Mapisarema 3 - Bhaibheri Dzvene MuChiShona Chanhasi

Pisarema 3

Pisarema raDhavhidhi. Panguva yaakatiza Abhusaromu mwanakomana wake.

¹ Haiwa Jehovha, vadzivisi vangu vakawanda sei! Vakawanda sei vanondimukira!

² Vazhinji vanoti kwandiri, “Mwari haangamudzikinuri.” Sera

³ Asi imi Jehovha, muri nhoo yakandipoteredza; munoisa rukudzo pandiri uye munosimudza musoro wangu.

⁴ Kuna Jehovha ndinodana nenzwi guru, uye anondipindura ari pagomo rake dzvene. Sera

⁵ Ndinovata pasi ndigokotsira; ndinomukazve, nokuti Jehovha anonditsigira.

⁶ Handizotyi makumi ezviuru vakandikomba kuti vandirwise.

⁷ Simukai, imi Jehovha! Ndirwirei, imi Mwari wangu! Rovai vavengi vangu vose pashaya; gurai meno avakaipa.

⁸ Rusununguko runobva kuna Jehovha. Maropafadzo enyu ngaave pamusoro pavanhu venyu. Sera