कुलुस्सियों 1 - पहाड़ी महासुईढाल 1 हाऊं पौलुस ज़ुण परमेश्वरा री मौरज़ी कु यीशु मसीह रौ प्रेरित ऊ, और विश्वासी भाई तीमुथियुसा री तौरफा कु तुमुलै इऐं चिट्ठी लिखाऊ। 2 मसीह दी तिऊं पवित्र और सौच़्च़ै विश्वासी भाईऊ लै लिखाऊ ज़ुण कुलुस्सै शैहरा दी रौआ ई। आमारै बाबा परमेश्वरा री तौरफा कु तुमुलै बौड़ी दया और शान्ति मिलदी थाका लागी। धन्यबादा री प्राथना 3 ज़ेबी आमै तुमुलै प्राथना कौरी ई, आमै प्रभु यीशु मसीह रै बाबा परमेश्वरा रौ धन्यबाद कौरी ई. 4 कैलैकि आमुऐ शुणौ आ कि यीशु मसीह माथै तुमारौ विश्वास आ, और सौभी परमेश्वरा रै लोगु कु प्यार छ़ाड़ाई। 5 तुमै एस एथीलै कौरा ई कैलैकि विश्वास और प्यारा री बुनियाद सै आश आ ज़ो तुमुलै सौरगा दी आ छ़ाड़ी औन्दी, ज़ेथरै बारै दी तुमुऐ तेस खुशी री खौबरी रै सौच़्च़ै वचना दी शुणी ऐरौ आ, 6 ज़ो तुमु काऐ पौउंच़ौ आ। इयौ परचार लोगुऐ तुमुकै शुणाऔ आ तिणी ई लोगुऐ कई देशा दी शुणाऔ आ। तेस वचना कौरी भौरी लोगु री ज़िन्दगी बौदल़ुई गोई ज़िणी तुमारी ज़िन्दगी बौदल़ुई आ। तुमुऐ परमेश्वरा री बौड़ी दया री सौच़्च़ाई रवाई आ। 7 तेसी री शिक्षा तुमुऐ आमारै आच़्छ़ै गोश्टण इपफ्रास कु पाई, ज़ो आमु आइलै मसीह रौ विश्वास वाल़ौ सेवक आ। 8 तिणीऐ तुमारै प्यारा लै ज़ो आत्मा दी आ आमु माथै पौगड़ौ कियौ। 9 एथीलै ज़ेज़ै दिना कु इणौ शुणौ सा, ता आमै भी तुमुलै सौदा प्राथना कौरी ई, कि परमेश्वरा री आत्मा तुमुलै औकल और सौमझ़ दिया ताकी तुमै तेसरी इच़्छ़ा आच़्छ़ा कौरी सौमझ़ा, 10 ताकी तुमारौ बरताव कौरी प्रभु लै इज़्ज़त मिला, और परमेश्वर तुमारी हर बुशा कु खुश हुआ, कि तुमै सारै रौंगा रै भौलै काम कौरदै थाका लागी, और परमेश्वरा री पैहच़ाणा दी बौड़दै रौऔ। 11 हाऊं प्राथना कौराऊ कि परमेश्वरा री महिमा री शक्ति कौरी सौभी रौंगा री शक्ति कु तागती वाल़ै औन्दै रौऔ, इदरा झ़ांऊ कि तुमै खुशी और सौबरा आइलै आपणै दु:ख सहन कौरी बौल़ा। 12 तुमै बाब परमेश्वरा रौ धन्यबाद कौरदै रौऔ, ज़ुणिऐ आमै एस लायक चाणै कि प्याशै दी परमेश्वरा रै लोगु आइलै ज़ायदादा दी हिस्सैदार रौऔ। 13 कैलैकि परमेश्वरै ई आमै शैताना री तागती कु छ़ुड़ाइयौ आपणै आच़्छ़ै छ़ोहरु रै राज़्य दी आणै ई। 14 आमुलै तेथी रै ज़ौरिऐ आमुलै छ़ुटकारौ मतलब पापा री माफी मिला सा। मसीह बौड़ौ परधान और तेसरै काम 15 मसीह ता नाईं दिशणै वाल़ौ परमेश्वरा रौ ज़िणौ रूप और सारी धौतरी दी सारेऊ कु ज़ेठौ और बौड़ौ परधान आ। 16 कैलैकि तिणीऐ सारी च़िज़ै चाणी, च़ाऐ सै सौरगा री आ च़ाऐ सै धौतरी री, च़ाऐ सै दिशणै वाल़ी ई च़ाऐ नाईं दिशणै वाल़ी ई, का राज़गद्दी, का राज़, का राज़ कौरणै वाल़ै, का हक्क, सारी च़िज़ै तेसरै ज़ौरिऐ और तेसी री सेवा लै ई चाणी औन्दी। 17 मसीह सौभी च़िज़ेऊ बौणनै कु पैहलै मौज़ूद थौ, और सारी च़िज़ै तेसी री मौरज़ी कौरी काम कौरा ई। 18 मसीह कलिसिया री अगुवाई कौरा आ, ज़िणौ आदमी रौ मूंड आदमी रै शरीरा री अगुवाई कौरा। सेऊ सौभी कु पैहलौ आ और मौरै औन्दै मांझ़िऊ कु ज़िउंदौ हुणै वाल़ौ दी भी सौभी कु पैहलौ आ कि सौभी बुशै दी सेऊ ई बौड़ौ परधान हुआ। 19 कैलैकि बाब परमेश्वरा री खुशी एथीई दी आ कि परमेश्वरा रौ गुण मसीह दी वास कौरा। 20 परमेश्वरै आपणौ छ़ोहरु भेज़णै रै बारै दी सुंच़ौ ज़ुणिऐ आपणौ लोऊ बहाऔ और क्रुसा माथै मौरौ। परमेश्वरै एथीलै कियौ ताकी तेसरै और सौभी च़िज़ेऊ मांझ़िऐ मेल-ज़ोल औआ। इणै कौरी तिणीऐ आपणै और तिऊं सारी च़िज़ेऊ मांझ़िऐ शान्ति चाणी च़ाऐ सै धौतरी माथै री ई, च़ाऐ सै सौरगा माथै री आ। 21 तुमै ज़ुण पैहलै परमेश्वरा कु दूर थै और बुरै कामा री वज़ाह कु ज़िवा कु दुश्मन थै। 22 पर आबै परमेश्वरै मसीह रै मौउता रै ज़ौरिऐ तुमु आइलै भी मेल-ज़ोल कौरी ऐरौ ताकी तुमु आपु काऐ पवित्र और बेदाग और बेकसूर चाणियौ खौड़ौ कौरा। 23 अगर तुमै मसीही रै विश्वासा री पौई दी मज़बूत बौणी रौआ, और तेस खुशी री खौबरी री आश ज़ो तुमुऐ शुणौ आ नाईं छ़ाड़ा, ज़ासरौ परचार दुनिया रै सारै लोगु मांझ़िऐ कियौ आ। और हाऊं पौलुस, खुश खौबरी शुणाउणै रौ सेवक बौणौ। कलिसिया रौ सेवक-पौलुस 24 आबै हाऊं तिऊं दुखा री वज़ाह कु खुशी मौनावा ऊ, ज़ो तुमुलै उठावा ऊ, और मसीहा रै दुखा री कामी तेसरै शरीरा लै, मतलब कलिसिया कालै, आपणै शरीरा दी पुरौ कौराऊ। 25 परमेश्वरै हाऊं एथीलै च़ुनौ कि तेसरी वचना रौ आच़्छ़ा कौरी परचार कौरु और तेसरी वज़ाह कु, हाऊं कलिसिया रौ सेवक बौणौ। 26 मतलब तेस भेदा रौ ज़ो जुग और पोसता कु छ़ुपी रौऔ, पर आबै परमेश्वरा रै तिऊं लोगु माथै पौगड़ौ हुऔ। 27 परमेश्वरै इणौ फैसलौ कियौ कि तेसरै लोग एस शानदार और महिमा वाल़ौ राज़ ज़ाणी बौल़ा ज़ो सारै लोगु लै तेसकै आ। इयौ राज़ मसीह आपु आ ज़ो तुमु सारेऊ लोगु मांझ़िऐरौआ आ, सिरफ सेऊ आमारी महिमा लै आमारी आश आ। 28 आमै मसीह रौ परचार कौरीयौ हर एक आदमी लै परमेश्वरा री देई ऐन्दी बुद्धी कौरी शिक्षा देइयौ खौबरदार कौरी ताकी आमै इणौ देखुलै कि हर एक विश्वासी परमेश्वरा काऐ खौड़ी हुणा लै पाकौ हुआ। 29 एथीलै हाऊं तिंया शक्ति रै ज़ौरिऐ तना-मौना कौरी मैहनत कौराऊ ज़ो मुलै मसीह कु मिला आ, और सेऊ मुंदी काम कौरा आ। |
This work is licensed under Creative Commons Attribution-ShareAlike 4.0 License.