Habhakuki 1 - Bhiblia Yo Sawuleka

Kutitsetsa ka Habhakuki

¹ Kulamulwa ku nga wombwa ka mprofeti Habhakuki ngu txiwoniso.

² Ni na dila kala yihi mbimo Mkoma, na awe u si ni engisi kani? Ni na peka huwa: Nadawoo! Kasi khu ni hulukisi kani?

³ Ngu kutxani u ni wonisako to biha kani? U ni wonisako tingana kani? Nguko kuhoxota ni kuxanisa si masoni kwangu; kambe ku ni wule a wusako dizunga ni mnandu.

⁴ Ngu mhaka yiya, mlayo wa hungulwa mtamo, se timhaka kha ti nja nga hoka magwito; nguko m'bihi a randela wule wo lulama, se timhaka ti lamulwa ngu nzila yo wekela.

Xamulo ya Txizimu

⁵ Wonani hagari ka matiko, mi wonisisa, mi tsaka, mi xamala; nguko na maha ka masiku anu, mthumo wu anu mi no mbi wukholwa, mbimo yile mi no txhamuselwa.

⁶ Nguko wonani taku na wusa Vakaldheya, vathu vo karata ni kukuluveta, va rerelako ka otshe mafu ngu kuanama ka ona, kasi kuhonyola makhalo o mbi va lumba.

⁷ Mbathu vo thisa ni kudhukisa; wuhombe ni wulamuli wu na huma kwawe vapune.

⁸ Mahantxhi awe ma tutuma ngutu kupinda singoko, kambe mani tshofu ngutu ni wusiku kupinda maxolwa; vagadhi va ona va hangalaka ka otshe madhawa, ina, vagadhi va ona va nata ngu kule, va na puruma nga magama ma txi tutumela sakudya.

⁹ Vona votshe va tete ku ta xanisa vathu; tikhohe tawe ti na rendekela wutxani, va na sengeleta tikhumbi ku nga mafu.

¹⁰ Se va na pfisa kupanda vafumeli, kambe va na sakana ngu vathangeli, vona va na poyilela yotshe mikhokhola; ngu kumahetela situletule sa mafu, va na honyola mikhokhola.

¹¹ Sekoko, va na pinda kufana ni moya, ve kanda, se va txi ti ninga m'nandu, va txi kha vona mtamo wa txizimu txawe.

Habhakuki wa engeta a txi ti tsetsa

¹² Ina hi nga awe yotshe mbimo Mkoma, Txizimu txangu, ni Msawuleki wangu kani? Athu kha hi na mbi fa. Awe Mkoma, u m'vekete kumaha mlamuli, kambe awe Dirigwi, u mmahile makhato a txi tsayiso.

¹³ Awe u ni maso amanene, ma si dinganiko kuwona to biha, kambe khu tumeli ni kuwona tingana; ngu kutxani koko, u wonako vale va mahako ta walo, u malala, ngako m'bihi a txi mita wule wo lulama kupinda ene kani?

¹⁴ Se u ndi na maha vathu va txi nga sihaka sa lineneni, kufana ni si si tsimbilako ngu mirumbu, si kuwalo wo si fuma.

¹⁵ Ene wa va guleta votshe ngu ndowo, se wa va mana ngu likoka lakwe. Kambe wa va pata ka likoka lakwe lo hiyela; ngu kumaha keto, ene wa tsaka ni ku ti bhuma.

¹⁶ Ngu toneto, wa phaxa likokani kwakwe, ni kuhisa dibaselo mabambe ka likoka; nguko ngu sona si nonisako txyavelo txakwe, se ni sakudya sakwe si maha sasingi.

¹⁷ Ina a nga maha taku e tshakunuta likoka lakwe, asi leki kusimama e dayela vathu kani?