Sofonías 1 - Diósïri Karakata P´urheepecha Jimbo

I. JURHIATEKUA ENKA ACHA KURHUNHEPKA

¹ Imani jurhiatekuechani enka Josiasi irecheni jápka, Amoni uáp'a, Juda anapu irecha, ACHAeri uantakua Sofoniasïni niárakuspti Kusi uáp'ani, Kusi Gedaliasï uáp'espti, ka Gedaliasï Amariasï ka Amariasï Esekiasï.

II. AIANKPERAKUA ACHAERI JURHIATEKUERI KA ARHIP'ERAKUA SÉSI KÁMPERAKUERI

² ACHA ísï uantasti: Iámentu ampe k'amantskant'aaka enka echerintu jaka.

³ K'uiripuni k'amak'uaka ka ístu manakuarherichani, auantarhu anapu kuínichani ka japuntarhu kuruchechani. Noamparhati k'uiripuechani k'amantskant'auaka ka echerintu k'uiripuni k'amantskant'aaka. ACHA ísï uantasti.

⁴ Juda iretani nósesi kánt'aaka ka Jerusaleni anapuechani. Ka jima enka Báaliri ampe pakarani jakateru sésimentuni ampantskant'aaka, imani diósï eratakateri ampe nóteru ampema pakaraati ka Báaliri tátecheri jakankurhikua jamperi sési mirikurhinhaati.

⁵ K'amak'uauaka imani enkaksï iótakuarhu k'umanchekuarhu k'éri ampe arhiak'a auantarhu anapu jóskuechani, ka enkaksï ACHAeri jakankurhikua jimpo ka jinit'u Mikoliniri jakankurhikua jimpo uantak'a; eka ísïska.

⁶ K'amak'uauaka imani enkats'ïni jínteni jarhareka enkats'ïni no jirinhant'ak'a ka nóts'ïni ampe ma kurhamarheni.

⁷ ¡Ísku ja je ACHA Diósïni japarini, jimpoka ACHAeri jurhiatekua ant'aparhaskia! ¡ACHA uántikperakuani aiatspent'astia ka iámentuechaksï kéntakata jarhastia!

⁸ Imani jurhiatekua enka uántikperata aiatsperanhant'aaka, ji, ACHA, nósesi kántauaka jatsikuarherichani ka irecha uáp'echani ka iámentu enkaksï ísï xukuparhak'a eskaksï uérakua anapuecha enkats'ïni inchaakucheka.

⁹ Imani jurhiatekua nósesi kánt'auaka imani enkaksï nirak'a ka inchani máteru diósïchani k'éri ampe arhiani, enkaksï imecheri diósïcheri tióstarhu sïpakata ka k'arhap'erakua jima uinirak'a.

¹⁰ ACHA ísï uantaxati: Enka jurhiatekua niáraaka uinhachanhaati imani inchakuarhu enka Kurucha ataranhant'ak'a, máteru uapatsekuarhu anapuechaksï uinhachaati ka jirejimenhant'aati uananharhikutini ísï.

¹¹ Uera je cha Morteru uapatsekuarhu anapuecha, jimpokaksï iretarhu anapu atarantsticha uántikunhaaka. ¡K'amak'unhastiksï ima enkaksï tumina kámka!

¹² Enka ima jurhiatekua niáraaka ji erak'utarakua ma jimpo Jerusalenini jirinhant'aaka, ka nósesi kánt'auaka imani enkaksï sési mintsikuarheni jaka eska kauikua ampe enka sési patsakata jarhak'a. Kánekua nósesi kánt'auaka imechani enkaksï ísï eratsek'a: ACHA ni úk'i sési úni ka ni nósesi úk'i.

¹³ Jimpokaksï ísï eratsesïnka, imecheri jatsikuarhekua iámu ampe pákuarhenhaati ka imecheri k'umanchekuechaksï xerenhant'aati. K'umanchekuechanksï uáti, k'óruksï ima no jima irekaati, úbasïchanksï jatsikuauati, k'óruksï no ts'émuati kauikua.

¹⁴ Niáraxatia ACHAeri k'éri jurhiatekua, nóteru ióntani ima jurhiatekua niáraatia. Imani jurhiatekua k'amek'amechanhant'aati ka kánekua nósesi nitamakuarhenhani ka tsiueratichaksï jamperi kómu auati uantakuarheni eskaksï jarhuatanhaaka.

¹⁵ Kurhunhekua ampek'u jauati ima jurhiatekua, kómu jakua ka k'éri ma uantanheata; mámaru jánhaati ka iámentu ampe k'amantskanhant'aati páp'akanhaskuarheati, kómu jánhaskuarheati. Imani jurhiatekua k'umanharhikuati ka kómu jánteni.

¹⁶ Imani jurhiatekua sïuankuechaksï kústanhaati, ka uinhachanhaati eska uarhiperanhaxaka eskaksï k'érati iretecharhu niáraxaka enkaksï ma uirhipkurhani sési tsïntsïkuarhetini jaka ka eskaksï iótati k'umanchekua erap'atakuarhu niáraskia.

¹⁷ Ji k'uiripuni kómu jáarhataaka. Jimpokats'ïni k'amanharhichentaska ísïksï jámaati eskaksï ima enkaksï no exek'a, ka imecheri iurhiri t'upurini tarharaati etsakurhini ka imecheri k'uiripeta ísï márku únhaati eska manakuarhericheri kuatsita terenta úrakua.

¹⁸ Imani jurhiatekua enka ACHAeri ikiata niáraaka, nómpe máksïni uáti kuáp'eani, ni chári tiripiti ni mereari, jimpoka iámu echeri chpíri jimpo k'amak'unhaaka enka imeri ikiateka. ACHA, ariskusï k'amak'uauati echerintu anapuechani, eska mínharhini ka éskant'ani ka nóteru ampe ma jauatia.