Abalam 12 - BIBULIYA ENTUKUVU

¹ Abantu b'omu Efurayimu ne bakunga eggye, ne basomoka ne balaga e Zafoni, ne bagamba Yefuta nti: “Lwaki wagenda okulwanyisa Abammoni n'ototuyita kugenda naawe? Tugenda kukwokera mu nnyumba yo.”

² Yefuta n'abagamba nti: “Nze n'abantu bange tubadde ku mbiranye nnyo n'Abammoni; nabalaajanira, naye temwajja kumponya mu mikono gyabwe.

³ Nalaba temunnyamba, ne ntunda omwoyo, ne nsomoka okulumba Abammoni; ekirungi Omukama n'annyamba ne mbawangula. Kati lwaki muzze okunnwanyisa?”

⁴ Awo Yefuta n'ayita abasajja bonna ab'omu Gileyaadi n'alwanyisa Efurayimu. Abasajja b'omu Gileyaadi ne bakuba Abeefurayimu, kubanga Abeefurayimu baali babagambye nti: “Mmwe Abagileyaadi muli mmomboze mu Efurayimu ne Manasse; mwadduka kuva mu Efurayimu.”

⁵ Abagileyaadi ne bakwata emisomoko gy'oku Yorudani egisomosa mu Efurayimu. Oli mu bakaawonawo mu Efurayimu bwe yagambanga nti: “Ka nsomoke,” ng'abasajja b'omu Gileyaadi bamubuuza nti: “Oli Mwefurayimu?” Bwe yagaananga nti “Nedda,”

⁶ nga bamugamba nti: “Kale gamba nti: ‘Shibboleti,’ ” ye ng'agamba nti: “Sibboleti,” kubanga yali tasobola kukyatula bulungi; nga bamukwata nga bamuttira awo wennyini ku misomoko gy'oku Yorudani. Mu budde obwo emitwalo ena mu enkumi bbiri be baafa mu Efurayimu.

⁷ Yefuta Omugileyaadi yalamula Yisirayeli emyaka mukaaga; Yefuta Omugileyaadi n'afa, n'aziikibwa mu kibuga Gileyaadi.

J. YIBUZANI

⁸ Ng'avuddewo, Yibuzani ow'omu Beteleemu n'alamula Yisirayeli.

⁹ Yalina batabani be amakumi asatu ne bawala be amakumi asatu. Yafumbiza bawala be ebweru w'ekika kye, ne batabani be n'abawasiza abakazi ng'abaggya mu bika ebirala. Yalamula Yisirayeli okumala emyaka musanvu.

¹⁰ Yibuzani n'afa n'aziikibwa e Beteleemu.

K. ELONI

¹¹ Ng'avuddewo, Eloni Omuzebuluni n'alamula Yisirayeli okumala emyaka kkumi.

¹² Eloni Omuzebuluni n'afa n'aziikibwa mu Ayijaloni eky'omu Zebuluni.

L. ABUDONI

¹³ Ng'avuddewo Abudoni mutabani wa Yileli ow'omu Piratoni n'alamula Yisirayeli.

¹⁴ Yalina abaana abalenzi amakumi ana n'abazzukulu amakumi asatu, nga beebagala endogoyi nsanvu. Yalamula Yisirayeli emyaka munaana.

¹⁵ Abudoni mutabani wa Yileli n'afa n'aziikibwa e Piratoni mu Efurayimu, mu nsozi z'Abaamaleki.