Mapisarema 7 - Bhaibheri Dzvene MuChiShona Chanhasi

Pisarema 7

Rwiyo rwaDhavhidhi, rwaakaimbira Jehovha pamusoro paKushi, muBhenjamini.

¹ Haiwa Jehovha, Mwari wangu, ndinovanda mamuri; ndiponesei uye mundirwire pane vose vanondidzinganisa,

² kuti varege kundibvambura seshumba nokundibvambura-bvambura pasina anondinunura.

³ Haiwa Jehovha, Mwari wangu, kana ndichinge ndakaita izvi uye ndine mhosva pamaoko angu,

⁴ kana ndakaita zvakaipa kuno uya akanga ane rugare neni kana kupamba muvengi wangu pasina mhaka,

⁵ ipapo muvengi wangu ngaandidzinganise andibate; ngaatsike-tsike upenyu hwangu muvhu uye andivatise muguruva.

⁶ Simukai, imi Jehovha pakutsamwa kwenyu; simukai murwise hasha dzavavengi vangu. Simukai, Mwari wangu; rayirai kururamisira.

⁷ Marudzi akaungana ngaaungane akakupoteredzai. Vatongei imi muri kumusoro;

⁸ Jehovha ngaatonge marudzi. Nditongei, imi Jehovha, zvakafanira kururama kwangu, zvakafanira kukwaniswa kwangu, imi Wokumusoro-soro.

⁹ Haiwa, Mwari akarurama, iyemi munonzvera ndangariro nomwoyo, gumisai kuita nesimba kwavakaipa mugoita kuti vakarurama vagare zvakanaka.

¹⁰ Nhoo yangu ndimi Mwari Wokumusoro-soro, iye anoponesa vane mwoyo yakarurama.

¹¹ Mwari ndiye mutongi akarurama, iye Mwari anoratidza hasha dzake zuva nezuva.

¹² Kana munhu asingatendeuki, iye acharodza munondo wake; achakunga uta hwake agogadzirira.

¹³ Agadzirira zvombo zvake zvinouraya; anozvigadzirira miseve yake inopisa.

¹⁴ Iye ane mimba yezvakaipa akatakura mimba yokutambudzika achabereka nhema.

¹⁵ Uyo anochera gomba, akaridzikisa achawira mugomba raachera.

¹⁶ Zvakashata zvake zvichadzokera pamusoro wake; uye kumanikidza kwake kuchauya pamusoro wake.

¹⁷ Ndichatenda Jehovha nokuda kwokururama kwake, uye ndichaimbira zita raJehovha Wokumusoro-soro nziyo dzokurumbidza.