Mapisarema 1 - Bhaibheri Dzvene MuChiShona Chanhasi

BHUKU 1 Mapisarema 1–41 Pisarema 1

¹ Akaropafadzwa munhu asingafambi panorangana vakaipa, asingamiri panzira yavatadzi, asingagari pachigaro chavadadi.

² Asi anofarira murayiro waJehovha, uye anofungisisa murayiro wake masikati nousiku.

³ Akafanana nomuti wakasimwa pahova dzemvura, unobereka michero yawo nenguva yawo, uye mashizha awo haasvavi. Chinhu chipi nechipi chaanoita chinoendeka.

⁴ Vakaipa havana kudaro! Vakafanana nehundi inopepereswa nemhepo.

⁵ Naizvozvo vakaipa havangamiri pakutongwa, kana vatadzi paungano yavakarurama.

⁶ Nokuti Jehovha anotarira nzira yavakarurama, asi nzira yavakaipa ichaparadzwa.