Mapisarema 12 - Bhaibheri Dzvene MuChiShona Chanhasi

Pisarema 12

Kumutungamiri wokuimba. Nesheminiti. Pisarema raDhavhidhi.

¹ Batsirai, imi Jehovha, nokuti vanoda Mwari hapachina; vakatendeka vapera pakati pavanhu.

² Mumwe nomumwe anorevera wokwake nhema; miromo yavo inobata kumeso nokutaura zvinonyengera.

³ Jehovha ngaagure miromo yose inobata kumeso, norurimi rumwe norumwe runozvikudza

⁴ ruchiti, “Tichakunda nendimi dzedu; miromo ndeyedu, tenzi wedu ndiani?”

⁵ “Nokuda kwokumanikidzwa kwavasina simba nokugomera kwavarombo, ndichasimuka zvino,” ndizvo zvinotaura Jehovha. “Ndichavadzivirira kuna avo vanovaparadza.”

⁶ Uye mashoko aJehovha haana chaangapomerwa, sesirivha yakacheneswa muchoto chevhu, yakanatswa kanomwe.

⁷ Imi Jehovha, muchatichengeta murugare uye muchatidzivirira kubva kuvanhu vakadai nokusingaperi.

⁸ Vakaipa vanofamba-famba vakasununguka kana zvakashata zvichikudzwa pakati pavanhu.