Abalam 2 - BIBULIYA ENTUKUVU

¹ Malayika w'Omukama yava e Gilugali n'ayambuka e Bokimu, n'agamba nti: “Nabaggya mu Misiri, ne mbaleeta mu nsi gye nalayira okuwa bajjajjammwe. Nagamba nti: ‘Sigenda kumenya ndagaano yange nammwe emirembe gyonna,

² nammwe temukolanga endagaano n'abantu b'ensi eno, naye mumenyangawo emyaliiro gyabwe.’ Naye mmwe temwampulira. Kiki ekyabakozesa ekyo?

³ Nange nno mbagamba nti sijja kubabagoberawo. Bajja kubakaluubiririza obulamu ne balubaale baabwe babafuukire omutego.”

⁴ Malayika w'Omukama bwe yamala okwogera bino byonna eri Abayisirayeli bonna, bo ne bakuba ebiwoobe.

⁵ Ekifo ne bakituuma Bokimu, ne baweererezaawo Omukama ebitambiro.

II. ENNYANJULA EYOOKUBIRI Ensonga eyassisaawo abalamuzi

⁶ Yoswa bwe yamala okusiibula abantu, Abayisirayeli ne badda buli omu mu busika bwe, ensi bagitwale.

⁷ Abantu baaweerezanga Omukama ebbanga lyonna Yoswa ng'akyali mulamu, ne mu biseera by'abakadde abaawangaala okumusinga, abaamanya byonna Omukama bye yali akoledde Yisirayeli.

⁸ Yoswa mutabani wa Nuunu, omuweereza w'Omukama, yafa nga wa myaka kikumi mu kkumi egy'obukulu.

⁹ Baamuziika mu busika bwe e Timunati-Eresi, mu nsozi za Efurayimu, mu mambuka g'olusozi Gaasi.

¹⁰ Ezzadde eryo lyonna nga limaze okugattibwa ku bajjajja baalyo, ne wasitukawo ezzadde eritaamanya ku Mukama ne bye yali akoledde Yisirayeli.

¹¹ Abayisirayeli ne bakola bubi mu maaso g'Omukama, ne baweereza Babaali.

¹² Baayabulira Omukama, Katonda wa bajjajjaabwe eyabaggya mu Misiri, ne bagoberera balubaale ab'amawanga agabetoolodde, ne babavunnamira, ne banyiiza Omukama.

¹³ Baayabulira Omukama ne baweereza Baali ne Baasutoreti.

¹⁴ Obusungu bw'Omukama ne bweserera ku Yisirayeli, n'abawaayo mu mikono gy'abanyazi ne babanyagulula, ne mu mikono gy'abalabe baabwe ababeetoolodde nga tebakyasobola kubagumira.

¹⁵ Yisirayeli buli lwe yagendanga okulwana, ng'Omukama abalemesa bawangulwe, nga bwe yali ayogedde era nga ne bwe yali alayidde okubakola; ne balaba nnyo ennaku.

¹⁶ Olwo Omukama n'asitusa abalanzi abaabaggyanga mu mikono gy'abaabanyaganga.

¹⁷ Naye tebaawuliriza balamuzi baabwe, wabula ate badda mu kukola bwamalaaya ne balubaale n'okubavunnamira. Obuwulize eri ebiragiro by'Omukama bajjajjaabwe bwe baalaga, bo baabusuula mangu; tebaakola nga bajjajjaabwe.

¹⁸ Omukama bwe yabateekerangawo omulamuzi, nga Omukama abeera n'omulamuzi n'abanunula mu mikono gy'abalabe baabwe mu bbanga lye yamalanga ng'alamula. Anti Omukama yabakwatirwanga ekisa ng'alabye bwe basinda ennaku olw'abaabayigganyanga n'abaabanyigirizanga.

¹⁹ Naye omulamuzi bwe yafanga, nga baddayo mu nsobi, nga bakola bubi n'okusinga bajjajjaabwe mu ngeri gye baagobererangamu balubaale n'okubavunnamira. Ne bagaana okuleka empisa zaabwe embi n'obukakanyavu bwabwe.

Ensonga eyasigazisaawo ab'amawanga

²⁰ Awo obusungu bw'Omukama ne bweserera ku Yisirayeli, n'agamba nti: “Kubanga eggwanga lino limenye endagaano gye nateekerawo bajjajjaabwe, ne batampulira,

²¹ sikyagobyewo mu maaso gaabwe mawanga Yoswa ge yafa tagobyewo,

²² ngeyambise okugeza Yisirayeli, ndabe oba banaakwata amakubo g'Omukama, bagagoberere nga bajjajjaabwe bwe baakola, oba nedda.”

²³ Omukama yali alese amawanga ago ne gasigalira; teyagagobaawo mangu era teyagawaayo mu mikono gya Yoswa.