Ester 1 - Diósïri Karakata P´urheepecha Jimbo

I. NÉNA ENKA UÉNAKA ÚKORHENI Irecha Asueru k'éri t'irekua ma úntaspti

¹ Jiáni ísï enka irecha Asueru juramuni jápka, kuímu ekuatse ka iúmu tsimani (127) k'érati iretechani juramukuaspti, India uératini ka Etiopia jamperi,

² imeri juramukua Súsa k'éri iretarhu uaxastakata jatsispti.

³ Ka enka irecha Asueru tanimu uéxurhini páni jápkia juramuni, k'éri ma t'irekua úntaspti ka p'ímarheaspti iámentu imeri jarhop'iri urhets'ïkurichani ka jántspirichani ka p'urhek'uti Persia ka Medo anapu urhets'ïkurichat'uksï niraspti ka k'éri juramuti iretarhu anapuecha ka juramuticha ireta sapirhaticharhu anapuecha,

⁴ ka irecha teruk'ani uéxurhini xarhatakuaspti na enka xáni kánekua jatsikorhekua jatsipka ka na enka xáni kánepka imeri uinhapekua,

⁵ enkaksï na inte jurhiatecha nitamapkia irecha máteru k'éri ma t'irekua úspti, enka iúmu tsimani jurhia t'irerpepka, imechani t'ireraspti enkaksï jima k'éri iretarhu Súsa jápka, k'érini ka sapichuni, t'ireraspti, k'uínchekua imeri k'umanchekuarhu inchaakutini úkorhespti enka tsïtsïki ampe jukapka,

⁶ takusï urapiti ka chúpiti sési pirirakorhentatixapti, piruakua ampakiti urapiti xarhisï jinkuni jotakorhetini ka piruakua uirhipu sapirhaticharhu inchaasïrempti enkaksï tiámu mereariri úkatepka, ka anhamarhekuarhu jóparhatakorheni ka anhamarhekuechaksï tsakapu urapiti pitsïpitiri úkatespti. Ka k'érati jatach'ukuecha tiripitiri ka tiámu mereariri jarhaspti ka jima sési meremeki jántespti ka pitsïki jak'arhani, ka tsakapu t'úpuki jasï ka tsakapu ampakiti sési jásï ka máteru uánekua sési jásï tsakapu ampakiti jatak'arhaspti.

⁷ Ka mámaru jásï kauikua anhasïrempti ka tsúntsuecha enkaksï atarempka tiripitirisptiksï mámaru járhati úkatecha, kánekua kauikua jarhaspti jimpoka irecha kánekua tsípentaxapka.

⁸ Ka kauinhasïrempti na enkaksï xáni uékapirinka, jimpoka irecha ísï arhiaspka imeri jántspirichani eskaksï no jámapirinka uinhapetarhu íntspeni.

⁹ Nana irecha Básti, imat'u t'irekua ma úntaspti eskaksï iámentu nanecha t'irepirinka, irecha Asuerueri k'éri k'umanchekuarhu.

¹⁰ Iúmu tsimani jurhia úni jámani, irecha kánekua tsípexapti xáni kauikua jimpo ka uantap'aspti imeri iúmu tsimani urhets'ïkuri jántspirini: Mejumani ka Bistani ka Jarbonani ka Bigtani ka Abagtani ka Setarini ka Karkasïni,

¹¹ eskaksï pákupirinka nana irecha Bástini ka eska ima inchats'ïntapirinka kanakua ka xarhatani eska kánekua sési jáxespka ka iretarhu anapuechaksï ka k'érati achamasïchaksï úni xéni na enka xáni sési jaxepka ima.

¹² Eka úpka nana irecha no uékaspti nirani, ka no kurhach'aaspti urhets'ïkuri jántspirichani, enka irechani axaapka. Ka imani jimpo irecha kánekua ikiaspti.

¹³ Ka irecha no ióntaspti mímixetichani kurhamarheani, jimpoka ísï p'intekua jarhaspka urheta juramukua mítetichani kurhamarheani eka ísï ampe japirinka.

¹⁴ Arisptiksï enkaksï irecha jinkuni jápka: Karsena ka Setari ka Admata ka Tarsisi ka Meresi ka Marsena ka Memukani, iúmu tsimani urhets'ïkuricha Persia ka Media anapuecha enkaksï irecha jinkuni sánteru jarhamekua jatsipka, ka juramukuaksï jatsini.

¹⁵ Irecha kurhamarheaspti: Eska juramukua na arhik'a ¿Néna uétarhesïni nana irecha Básti jinkuni enka irechani ísï no kurhach'aka enka ima uantakua axapka imeri urhets'ïkuri jántspirini jinkuni?

¹⁶ Ka Memukani, irechani japantiru ka juramukua urhets'ïkurichani japantiru uantaspti: Nana irecha Básti no irechankusï k'uratsetati ima iámentu juramukua urhets'ïkurichani ka iámentu iretarhu anapuechani ka jima uanontani ísï anapuechanisï k'uratsetaati.

¹⁷ Jimpokaksï iámentu nanakecha míteaka néna enka no kurhantiraka nana irecha, ka íni jimpo imat'uksï jámaati no kurhach'ani uámpechani, ka uantanksï: Irecha Asueru juramuspti eskaksï nana irecha Bástini pákupirinka ka ima no uékaspti nirani.

¹⁸ Jiánksïsï juramuticheri témpecha, Pérsia ka Media anapuecha míteati néna enka jámapka nana irecha Básti, ka imat'uksï mák'ueni káuati uámpechani, ka jiánisï sánteru no kurhantiranhaati ka ikiatsperanhani.

¹⁹ Ka ísï jimpo, enka irecha uantak'a eska sési jarhaska, eska juramukua pakatperakua ma karaaka, ka eska nónema úaka p'ikuntani o kúnharhitani ka ísï pakarani eska juramukua Pérsia ka Media anapueska: Eska nana irecha Básti nóteru méni niántaaka irecha Asueru jinkuni, ka eska nóteru nana irecheuaka. Ka jurak'ue máteru néma intsïnhani irechekua.

²⁰ Ka enka karakata uérakia, eska iápuru imeri irechekuarhu mítekorhiaka, ka ísï jámanksï iámentu nanakecha jánhanharhiauati imeri uámpechani, jatsikorherini ka no jatsikorheri.

²¹ Irecha, ka juramukua urhets'ïkurichaksï sési exespti eska Memukani na uantapka ka jánhastaani, ka irecha ísï úspti.

²² Ka iápuru irechekuarhu axaaspti juramukua karakatechani, ka iápuru ireta sapirhaticharhu, imecheri uantakua jimpo eskaksï ima úpirinka arhintani ka kurhankuni, eskaksï iámentu acheticha cheni jempoo jurakunu jatsiska.