeeramu, ekirowoozo kimala kikujjira nti: ‘Ka neeteerewo kabaka, ng'amawanga gonna aganneetoolodde bwe gamulina,’

¹⁵ wekkaanye, oyo yekka Omukama Katonda wo gw'aliba akulondedde ng'amuggya mu baganda bo, gw'ofuulanga kabaka. Togezanga n'olonda omugwira, atali muganda wo, okuba kabaka wo.

¹⁶ “Kyokka teyeekuŋŋaanyizanga mbalaasi nkumu, era tazzanga bantu mu Misiri bamufunireyo endala okusingawo, kubanga Omukama yabagaana dda nti: ‘Temugezanga ne muddayo eyo.’

¹⁷ Tawasanga bakazi bangi, omutima gwe guleme kuwubisibwa; era teyeekuŋŋaanyizanga butitimbe bwa ffeeza ne zaabu.

¹⁸ Bw'amalanga okutuula ku nnamulondo y'obwakabaka bwe, yeewandiikiranga etteeka lino mu kitabo okuva ku bakabona Abaleevi.

¹⁹ Abeeranga nakyo, n'akisomanga ennaku zonna ez'obulamu bwe, alyoke ayige okutya Omukama Katonda we, n'okutuusa ebigambo by'etteeka lino n'ebiragiro byonna,

²⁰ aleme kwekuliza ku baganda be, n'awunjuka ng'adda ku ddyo oba ku kkono n'ava ku tteeka. Olwo ye n'abaana be lwe baliwangaala nga balamula obwakabaka bwe mu Yisirayeli.