2 Wəshi nyi Mene Ka Meghe 1 - Ghena ta Shala

GHENA TA SALOMON, MEGHEA KA ISRAYƐL 1–9

¹ Pa Salomon, wəzege ta David zhɛrete meghea ŋkɛ berete. Nahe Shala Mahwətə ta ŋkɛ kenza kənə ba'a kezhɛrete ŋkɛ kameghe nya wəba.

Salomon 'yɛwakɛ ntsehwele kesleke ŋkwa va Shala

² Pa Salomon hekakɛ pɛtɛa ka Israyɛl, mbelia jama ta ka sewajɛ ba'a nyi te ghəa wəvəsəa ka sewajɛ, ka meha ghwə ba'a mbelia jama nyi te ghəa pɛtɛa ka Israyɛl.

³ Le yɛ mbeli nyi ketsene yitea hɛ, pa hɛ lə kadzete ŋkwa nya keveyi geva kaŋa Shala mbe Gabawon. Kwa nza ŋkɛ tagha cɛ lekwesa kebegeme geva, nya slate Moyize nde mene slene ta Mahwətə kwamte te ɓerama.

⁴ Nahe David kekeleke səndəkwə nya keveyi geva kaŋa Shala se mbe Kiriyat-Yɛyarim kadzeme Zhɛrəzalɛm ba'a keveyi ŋkɛ te ŋkwa nya hite nda mbeli mbe cɛ lekwesa.

⁵ Ama pa veyi reghwetɛ nya kwa mze nya vɛsəte Basalɛl, wəzege ta Əwri shia Həwr, te kema ta cɛ lekwesa ta Mahwətə mbe Gabawon. Te ŋkwa shɛ lə Salomon le mbeli nyi kebeghe ŋkɛ ka'yɛwe ghena va Mahwətə.

⁶ Tagha, tarame Salomon pelɛ reghwetɛa mze kwa tɛawetɛa te kema ta Mahwətə, pa dzeghekɛ nda melɛ le wəshi keseɗa slibə takwa takwa yitea cɛ lekwesa nya kebegeme mbeli mbe le Shala.

⁷ Ma heviɗia shɛ ne, pa Shala ncɛte nda geva ke Salomon, ma ke shɛ: «Wa wəsə nya nza 'ya kandeke ŋa wa? 'Yɛwete ŋkɛ va 'ya.»

⁸ Ma ke Salomon zhɛnete nda: «Kwele kwele menete nda ganyɛ na ke yiteyɛ ɗa David, tsetsenya tse, pa na veyi ɗa kameghe te ŋkwa ŋkɛ.

⁹ Tsetsenya tse gɛ Shala Mahwətə, nahe na keyipəte meɗe mɛ nya meɗeyi nda na ke yiteyɛ ɗa. Pa na veyi ɗa kameghea mbeli kwele kwele kala ndaleghe.

¹⁰ Ndeke ɗa ntsehwele le ɗepe neheve nza ta ghena nda nza 'ya kamenete nza te ghəa mbelia shɛhɛ. Ma keɗema tsagha ne, kanzate nza wəndə te ghəa mbelia ŋa nyi kwele kwele nyi we.»

¹¹ Ma ke Shala sha Salomon: «Ke'yɛwete mcɛlə na we, ya zləvəa ghəa ŋa, ya mpə ta ka ghema ta ŋa, ya temə teghweme we. Kala zəzə ta ŋa nya wəba nya ne, pa na 'yɛwakɛ ntsehwele le ɗepe nehe ghena, kezha ɗepe mene kwele te mbelia ɗa, nyi veyi ŋa 'ya kameghe te ghəa nci.

¹² Vatse gɛ, katekemave ntsehwele na le ɗepe nehe ghena. Ɓiyitsa kateve ŋa mcɛlə nya wəba 'ya ba'a zləvə. Kakemave na kwele ma ke kweci ka meghe nyi kese te kema ta ŋa, le nyi te sebe ta ŋa.»

¹³ Ntəŋə Salomon slənyɛ te ŋkwa nya keveyi geva kaŋa Shala mbe Gabawon te ŋkwa nya nza cɛ lekwesa kebegeme geva, kazhɛneke geva kadzembe Zhɛrəzalɛm kamene slene ta nza kameghea ka Israyɛl.

Berete le mcɛləa Salomon

¹⁴ Pa Salomon tsenete wəmata gədəwə kezha mpa ba'a gədəwə: pa kemave 1.400 wəmata gədəwə ba'a gədəwəa lɛmə 12.000, pa nteyi kweci mbe Zhɛrəzalɛm tagha yite, pa neheyi kweci mbe meleme nyi hite ŋkɛ kezha hɛ.

¹⁵ Te zlaɓa ta meghe ne, kwele kwele cɛdɛ le yɛ mze kwa tere tere kala pelɛ mbe Zhɛrəzalɛm, nahe yɛ lekeleke kenza kwele kwele kala mekweɗa nyi kepese te hɛɗi nya kwake kwake.

¹⁶ Se mbe Ɛzhipte ba'a Silisi gədəwəa lɛməa Salomon, ŋkwa nyi pake nda hɛ ka zhɛre dzeve te ke meghe.

¹⁷ Ma ka zhɛre dzevea shɛhɛ ne, se mbe Ɛzhipte pa wəmata gədəwə kwetɛŋe hɛ kadəɓərəa mze kwa tɛawetɛa gwəmsə ŋkwaŋe, ma gədəwə kwetɛŋe ne, dəɓərəa mze kwa tɛawetɛa gwəmsə ba'a mcɛfemsə nza ŋkɛ. Mbe kele nda hɛ ke meghea ka Hɛt ba'a ke meghea ka Siri perə.

Salomon kahi geva yitea ŋa ta ghɛa Shala

¹⁸ Nahe Salomon kezəzəte kaŋa nda ghɛ ke Mahwətə, tsagha ghɛa meghe kezha ghəa ŋkɛ.