Mapisarema 11 - Bhaibheri Dzvene MuChiShona Chanhasi

Pisarema 11

Kumutungamiri wokuimba. Pisarema raDhavhidhi.

¹ Ndinovanda muna Jehovha. Mungareva seiko kwandiri muchiti, “Tizira kugomo rako seshiri.

² Nokuti tarira, vakaipa vanowembura uta hwavo; vanogadzirira miseve yavo parukungiso, kuti vapfure vari murima, uyo akarurama pamwoyo.

³ Kana nheyo dzaparadzwa, akarurama angaiteiko?”

⁴ Jehovha ari mutemberi yake tsvene; Jehovha ari pachigaro chake choushe chokudenga. Anocherechedza vanakomana vavanhu; meso ake anovaedza.

⁵ Jehovha anoedza vakarurama, asi vakaipa navanoda zvechisimba mweya wake unovavenga.

⁶ Pane vakaipa anonayisa mazimbe omoto nesafuri inopfuta; mhepo inopisa ndiwo uchava mugove wavo.

⁷ Nokuti Jehovha akarurama, anoda kururamisira; vanhu vakarurama vachaona chiso chake.