Mapisarema 20 - Bhaibheri Dzvene MuChiShona Chanhasi

Pisarema 20

Kumutungamiri wokuimba. Pisarema raDhavhidhi.

¹ Jehovha ngaakupindure paunotambudzika; zita raMwari waJakobho ngarikudzivirire.

² Ngaakutumire rubatsiro runobva panzvimbo tsvene, uye akupe rutsigiro runobva kuZioni.

³ Ngaarangarire zvibayiro zvako zvose uye agogamuchira zvibayiro zvako zvinopiswa. Sera

⁴ Ngaakupe zvinodikanwa nomwoyo wako, uye aite kuti urongwa hwako hwose hubudirire.

⁵ Tichadanidzira nomufaro pakukunda kwako, uye tichasimudza mireza yedu muzita raMwari wedu. Jehovha ngaakupe zvose zvawakakumbira.

⁶ Zvino ndava kuziva kuti Jehovha anoponesa muzodziwa wake; anomupindura ari kudenga rake dzvene, nesimba rokuponesa kworuoko rwake rworudyi.

⁷ Vamwe vanovimba nengoro, vamwe namabhiza, asi isu tinovimba nezita raJehovha Mwari wedu.

⁸ Vanowisirwa pasi namabvi avo vagowa, asi isu tinosimuka tigomira takasimba.

⁹ Haiwa Jehovha, ponesai mambo! Tipindurei patinodana!