1 पतरस 1 - पहाड़ी महासुईढाल 1 हाऊं पतरस तुमुलै इऐं चिट्ठी लिखाऊ ज़ुण प्रभु यीशु मसीह रौ प्रेरित ऊ। हाऊं इऐं चिट्ठी तिऊं परदेसिऊ लै लिखाऊ, ज़ो पुनतुस, गलातिया, कप्पदूकिया, आसिया और बितूनिया परदेशा दी अलग-अलग शैहरा दी रौआ ई। 2 परमेश्वर बाबै भौरी पैहलै तुमै आपणै लोग चाणना लै और पवित्र आत्मा रै ज़ौरिऐ पवित्र कौरना लै छ़ांटणै रौ फैसलौ कियौ थौ। तिणीऐ इणौ एथीलै कियौ ताकी तुमै यीशु मसीह रै हुकम माना और तेसरै लोऊ रै ज़ौरिऐ शुद्ध हुआ। हाऊं प्राथना कौराऊ कि परमेश्वर तुमुलै भौरी का बौड़ी दया और शान्ति दिया। एक ज़िउँदी आश 3 आमारै प्रभु यीशु मसीह रै बाब और परमेश्वरा रौ धन्यबाद औआ, ज़ुणिऐ आपणी बौड़ी कृपा रै मुताबिक आमै यीशु मसीह रै मौरै औन्दै मांझ़िऐ कु ज़िउंदै हुणै ज़ौरिऐ, ज़िउंदी आशा दी नौंवौ जनम दैऔ आ। 4 मतलब की आमुलै सै विरासत मिला ज़ो अविनाशी और साफ और अजर आ, ज़ो तुमुलै सौरगा दी आ छ़ाड़ी ऐन्दी, 5 परमेश्वर आपणी बड़ी शक्ति रै ज़ौरिऐ तुमारी देखभाल़ कौरा आ कैलैकि तुमै यीशु माथै विश्वास कौरा ई। सेऊ तुमु आखरी बौगता झ़ाऊं सौंभाल़ा आ ज़ेबी मसीह वापिस आशा लौ। तैबै तुमै ज़ाणालै कि परमेश्वरै तुमै पाप और मौउता कु पुरै तरिकै कौरीऐ बौच़ाऐ ई। 6 इऐ तुमुलै बड़ी खुशी री बूश आ, हालांकी इबी, थोड़ै बौगता लै तुमुऐ कई रौंगा री मुसीबतै जा सौइणै। 7 तुमारौ विश्वास सुनै ज़िणौ आ ज़ो आगी दी आ पौरखौ औन्दौ। और इऐ मुसीबतै इणौ साबित कौरा ई कि तुमारौ विश्वास तेस सुनै कु ज़ादौ किम्मती आ ज़ो नाश हुई सौका आ। इणै विश्वासा री वज़ाह कु यीशु मसीह रै वापिस आशणै रै बौगता दी तुमुलै बौड़ाई, महिमा और इज़्ज़त मिला आ। 8 यीशु कु तुमै बिण देखी ई प्यार कौरा ई, और आबै ता तेस माथै बिण देखी भी विश्वास कौरीयौ इणै खुश और मगन हुआई, ज़ो सुंच़णै कु भी बाइरै और बौड़ाई कु भौरवौ औन्दौ आ। 9 और आपणै विश्वासा रौ इनाम, मतलब आत्मा रौ छ़ुटकारौ पा आ ई। 10 एज़ै छ़ुटकारै रै बारै दी तिऊं भविष्यवक्तुऐ भौरी लोड़ौ और ज़ांच़-पड़ताल़ की आ, ज़ुणिऐ तिऐं बौड़ी दया रै बारै दी ज़ो तुमु माथै हुणै वाल़ी थी, भविष्यवाणी की थी। 11 मसीह री आत्मा तिंउदी थी, और तिउंलै बोला थी कि मसीह किणै कौरी दु:ख साहा आ, और किणी बासिऐ तेसलै बौड़ी इज़्ज़त मिलणी आ। तिंउऐ इणै ज़ाणनै री भौरी कोशिश कौरी कि मसीह कुण औणौ आ, और इऐ सारी बुशै केबी औणी ई। 12 परमेश्वरै तिऊं भविष्यवक्तु माथै पौगड़ौ कियौ कि तिउंरी खौबर तिऊं लै नाईं थी पर तुमुलै थी। इऐ खौबर यीशु मसीह रै बारै दी खुश री खौबर आ, ज़ो तुमुऐ इबी शुणी आ। परमेश्वरै सौरगा कु आपणी पवित्र आत्मा भेज़ी ताकी सै लोगु री खुश-खौबरी रौ परचार कौरणै दी मज़द कौरा। इयौ सारौ एती नोखौ आ, इदरा झ़ाऊं कि सौरगदूत भी इऊं च़िज़ु ध्याना कौरी देखणै री इच़्छ़ा कौरा ई। च़ोखी ज़िन्दगी ज़िउणै लै औटाइणौ 13 एथीलै मन त्यार कौरौ और खौबरदार रौइऔ तिऐं बौड़ी दया री पुरी आश छ़ाड़ौ, ज़ो यीशु मसीह रै पौगड़ौ हुणै रै बौगतै तुमुकै मिलणै वाल़ी आ। 14 परमेश्वरा रै हुकम मानणै वाल़ै लोल़डेऊ ज़िणै औणै री वज़ाह कु तिऊं बुरै कामा री इच़्छ़ा नाईं कौरौ ज़िणौ पैहलै कौरा थै ज़ेबी तुमै परमेश्वरा री सौच़्च़ाई नाईं ज़ाणा थै। 15 पर ज़िणौ तुमारौ औटाउणै वाल़ौ पवित्र आ, तिणी ई तुमै भी आपणै सारै चाल-चलणा दी पवित्र बौणौ। 16 कैलैकि पवित्रशास्त्रा दी आ लिखौ औन्दौ कि, “पवित्र बौणौ, कैलैकि हाऊं पवित्र ऊ।” 17 और ज़ेबी तुमै परमेश्वरा कु, “ओ बाब” औटाइयौ प्राथना कौरा ई, ज़ुण बिणा पक्षपात कौरीऔ हर एकी रै कामा रै मुताबिक फैसलौ कौरा आ, ता तुमै सौदा तेसरी इज़्ज़त कौरौ ज़ेबी तुमै इऐं धौतरी माथै परदेशी ज़िणै ज़िवा ई। 18 कैलैकि तुमै ज़ाणाई, कि तुमारौ बेकार च़ाल-च़लण ज़ो दादै-परदादै कु आ च़ालौ औन्दौ, तेथकु तुमारौ छ़ुटकारौ सुनै-च़ांदी मतलब नाश औणै वाल़ी च़िज़ा रै ज़ौरिऐ नाईं हुऔ। 19 पर बेदाग और बिण पापा रै गाबड़ु मतलब मसीह रै किमत्ती लोऊ कौरी हुऔ आ। 20 मसीह दुनिया बौणनै कु पैहलै थौ च़ुनौ औन्दौ, पर आबै आखरी जुगा दी तुमारी मज़द कौरना लै पौगड़ौ हुऔ। 21 तेसरै ज़ौरिऐ तुमै परमेश्वरा माथै विश्वास कौरा ई, ज़ुणिऐ सेऊ मौरै औन्दै मांझ़िआ कु ज़िउंदौ कियौ, और तेसलै महिमा देई, कि तुमारौ विश्वास और आश परमेश्वरा माथै हुआ। 22 कैलैकि तुमै सौच़्च़ाई मानणै रै ज़ौरिऐ शुद्ध ई किऐ औन्दै, ता आबै तुमुऐ आपणै साथी विश्वासिऊ आइलै सौच़्च़ाई कौरी प्यार कौरणौ च़ांई। एकी दुजेऊ आइलै इम्मानदारी और पुरै ज़िवा कौरी प्यार कौरदै थाकौ लागी। 23 कैलैकि तुमुऐ खातम औणै वाल़ै नाईं पर केबी भी खातम नाईं औणै वाल़ै बीजा कौरी परमेश्वरा रै ज़िउंदै और सौदा रौइणै वाल़ै वचना कौरी नौंवौ जनम पाऔ आ। 24 पवित्रशास्त्र इणी ई बोला आ, “कैलैकि हर एक प्राणी घासा ज़िणौ आ, और तेसरी सारी शोभा घासा रै फुला ज़िणी आ, घास शुका और फूल झौड़ाई, 25 पर प्रभु रौ वचन जुगा-जुगा झ़ांऊ पाक्कौ रौआ आ।” और इयौ वचन मसीह रै बारै दी खुश-खौबरी आ ज़ेथरौ तुमुकै परचार आ कियौ औन्दौ। |
This work is licensed under Creative Commons Attribution-ShareAlike 4.0 License.