Mapisarema 6 - Bhaibheri Dzvene MuChiShona Chanhasi

Pisarema 6

Kumutungamiri wokuimba nemitengeranwa. Nesheminiti. Pisarema raDhavhidhi.

¹ Haiwa Jehovha, regai kundirayira mukutsamwa kwenyu, kana kundiranga muhasha dzenyu.

² Ndinzwirei ngoni, Jehovha, nokuti ndava kuziya; haiwa Jehovha, ndiporesei, nokuti mapfupa angu ava kurwadza.

³ Mweya wangu uri kurwadziwa. Haiwa Jehovha, kusvikira riniko, kusvikira riniko?

⁴ Dzokai, imi Jehovha, mugondirwira; ndiponesei nokuda kworudo rwenyu rusingaperi.

⁵ Hakuna anokurangarirai kana afa. Ndiani anokurumbidzai kubva muguva?

⁶ Ndaneta nokugomera; ndinonyorovesa mubhedha wangu nemisodzi ndichichema usiku hwose, ndinonyorovesa uvato hwangu nemisodzi.

⁷ Meso angu aneta nokuchema; haachaoni nokuda kwavavengi vangu vose.

⁸ Ibvai pandiri, imi mose munoita zvakaipa, nokuti Jehovha anzwa kuchema kwangu.

⁹ Jehovha anzwa kukumbira kwangu nyasha; Jehovha anogamuchira munyengetero wangu.

¹⁰ Vavengi vangu vose vachanyadziswa uye vachavhundutswa; vachadzokera shure pakarepo mukunyadziswa.