MALAKIA 1 - PATHIAN LEKHABU RITHIANG

¹ Malakia manga Israelhei zianga ril ranga Pumapa thu suak chu amah hih a nit.

Israelhei ta ranga Pumapa lungthlungna

² Pumapa khan a mihei ziangah, “Lung nangni kî thlung mai a nit,” a ti a. Khanniseh, anni khan, “Kin chunga ni lungthlungna chu taktiangah khan im ni înlang,” an ti a. Pumapa khan, “Esauva neh Jakoba khah urnaikah an nit a; nikhomsela, Jakoba neh archihei khah lung ki thlung a.

³ Esauva neh archihei rêk chu ki nel a, â tlânghei chu phûlpônin ki siam a, a ram chu ramchâr sihalhei ziangah ki pêk a,” a ti a.

⁴ Esauva richi, Edom mihei khan, “Ei khopuihei khah iseh ta khom sela, inding nôk ei ti,” an ti a. Khanniseh, Pumapa khan hingkan tîng a ti, “Anmanin siaminṭha nôk an ta chu, keiman isim nôk ki ti. Khanchu, mihei khan anni chu, ‘Ram porinche neh kumkhuaka an chunga Pumapa ningthikna pêl nam,’ tîng an ti,” a ti a.

⁵ Israelhei khan amakhah an mit ngêiin mûng an ta, “Pumapa chu Israel ramrî khêlin ai roinpui a nit, la tîng an ti,” a ti a.

Pumapan Thiampuhei a ngo

⁶ Pumapa Tinrêngthothei khan Thiampuhei ziangah, “O Thiampuhei, naipa khan a pa a chôiinrisâng ngai a, suak khan a pu a chôiinrisâng ngai, keimah hi nin pa ki nit a, ithôm nin ne chôiinrisâng no? Nin ruaitu ki nit a, ithôm nin ne marit no? Nin ne musit a, khan nangmanin chu, ‘Tikin im ner ming kin imusit?’ nin ti a.

⁷ Ki mâichâm chungah ibai porinche tak nin lan a, khan nangmanin chu, ‘Tikin im marit nang kin itho no?’ nin ti a. Ki mâichâm musit ioma nin siamna hih a nit nin ne musitna chu.

⁸ Ribôlna ranga mîring, a mitidel manih, a kebâi manih, â damino manih, nin ilan khah sual ai nit viat ino mani? Nin ram ioptu khah peh ta u, nangni lei lôm a tîm a? A nit nole, nangni lei ditsak a tîm a?” a ti a.

⁹ Khasikin, atûnah hin, O Thiampuhei, lung a nen kham theina rangin Pumapa ditsakna chu ngên rei. Hihei hih nangmani kut sintho ngêi a nit sikin nangni a lei iditsak rang mani?

¹⁰ Pumapa Tinrêngthothei khan, “Ki mâichâma mei nin isêminchok hi â tlong a nit; khasikin, nin lâia mi khatkah hin Tempil inkot khah khâr ta seh ṭha ual a ti. Nin chungah hin lômna rêng rêng kî nei ino a nit; nin kut ata thillan rêng rêng khom nangni ham pêk no ning e.

¹¹ Inî suakna rithoka a tlâkna dên khomin nam tin lâiah ker ming chu a roinpuia, mun tinah namhoi ki ziangah an lan a, thillan rithiang an lan a. Nam tin lâiah khom ker ming hi roinpuin ai om a nit.

¹² Khannisela, nangmanin chu mualphoi nin ne sak a, ‘Pumapa mâichâm chu â porinche a nit, khantaka a thei irâhei, a buhei khom khah musit iom a nit,’ nin ti a.

¹³ Khante, ‘Ringai ta u, changdong a om vang na!’ nin ti a, nin nâr nin ne non pêk a, nin ribôlna thillan rangin zâlrâta nin ilâk manih, a kebâi manih, â damino manih, nin hong lan a. Khangkana thillan khah nangni ki lei îpom pêk rang nin isôn mani?

¹⁴ A mîring lôm lâia achaltuai demnaboi, ki zianga lan ranga inkung isai tâk khom inei ṭian a, demna om ki zianga hong ilantu chu vânisalin om riseh. Keimah chu rêng roinpui tak ki nit a, nam tin lâiah khom iṭiom ki nit,” Tinrêngthothei Pumapa khan a ti.