SEFANIYA 1 - Bibliyeeda Ghaydit

¹ Nih ng'asheanda NG'UTAMIIDA weesa Sefaniya gil, was orjeeda Gushi, orjeeda Gedaliya, orjeeda Amariya, orjeeda Hesekiya, damanda waseewa Yosiyaheeda was orjeeda Amoni, sugoocheanda Yuda.

Eaweeda girgweageeda NG'UTAMIIDA

² “Gaydahuuyda haleanjeeda sean mida badayda ng'eanyiida,” nih gidarugu NG'UTAMIIDA.

³ “Gaydahuuyda siida ea diyeayda; gaydahuuyda dariidaka mida humng'eeda ea ghweayeega basooda. Gaydahista fuga munyas; ak gaydageandeawa giliwas sih badayda ng'eanyiida,” nih gidarugu NG'UTAMIIDA.

⁴ “Gaydaahaakta geatindeanyu dalas fuga Yuda, ea badayda fuga sean mida Yerusalemu; ak gaydabwar gheaptanga Baali ea gheawunga ashoohoodiga sanaamu;

⁵ ea giika inyeesa gwatkuy aba iheenga ghoorajeegean ea miinga mida humng'eedean; ea giika inyeesa gwatkuy nea ghwaak habeawooda aba heeda NG'UTAMIIDA ak gweaksa habeawooda Milkomu;

⁶ ea giika biikta bwadawiin nea mwaada geeshta NG'UTAMIIDA, ea giika magaseadayi NG'UTAMIIDA ghana ea moonyeariida ninyiin.”

⁷ Eena saw aba madeeda NG'UTAMIIDA was ASEETA! Aba gideaba eaweeda NG'UTAMIIDA nineekiit; aba gideaba NG'UTAMIIDA niidiing'diing'da lukghumeeda ak ghoaghaydit rabastaanyi.

⁸ Ak eaweedida bea lukghumeeda NG'UTAMIIDEAN– “Gaydalas fuga hees ea orjooga sugoodiga ea fuga sean ashuup hang'weaka maba eemeedeang'wa.

⁹ Aba eaweedida gaydalas giliwas sih naawa mughoonyeanda, ea giliwas sean anyiit gheeda siidaanyi haw gwadishta ea ng'uyeega.”

¹⁰ “Aba eaweedida,” girugu NG'UTAMIIDA, “gajeayiiy shookcheanda aba gidaghuuta dooshta siguura Ghweayeega, ea shookcheanda haw aba meatkweeda niirja bea mujiini, ea nyeashta haw bea giibeedeayda aba iheenga giijeega.

¹¹ Asi ooyeawda, Ea fuga abiita Makteshi! Aba gideaba fuga ageakshachi sean niisha; nea fuga sean adeeni lapiya sihuuyda.

¹² Aba damandida gaydagasa Yerusalemu aba gheaboonyanga, ak gaydalas fuga noas badahuuka ng'asheega nyaawa munyas, nea gwayeena aba jeesinga nyaawa, ‘NG'UTAMIIDA maygwasin gea miyaas, nea maygwasin gea munyas.’

¹³ Ak gajeegeanda haleanjeeda nyaawa, nea gealga nyaawa ghoah eemeega. Eara gwadeesa gealga, ea maygoobiida; ak eara ghang'aapta sabiibu, ea mwajeali difaayeadaanyi.”

¹⁴ Eaweeda haw bea NG'UTAMIIDA nineekiit, eaneeki nea ghwalamwajaan; nyeashta eaweeda NG'UTAMIIDA aang'waan, siida hoauur gooyeawda aba ghuuta haw aba hoowa.

¹⁵ Eaweeda nyarasta gajea askwearjeandida, eaweeda hirbabanda ea sawanadeeda, eaweeda nyariida ea datasta, eaweeda misaneeda ea duwunda, eaweeda shamooghuutka ea misaneeda haw,

¹⁶ eaweeda durumbeati ea nyeashta shooka ng'ucheeda, aba badayda mujiineeda sineaweesa hilgweanda majeek ea aba badayda madalajeega ng'ucheeda.

¹⁷ Ak gaydeadu sawanadeeda aba badayda buuneeda, ak gaygabadiiniida siida ng'oaw, aba gideaba niidiiy aba badayda NG'UTAMIIDA; ak foojeanda nyaawa gaygaweay gawuurji birjeanda, nea banyeega nyaawa gawuurji fiyeandooda.

¹⁸ Eara lapiyeeda nyaawa ghana dahaabu mayghoamu ghaweat saawa eaweeda nyarasta NG'UTAMIIDA. Aba beasta nyarastaanyi shissa ghaang', ng'eanyiisean gaygoosha aba beasta; ea ng'weaninda nyarastaanyi ak gaygahuuyda buuneesean mida badayda ng'eanyiida.