Mapisarema 8 - Bhaibheri Dzvene MuChiShona Chanhasi

Pisarema 8

Kumutungamiri wokuimba negititi. Pisarema raDhavhidhi.

¹ Haiwa Jehovha, Ishe wedu, zita renyu rakaisvonaka sei panyika yose! Makaisa kubwinya kwenyu kudenga kumusoro.

² Pamiromo yavana navacheche makaisa rumbidzo nokuda kwavavengi venyu, kuti munyaradze muvengi nomutsivi.

³ Kana ndichifunga nezvamatenga enyu, iro basa reminwe yenyu, mwedzi nenyeredzi, zvamakarongedza panzvimbo yazvo,

⁴ munhu chiiko zvamunomufunga, kana mwanakomana womunhu zvamune hanya naye?

⁵ Makamuita muduku zvishoma pana Mwari, uye mukamushongedza korona yokubwinya nokukudzwa.

⁶ Makamuita mutongi pamusoro pebasa ramaoko enyu; mukaisa zvinhu zvose pasi petsoka dzake:

⁷ makwai ose nemombe, nemhuka dzesango,

⁸ neshiri dzedenga, nehove dzegungwa, zvose zvinofamba munzira dzomugungwa.

⁹ Haiwa Jehovha, Ishe wedu, zita renyu rakaisvonaka sei panyika yose!