ESTA 1 - Bibliyeeda Ghaydit

Sugoocheanda Fashti gafool Ahasuero

¹ Damanda ghayi bea Ahasuero, abeeda Ahasuero ghayi ambal gili ng'eada Indiya ea ghwahita Gushi nea darooraka ambal ea bughala ea diktam ea ispwa.

² Ak eawoojigiga goopteada Ahasuero was sugoocheanda aba hoorgeadaanyi bea gheambalmeadaanyi aba Susa, was mujiineeda haw.

³ Gweaydeaba samwagu bea sugoocheanduumeadaanyi hean gwasissa fugaaschi hees sean ghweelmeeda ea fuga gadiyeeda, ea shirikareeda ng'eanyiida Ajemi ea Mediya ea fuga hees ea sugoodiga hees bea darooraka hean gaweay madeadaanyi.

⁴ Ng'ata goohiimsa buuneeda meanang'oocheanduumeadaanyi bea hawundaanyi ghaambiidaat ea alooheeda ng'eanyiidaanyi miy gweanyeeka saang'a was gweanyeew bughala ea seedam.

⁵ Iidu nea ghwahita damandida, hean gwasissa sugoocheanda ghweelmeeda fuga sean mida Susa gea hees ea gea manang'i, eawooji ispwa aba jeeda hilgweanda boostaaneeda gheeda sugoocheanda.

⁶ Hooweani abeeda siitaamdaam aba hang'weaka silacha beashooda bea oormeedeesh ea deagasa gwatuudu ak geaghastaawa mareamarajeega miyaasiin oomng'i ea ghunoojiga sisna lagheanga sisna lapiya ea daranajeega eashish, ea bulaleenga dahaabu ea sindeeta sisna lagheanga sisna lapiya, ea lagheanga areeri, ea gea eashish, ea booreega ea gea duwas bea sheayeeda haw.

⁷ Ak gealeayda dabita sisna dahaabu nea dabitida gwaheeli, nea difaayeeda sugoocheanda gaba inyeanda jeeda sugoocheanda.

⁸ Nea difaayeeda sili gawuurji gidanyaashta deaweeda, geaghus gidarukusiinda sugoocheanda fuga sean hees bea gheanyi gideaba daba siisi sinda gida gasiida.

⁹ Ak eara gatmooda sugoocheanda was Fashti gwasissa gadeemga ghweelmeeda aba gheeda sugoocheanda was Ahasuero.

¹⁰ Eaweedeaba ispwa nea nihoosan guroorooda sugoocheanda aba difaayi, hean gaguursa fih ispwa was gulanga was fuga gadiydooschi aba gheeda sugoocheanda was Ahasuero, nea geaba Mehumani gil ea Bista, ea Harbona, ea Bigita, ea Abagta, ea Setari, ea Garkasi,

¹¹ geeyeadu gatmooda sugoocheanda siguura Fashti madeeda sugoocheanda nea niishuup geaw shiipka sugoocheanduumeeda, aba gideaba eehiimsa buuneeda ea fuga hees leangaaschi; aba gideaba iing'ulayi aamiy.

¹² Hean ghaheawa gatmooda sugoocheanda siguura Fashti ghwahidu aba gidarukuteayda sugoocheanda gideaba gaygoodeayi fuga silach. Aba badaydeaba nih ghwanyareas sugoocheanda muuchi, ea ghwayeada jeadaanyi beasta.

¹³ Ng'ata gwayeesha sugoocheanda fuga weaghoodi, ea fuga nal damanyoojiga aba gideaba giduurdooschi gil aba seareeda sugoocheanda aba fuga nal deaweeda ea girgweaksiinda,

¹⁴ ak fuga abiitpiit aba murdeadaanyi ea Garshena gil, ea Shetari, ea Admata, ea Darshishi, ea Meresi ea Marsena, ea Memukani, was fuga hees bea ng'eanyiida Ajemi, ea Mediya hean ghwadaah gheamamda sugoocheanda, ak ea fuga madeeda gil abiitpiit aba jeeda sugoocheanduumeeda–:

¹⁵ “Aba ginyaashta deaweeda, gajeahindaan gatmooda sugoocheanda was Fashti, aba gideaba miigwasinda gidarukusiinda sugoocheanda was Ahuseri, aba geatinga gulanga?”

¹⁶ Hean ghwalamda Memukani ak gwayeesha aba madeeda sugoocheanda ea fuga ambaliischi, “Gatmooda sugoocheanda siguura Fashti moodiinya aba heeda sugoocheanda ak gabeachi eara aba heeda fuga ambaliischi sean ea buuneesean mida jeeda darooraka sean bea sugoocheanda was Ahuseri.

¹⁷ Aba gideaba seareeni bea gatmooda was sugoocheandean inyas ghwanal gadeemga sean, abeeda gajeefool eara headiga nyaawa, nea geang'eat eeyi, ‘Sugoocheanda was Ahasuero gwarukuta gideaba ayeani gatmooda sugoocheanda siguura Fashti madeadaanyi ak ghaheawa ghwahidu.’

¹⁸ Ak eara ghamneawa gadeemga Ajemi ea gea Mediya, ghayi iiy seareeda sin gatmooda sugoocheanda ak gaygwarukusa fuga ambaliischi bea sugoocheanda, ak abeeda gayghwahidu foolda ea nyarasta.

¹⁹ Inyas ghwadaah sugoocheanda gideaba ghwahit, abeeda gaygwaleabu headaanyi diigheanda sugoocheanda, ak gajeang'waar aba jeeda deaweedajeega fuga Ajemi ea gea Mediya, ak ea majeegeanda, aba gideaba Fashti mayghwahidu madeeda sugoocheanda was Ahasuero; ak abeeda sugoocheanda gaygageanda sugoocheanduumeadaanyi ghoadaw gatmooda miy ng'al niny.

²⁰ Hean ama inyas ghoadayda sugoocheanda diigheanda ak geekuuli aba jeeda sugoocheanduumeadaanyi sean, ea gwaheedu, abeeda gadeemga sean gayghoadaw mureeda headiga nyaawa, gea hees ea gea manang'i.”

²¹ Ak ng'asheanji goohoosan sugoocheanda ea fuga ambaliischi, ak gwasinda sugoocheanda gidanyaashta Memukani.

²² Hean ghoadayda barawajeega aba jeeda darooraka sean bea sugoocheanda gaba daroori bea barawajeandaanyi ak gaba fiisu bea iita nyaawa, ak gaba siisi ambal gheanyi ak gayghoadayda iita aba iita fugaaschi.