Nahumi 1 - U TIENU MAAMA TILI 2013

Yaa bujiali n ye Ninivi dogu po 1

¹ U Tienu n maadi yaala Ninivi dogu po. O den doagidi laa bonla li bonlekaala nni, Elikosi yua, Nahumi po.

U Tienu pia i jeje ki go ŋani mo

² O Diedo tie yaa Tienu N pia li nunponli ki tuugi li panli. O Diedo tuugi li panli, O pabienli bia boncianla. O Diedo tuugi o koanginkaaba li panli Ki kan tieni o yibalinba po sugili mo.

³ O Diedo pali naa be tontoni, O paalu mo naa pia bianu. O kan nuali tuonbiadi daano Nani yua n ki pia tagili. O Diedo yaa fii ki cuoni naani, Ku tafaaciangu yen figi, A tawala mo tie o taana n fiindi yaa tangungoe.

⁴ O fu leni mi ñincianma Ke mi ñuudi ki kuodi cain, Ki teni ke i kpeni mo ñuudi. O teni ke Basan leni Karimeli yankpaafuana kuodi, Ke Liban puuma mo mali.

⁵ O yen teni a joaciama n digibi, A joabila mo n wudi, Ki tinga yen digibi o nintuali, Kani leni yaala n ye ki niinni kuli.

⁶ U Tienu pali yaa beni, Oba kuli kan fidi ki sedi. O pali yaa beni boncianla, Oba kuli kan fidi ki yaa ye. O pali co nani u mu yeni. A tana pudi ki yagidi o nintuali.

⁷ O Diedo tie yua n ŋani, Ki go tie wuonkaanu li pabiidili daali. O kubi yaaba n cua ki wuoni o kani bonŋanla,

⁸ Ba ki tabolinkaaga yogunu. Ama o baa deli o yibalinba ki kuani ba mi kuuma biigili nni.

U Tienu n maadi yaala Juda leni Ninivi yaaba po Juda badiba po

⁹ Yi kpaagi be yaa bonbiadile o Diedo po? O baa bolini yi yibalinba cain, Hali yaala ke bi kan go guani ki fii yi po.

¹⁰ Bi dañogaadili nni, Bi baa yaa tie nani yaa tugangu n fii ki loli yeni. Lani, bi baa buodi cain nani ku moapiengu yeni.

Ninivi dogu po

¹¹ O nilo fii yinba Ninivi yaaba siiga, Ki jagi o Diedo po yaala n bia. Li daano pia a yantiabiada.

Juda yaaba po

¹² O Diedo maadi leni Juda yaaba ki yedi: «Ba yi yibalinba yaa yabi ki go pia u paalu, Bi baa bolini ba, bi baa bodi cain. N den teni ke yi laa i fe, Ama n kan go tieni yi la.

¹³ Moala, n baa faabi yi Leni yi yibalinba mabinga, Ki cie ban loli yi yaa baabi.»

Ninivi bado po

¹⁴ Fini Ninivi bado, O Diedo jagi a po yaala n tie ne: «A kan go baa puoliŋuani, Yii n baa teni ke a yela kan bodi. A budiena nni, n baa bolini a buli, Ŋan kpie yii, bi ŋan duadi yii. N baa gbiidi yi takula, Kelima yii pia fuomiba kuli.»