Abaefeso 1 - BIBULIYA ENTUKUVU

Okulamusa

¹ Pawulo, Omutume wa Yezu Kristu olw'okwagala kwa Katonda. Y'abatuukirivu bonna abakkiriza mu Kristu Yezu.

² Eneema ebeere nammwe ko n'emirembe okuva ewa Katonda Kitaffe n'Omukama Yezu Kristu.

A. ENTEGEKA YA KATONDA EY'OKULOKOLA ABANTU Oluyimba olw'okwebaza emikisa gy'obulokofu

³ Katonda oyo era Kitaawe wa Mukama waffe Yezu Kristu atenderezebwe, eyatuwa mu Yezu Kristu buli mukisa ogw'omu ggulu ogwa Mwoyo.

⁴ Nga bwe yatweroboleza mu ye nga n'ensi tennabangibwawo, tubeere batuukirivu nga tetuliiko musango mu maaso ge.

⁵ Yatuteebeza mu kwagala kwe okwebonanyizibwa ng'abaana ng'ayita mu Yezu Kristu, nga bwe yateekateeka mu kwagala kwe,

⁶ aweese eneema ye ey'ekitiibwa ettendo, gye yatugemulira olw'ekisa mu Mwana we Omwagala.

⁷ Mu ye twanunulibwa mu musaayi gwe, ne tusonyiyibwa ebibi, okusinziira ku bungi bw'eneema ye,

⁸ gye yatuwa mu buyitirivu mu magezi gonna ne mu kumanya.

⁹ Kubanga yatuwa okumanya ekyama ky'okwagala kwe, nga kwe kusiima kwe, nga bwe yateesa atyo mu Kristu,

¹⁰ entegeka ey'okugoberera okutuusa ng'emirembe gyonna gituukiridde, byonna abigatte wamu mu Kristu, ebiri mu ggulu n'ebiri mu nsi.

¹¹ Mu ye naffe mwe yatweroboleza ng'obusika, nga bwe yatuteebeza ng'aggya ku ntegeka ye, oyo atuukiriza byonna ng'agoberera enteesa y'okwagala kwe.

¹² Ffe abaasookera ddala okusuubira mu Kristu, twayitirwa okutendanga ekitiibwa kye.

¹³ Mu ye nammwe mwawulira ekigambo ky'amazima, Evangili y'okulokoka kwammwe, ne mumukkiriza, ne mussibwako akabonero ka Mwoyo Mutuukirivu omusuubize,

¹⁴ nga gwe musingo gw'obusika bwaffe, okutuusa nga tubufunye, ekitiibwa kye kifune ettendo.

Essaala esaba okumanya obukulu bwa Kristu

¹⁵ Nange nno olw'okuwulira nga bwe mukkiriza Omukama Yezu n'engeri gye mwagalamu abatuukirivu bonna,

¹⁶ sisobola kulekera awo kwebaza ku lwammwe nga mbajjukira mu ssaala zange,

¹⁷ Katonda nnyini kitiibwa Kitaawe wa Mukama waffe Yezu Kristu, abawe omutima ogutegeera, ababikkulire mumumanye;

¹⁸ amulise amaaso g'omutima gwammwe, mutegeere essuubi lye yabayitira, n'obungi bw'ekitiibwa eky'obusika bwe bwe yawa abatuukirivu be,

¹⁹ n'obukulu bw'amaanyi ge amasukkirivu g'ayoleseza mu ffe abakkiriza, mu bikolwa by'obuyinza n'amaanyi ge,

²⁰ bye yakola mu Kristu bwe yamuzuukiza mu bafu, n'amutuuza ku mukono gwe ogwa ddyo mu ggulu,

²¹ ng'asukkulumye okusinga obukungu bwonna, n'obuyinza, n'amaanyi, n'obufuzi, na buli linnya eryali lituumiddwa, si mu mulembe guno gwokka, naye ne mu gulijja;

²² byonna n'abissa wansi w'ebigere bye, yennyini n'amuwa okubeera omutwe gwa buli kintu ku lw'Ekleziya;

²³ gwe mubiri gwe, obujjuvu bw'oyo ajjuza byonna mu byonna.