यहुदा 1 - बारेली पावरी

सुभेच्छा

¹ यहुदा भूनी गोथो जो येसु मसिहन दास एने याकुबोन भाश छे, तीनुक बुलावलान नावे जो परमेश्वरोन बासोमा मोंगावा एने येसु मसिहन कोरता वारला छे.

भुरसान कोरता मेहनोत

² दया एने शांती एने मोंग तुमुक जादात जोळतो रोये.

³ हे मोंगावा, जेतार मे तुमुक तिना छुटकारान बारामा लिखनेमा जादा मेहनतसी प्रयत्न कोर रोयू होतु जीनामा आमु आखा भागीदार छे, ती मे तुमुक यो सोमजाडनो जोरुरी जान्यू कि तिना भुरसान कोरता पुरो कोयीन कोरु जो चुखला माणसो काजे एकुत कावार सोपाय गोयलो होतो.

⁴ काहाकि कोतरा ओसा माणसे चुराये आमरेमा आवीन मेवायला छे, जिंदरो इना दोंडोन बारामा जुनले टेमोमा पेहेले गोथो लिखाय गोयलो होतो, ये भोक्ती नी कोरने वावा छे, एने आमरा परमेश्वरोन दया काजे लुच्चायमा बोदोल देतला छे, एने आमरू एकुत मालिक प्रभू येसु मसिहन इनकार कोरतेला छे.

⁵ बाकीन कोदापी तुमु आखा वाते एक कावार जान गोयला छे, ती भी मे तुमुक इनी वातोन फोम देवाळणे हिंडो कि प्रभू एक जात काजे मिसर देसोसी छुळावने बाद भुरसू नी मेकने वावा नाश कोर देदु.

⁶ ओवतेन जे सोरग दूते आपना पोदो काजे जागेत नी राख्या नी तेत्यार आपना नेचला रोयने काजे छुळ देदा, चे इनुक बी तिना भाशोन दाहळान नियावोन कोरता आंदारलामा, जू ओमोरकाईन कावोन कोरता छे, बांदलो राखलु छे.

⁷ जिना रितीसी सदोम एने गोमोरा एने हिंदरा साते वावा गाव, जे हिंदरेन तोसो भुंडला विचार वावा होय गोयलो होतो एने पारका डीलो पोछोव लाग गोयला होता, आगठान ओमोरकाईन दोंडमा पोळीन दाखलु बोन गोयला छे.

⁸ तिना रितीसी जे सोपनो देखणे वावा बी आपना-आपना डीलो काजे विटोव कोरतेला, एने प्रभूता काजे विटोव जानतेला छे, एने उचला पोदो वावा काजे वारु भुंड कोयतेला छे.

⁹ बाकीन प्रधान सोरग दूत मिकाईल, जेतार भुतडासी मुसान धोळन बारामा वाद विवाद कोऱ्यु, ती तीनाक भुंडो-भुंडो कोयीन गुणू लागाळनेन हिंमत नि कोऱ्यु बाकीन यो कोयू, “प्रभू तुसेक लोळे.”

¹⁰ बाकीन ये माणसे जिनी वातो काजे नि उवख तेला तीनुक भुंडो-वारू कोयतेला, एने जिनी वातो काजे उचला लाव डीलोन जोनावरे सारको स्वभाव सी जानतला लाव छे, तिनामा आपना खुदो काजे नाश कोरतेला छे.

¹¹ तिंदरे पोर हाय काहाकि चे केनोन तोसी चाल चाले, एने दाहाळकीन कोरता बिलामोन तोसा खतोम होय गोयला छे, एने कोरहन तोसा खिलाप होयीन खतोम होय गोयला छे.

¹² जे तुमरी मोंगोन सभामा तुमरे पुठी खातला-पितला, दोरीयामा डूकायला दोगळा सारखा छे, एने बेधडक आपनोत पेट भोरनेवावा राखवाव्या छे; चे बिना पाणीवावा वादवो छे, जीनुक वाहवो उळाव ली जातलो छे; पांटा गोवनेन बिना फोवोन झाड छे, जे दुय कावार मोर गोयला छे, एने मुवोम गोथा उखवी गोयला छे;.

¹³ ये दोरीयान जादा झेलके छे, जो आपनी लाजोन फेन उछावतेला छे; जे चोमोकने वावा तारा छे, जिंदरेन कोरता हमेशान कोरता आंदारो मेकाय गोयलो छे.

¹⁴ हनोख बी जो आदोम सी सातवी पीडी मा होतु, इंदरा बारामा यी भविष्यवाणी कोऱ्यु, “देखू, प्रभू आपना लाखो चुखला साते आयु,

¹⁵ कि आखान नियाव कोरे, एने आखा भोक्ती नि कोरणे वावान कामोन बारामा जे चे भोक्ती नि कोरणे वावा नि बोनीन कोरला छे, एने तीनु आखा काठला वातोन बारामा जे चे भोक्ती नि कोरने वावा पापी हिंदरा खिलापमा कोयला छे, गुणावा ठेराया.”

¹⁶ ये ते असनतूष्ट कुरकुर कोरणे वावा एने आपना भुंडला मोर्जीन अनसारे चालने वावा छे, एने आपना मुयोसी मोटायन वाते बुलतला छे एने चे फायदान कोरता मुये देखीन बोढाई कोरतेला छे.

प्रयत्नशील बोनला रोयू

¹⁷ बाकीन हे मोंगावा, तुमु हिनी वातोन फोम राखू जू आमरू प्रभू येसु मसिहन प्रेषितोन पेहेले कोय देदला छे.

¹⁸ चे तुमु काजे कोया कोरता होता, “पोछला दाहळामा ओसला मोजाक कोरने वावा होयसे जे आपना भोक्ती नी कोरणे वावान भुंडला मोर्जीन अनसारे चालसे.”

¹⁹ ये चे छे जे फुट पाळतला छे; जे डीलोवावा माणसे छे, जीनामा आत्मा नी होय.

²⁰ बाकीन हे मोंगावा, तुमु आपना जादा चुखला भुरसामा बोढती कोरता जायीन एने पवित्र आत्मामा प्रार्थना कोरता जायीन,

²¹ आपना खुदो काजे परमेश्वरोन मोंगसी बोनावीन राखू; एने ओमोर जीवनोन कोरता आमरा प्रभू येसुन मसिह दयान वाट जुवता रोयू.

²² इनापोर जो शंकामा छे दया कोरु;.

²³ एने जादा जोनानु काजे आगठामा गोथा वाचाडू एने जादा जोना पोर बिक पुठी दया कोरु, बाकीन तिना छिंदरासी बी सिगी कोरु जे डीलोन लारे गुणावा होय गोयला छे.

परमेश्वरोन स्तुती

²⁴ हिमी जो तु ठूकर खाणेसी वाचाड सोकतलु छे, एने आपना महिमान भरपुरीन सामने मग्न एने निरदोष कोरीन उबु कोर सोकतलु छे,

²⁵ तिना एकुत परमेश्वर आमरू छुटकारू कोरणे वावान महिमा एने गौरव एने पराक्रम एने होक, आमरू प्रभू येसु मसिहन लारे जोसो संसारोन पेहेले गोथो छे, हिमी बी होये एने हमेशा-हमेशा रोये. आमेन.