Mapisarema 19 - Bhaibheri Dzvene MuChiShona Chanhasi

Pisarema 19

Kumutungamiri wokuimba. Pisarema raDhavhidhi.

¹ Matenga anotaura kubwinya kwaMwari; matenga anoparidza mabasa amaoko ake.

² Zuva nezuva anotaura; usiku nousiku anoratidza zivo.

³ Hakuna mutauro kana rurimi rusinganzwi inzwi ravo.

⁴ Inzwi razvo rinosvika panyika yose, mashoko azvo kumagumo apasi. Mumatenga imomo, akadzika tende rezuva,

⁵ rakaita sechikomba chinobuda mumba, seshasha inopemberera kumhanya nhangemutange.

⁶ Rinobuda kuno rumwe rutivi rwedenga richitenderera kusvikira kuno rumwe rutivi; hakuna chinhu chakavanzika kubva pakupisa kwaro.

⁷ Murayiro waJehovha wakakwana, unomutsiridza mweya. Zvirevo zvaJehovha zvakavimbika, zvinopa njere kuna vasina mano.

⁸ Zvirevo zvaJehovha zvakarurama, zvinopa mufaro kumwoyo. Murayiro waJehovha unopenya, unopa chiedza kumaziso.

⁹ Kutya Jehovha kwakanaka, kunogara nokusingaperi. Zvakatongwa naJehovha ndezvechokwadi uye zvose zvakarurama.

¹⁰ Zvinokosha kupfuura goridhe, kupfuura goridhe rakanatswa; zvinotapira kupfuura uchi, kupinda uchi hwabva muzinga.

¹¹ Muranda wenyu anoyambirwa nazvo; pakuzvichengeta pano mubayiro mukuru.

¹² Ndianiko angaziva kukanganisa kwake? Ndikanganwirei mhosva dzangu dzakavanzika.

¹³ Dzorai muranda wenyu kubva pakutadza nobwoni; ngazvirege kuva nesimba pamusoro pangu. Ipapo handizovi nemhosva, ndisina mhaka yokudarika kukuru.

¹⁴ Mashoko omuromo wangu nokurangarira kwomwoyo wangu ngazvifadze pamberi penyu, imi Jehovha, Dombo rangu noMudzikinuri wangu.