FILEMONA 1 - PATHIAN LEKHABU RITHIANG

Chibai bûkna

¹ Paula, Krista Jisua sika mi tâng neh ei suapuipa Timothean kin malpa neh kin sinthopui Filemona neh

² ni ina inkhôm ngai koindang mihei neh kin farnu Afi hei, kin sipai champui Arkipa hei chibai kin bûk.

³ Pathian ei Pa neh Pumapa Jisua Krista ziang ata lungkhamna neh ringeina nin ziangah om riseh.

Filemona lungthlungna neh iamna

⁴ Suapuipa Filemon, ki ṭongṭai ikipah ner ming ichingin ki Pathian ziangah lômthu ke sîr ngai.

⁵ Pumapa Jisuaa ni iamna neizia neh mi rithianghei lung ni thlungzia ki lei riatin Pathian ziangah lômthu ki îsîr a nit.

⁶ Ki ṭongṭaina tak chu iamtuhei nitna sika ripôlkhômna ei inei tâk hin Kristaah khan ṭhatvurna tinrêng ei idonghei riatthiamna inthûk ual â thlun theina rangin a nit.

⁷ Suapui lungthlung, ni lungthlungna thu ki riatin ki lôm tak tak a, mi rithianghei lungril khah ne chok inhar tâk sikin ker thla a irngam a nit.

Paulan Onesima a ngênpêk

⁸ Hi sik takah hin Kristaa suapui ei nitnaah ni sintho rang nang ibe hih ngam khom inlang,

⁹ ni lungthlungna rian, keimah patar Paula, Krista Jisua sika mi tâng hin, ingênin nang kî ngên a nit.

¹⁰ Ki naipa Onesima, tâng ina kî nei ta ranga hin nang kî ngên a nit.

¹¹ Matonah khan chu ani hih ni ta rangin mangmunboi ni ngai khom seh, atûn chu ni ta rang neh ki ta rangin mi mangmuniom a nit tâk.

¹² Atûnah hin ki lungril murdi neh ni ziangah ki hong itir ikhîr a nit.

¹³ Thurchi Ṭha sika ke tâng sungah hin ani hih ner thûla ne san rangin ki ziangah lân om ki nuam tak tak a;

¹⁴ nikhomsela, ner cham iboiin chu îte sin nuam mang e. Ni lungkhamna chu nangma ata suak ni ngêt seh ki nuam sikin ani hih nang ituh pêk ngit kî nuam ino a nit.

¹⁵ Onesiman itôiteka nang ai mâk hi kumkhuaka ni dôn thalna rang sika khom a nit thei.

¹⁶ Atûn chu suak angkan ni khâi loiin, suak nêka â luh ual, suapui lungthlung tak a nit tâk; keima ta rangin a ditom tak tak a, nangma ta rang vângin chu taksa tiang neh Pumapaah khan ai ditom nôk ual rang a nit.

¹⁷ Khasikah khan, ni sinthopui inia ni ne be tak takin chu keima angkah takin ani hih lei lôm roh.

¹⁸ Ni chungah ai thonsual manih, a irtâng manih a omin chu keima irtângin lei ringai roh.

¹⁹ Keimah, Paula hin keima kut ngêia riziakin nang tuak ki ti kî ti a nit. Nangmah ngêiin ki ziangah nangmah neh nangmah ner tâng thu isîr itum chu ni mang e.

²⁰ Khanchu, suapuipa, Pumapa sikin hi thil hih ne tho pêk inla, Kristaa suapui nitnan ki lungril râifân ne sak roh.

²¹ Nang ki ngênna hih lôn tluk ngêt ni ti ki tûng ngit sikin ni ziangah ki irziak a nit hih, ki tûng nêka ṭha ualin tho ngêt ni ti kî iam a nit.

²² Pathianin ni ṭongṭainahei isâmin nin ziangah ne hong tir nôk a ti iti ki tûng a, tlung in rang ne lei ngaitua pêk roh.

Ithlânah chibai

²³ Epafra, Krista Jisua sika ke tângpuitu hin chibai nang a bûk.

²⁴ Khangkah ngirin ki sinthopui Marka hei, Aristarka hei, Dema hei neh Luka hei khomin chibai nang an bûk sa.

²⁵ Ei Pumapa Jisua Krista lungkhamna chu nin rêngka ziangah om riseh.