Vaefeso 1 - Bhibhiliya Nya Guage

Gulosa

¹ Eni Pawulo, mupostoli wa Jesu Kristo khu gugola gwa Nungungulu, nyi ngu lovela sihathwa ni vakhodwa va Kristo Jesu va vbanyago dhoropani ga Efeso, kheni:

² Wuhigo ni gurula gwa Nungungulu Babe wathu ni gwa Pfhumu yathu Jesu Kristo gu na khale ni enu.

Makategwa ya Nungungulu ma guta khu ga Kristo

³ A na rungudzwe Nungungulu, Babe wa Pfhumu yathu Jesu Kristo, A hi kategisago khu makategwa yatshavbo ya Ndzadzini khu ga Kristo.

⁴ Gale, na gu si vangwi litigo, Nungungulu a hi hathide khu ga Kristo gasi hi khala sihathwa ni vathu nya ndruda nyambana gihoso mahoni gwaye.

⁵ Uye a hi hathide a hi vegisede wuhigo nya gu hi gire sanana Saye khu ga Kristo.

⁶ Gasi gu dhumisa gungangamela nya wuhigo waye, a hi ningidego khu ga Mwanaye nya gigodwa.

⁷ Guvbanya ha gu gu mana khavbo gwaye, khu novba waye hi mane gu tshulega ni gu divaledwa sighoho sathu khu gutala nya wuhigo waye,

⁸ a nga hi vbaladzelago na wu tade khu guti ni gupima.

⁹ A hi tulede guti sihalo nya gikungo nya guhaladze gwaye khu ga Kristo, kha nga edzi a nga bani a vegiside khidzo khu gale,

¹⁰ gukhuye si girege gutadzisegani nya matshigu: Gutshanganisa silo satshavbo si guromo Ndzadzini ni esi si guromo mafuni, a emisa Kristo kha nga hungo ni muthangeli.

¹¹ Khu gwaye Kristo, hi hathidwe nethu guya ningwa thomba nya guvbanyiswe hi lulamisedwego khu gale, lihaladzo a thumago silo satshavbo khu gudzina ni gugola gwaye.

¹² Kharati, ethu, gukhugela guhegulani, hi vegidego gitumbo gyathu ga Kristo, hi na embelela wudhumo waye.

¹³ Khu ga Kristo, enu nenu, mu pwide mahungu nya lisine, Ivhangeli nya guvbanyiswe gwanu, mu yi hakhidego khu gukhodwa, mu tiyisidwe khu gifungo nya Liphuvbo nya Guage hi nga bani hi tumbisidwe.

¹⁴ Khilo gitumbiso nya thomba yathu, eyi Nungungulu a yi vegisedego vathu vaye; olu hi ngarigu vbakari nya gulindrele, khilo Liphuvbo li hi ningago gutumba guya hakha thomba, gasi wu rungudzwe wudhumo waye.

Pawulo a ngu lombelela khu Vaefeso

¹⁵ Eni neni, na nyi pwide ndruma nya gukhodwe mu gu nago ga Pfhumu Jesu, ni lihaladzo mu gu nalo ga vatshavbo va khodwago,

¹⁶ kha nyi garali khu gubonga Nungungulu khu kotani gwanu. Nyi ngu mi alakanya milombeloni gwangu.

¹⁷ Gasi Nungungulu wa Pfhumu yathu Jesu Kristo, Babe nya wudhumo, a mi ninge Liphuvbo nya guti, ni gu mi tulela ndzila nya gu muti gwadi Nungungulu.

¹⁸ Nya gu lomba gukheni a wenengedze mapimo yanu, gasi mu pime gutumba muni mu ranedwago, muti gutala nya dzithomba a dzi vegisedego afela guya ninga va nya guaga;

¹⁹ guliwugisa nya tshivba a yi girago khu kotani gwathu, ethu hi khodwago. Khiyo tshivba yeyi a nga yi wonegisa khu tshivba ni tshivba

²⁰ khu guwusa Kristo khu ga vafudego, a gu mu khadzisa nyamudye gwaye Ndzadzini.

²¹ A mu vegide vbatshani nya mufumo ni wufumu, ni wugulu, ni tshivba ni malina yatshavbo ma thangisidwego, nasiri mafuni momu basi, aholu ni ga litigo li nga gutago.

²² Nungungulu vegide silo satshavbo vbavbatshi nya migondro ya Kristo, a mu emisa kha nga muthangeli nya silo satshavbo ni hungo nya Libandla.

²³ Ilo khilo givili gyaye; ilo khilo gutadzisega gwatshavbo gwa Kristo, a enedzago silo satshavbo ga vatshavbo.